Ihasara cinaavira citepaka ukhumelela mahuku ankhaleehwaala. Yakhumelelaka ihasara, nteko wo waakavihera ale yaakhumelenle uhaana uthotokanihiyaka ratta. Phimaana, Mphwinko wo Mahumu Unhoolela uholakela wiira khula Ipeteli ikhalane Ikhuru Yookavihera Yakhumelelaka Ihasara.

Mayamunna anvara nteko nhina iyo ikhurupwiiyo yacuwelaka wiira ihokhumelela ihasara, woohipica anawaalikarela mahumu o nipuro nikhumelenle ihasara wiira acuwele mananna owaakavihera anamalalyeera. Wakhalaka wiira anamalalyeera o nno nipuronno anaapheela ukaviheriya cinene, Ipeteli inawaathanla mayamunna oohala utthenkaca nteko wookaviheriya. Ayo mayamunnaayo pooti waatthenkaca atthu owiivaherera ukavihera, micanko awula citthu coohala urwaa waakawela anamalalyeera ampheela ukaviheriya.

Upanka ayo manannaayo uhaana ifayita cinene, kontha unaahala uvariya nteko wonkwaha mmoca, nimananna oothotokannya ni khunhala urihakaciya nsurukhu mahala. Iyo phi itthu ineerannya ikwaha cikiina mayamunna yavaraka uyo ntekooyo veekha caya woohikaviheriya niipeteli.

Mayamunna anvahaceriya uhoolela uyo ntekooyo pooti ulakela nsurukhu unhala upheela uvareliya nteko ni nummeru naatthu ampheeliya wiira akavihere. Ayo ciicammo pooti uwuulumana ahooleli ookuverunu o uyo ncokooyo, ukhala wiira ayo ahoolelyaayo ikwaha cinci anaanikavira uvara uyo ntekooyo saana. Phimaana, ntthu khanlamuliya ulakela veekha ulepela micanko, ukawa icoolya awula urwaa ukavihera nipuro nikhumelenle ihasara woohilattuliya.

Khweeliini, yakhumelelaka ihasara, hi nimpheela ukavihera. (Mabere. 13:16) Hi ninawaafenta mayamunneehu! Vano isiyani inhaleehu upanka? Itthu yofayita cinene ukhanle waalompela atthu yaakhumelenle ihasara ni ciicammo atthu aneekurumica wiira yaakavihere. Ciicammo, pooti wancankeehu wiira nikavihere miteko cihu co ntuninyani motheene. Mayamunna anhoolela miteko u Peteli anaatthara malakihero anvahiyaaya ni Mphwinko wo Mahumu Unhoolela, ni ayo phinhala ukhitiri ulakela ratta mananna uyo nsurukhuuyo cinreeraaya uvareliya nteko. Nyuuva mwapheelaka ukavihera mapuro ankhumelela ihasara, pooti wantikha ipetisau ineehaniya DC-50, Petição para Voluntário do Departamento Local de Projeto/Construção.

MOONE IVIDIYU UCARA WO MAACI UHOKWANYULACA CITTHU U BRASIL. MWAMALIHAKA, MWAAKHULE ALA MAKOHWAALA:

Isiyani yuuvanreni nrima woona winyu mananna Masaahiti a Yehova caavanryaaya nteko wiira yaakavihere atthu yaakhumelenle ihasara u Brasil mwakha wo 2020?