1 Milandu 11:1-47
11 Umu kuya kwa nsita, Aina Izlaeli yonsi yaile kuli Devedi uku Hebuloni nu kumunena iyati: “Swemo sweswe ina yako.
2 Umu manda ya ku cisila lino Saulo watuteekanga, wewe watungululanga Aina Izlaeli umu ulwi. Nupya Yeova Leza wako wakunenyile ati: ‘Ulacema antu yane Aina Izlaeli nupya wewe ulaya intunguluzi yao.’”
3 Fwandi akalamba yonsi amu Izlaeli yaile uku mwene uku Hebuloni nupya Devedi wapangine nayo upangano umu Hebuloni pa nkoleelo yakwe Yeova. Lyene yamwitulwilile mafuta pa mutwe pakuti aye umwene wa Ina Izlaeli ukulingana na vino Yeova walanzile ukupitila muli Samweli.
4 Pa cisila, Devedi na Ina Izlaeli yonsi yaile uku Yelusalemu kuli kuti uku Yebusi, kuno Aina Yebusi ikalanga.
5 Aikalanga umu Yebusi yatumfyanga Devedi iyati: “Utalatala uwize kuno.” Lelo Devedi waposile umusumba wa Zioni ucingililwe ni linga uno ndakai ukaamwa ukuti Umusumba Wakwe Devedi.
6 Lyene Devedi walanzile ati: “Wensi aalatandikilapo ukuzanza Aina Yebusi, alaya intunguluzi nupya cilolo.” Fwandi Yoabu mwana Zeluya u watandikilepo, nupya wizile aya intunguluzi.
7 Lyene Devedi watandike ukwikala umu musumba ucingililwe acino yawamilanga ukuti Umusumba Wakwe Devedi.
8 Watandike ukukuula ukuzingulusya umusumba ukufuma pa Mulundu* kufika uku ncende izyauzingulwike, nupya Yoabu wakuuzile cipya cipya umwasyazile.
9 Fwandi Devedi wakwatilangako maka, nupya Yeova wa maumba wali nawe.
10 Lyene zii ali ntunguluzi zya yasilika yakwe Devedi aamaka, izyamutungililanga sana umu wene wakwe pamwi na Ina Izlaeli yonsi, pakuti aye umwene ukulingana na vino Yeova walanzile pa Ina Izlaeli.
11 Asilika yakwe Devedi aamaka aeya: Yasyobeamu mwana Hakimoni umukalamba pali yotatu. Wakomile aonsi 300 umu ulwi sile onga kuomvya isumo lyakwe.
12 Uwakonsile pali aliwe a Elieza mwana Dodo Umwina Ahoi. Wali pa yasilika yayo yatatu aamaka.
13 Wali na Devedi uku Pasi-damimu kuno Aina Filisti yakolongine umu ulwi. Kwali icalo cakwe baale nupya antu yapuusile pa mulandu wa Ina Filisti.
14 Lelo wimilile pakasi ka calo nu kucicingilila, nupya watwalilile ukukoma Aina Filisti icakuti Yeova wamwavwile ukucimvya.
15 Yatatu pa ntunguluzi izili 30 yaile uku ciliwe ukwi cele lya Adulamu ukwali Devedi, ala asilika Aina Filisti iyapanga inkambi umu Mukonko wa Ina Lefa.
16 Devedi wali muno wafisime, nupya asilika yamwi Aina Filisti yapangiile inkambi umu Betelemu.
17 Lyene Devedi walanzile ati: “Ninguvwa ningo sana ndi cakuti namwile manzi aaya umu cisima icaya umupiipi ni mpongolo ya musumba wa Betelemu.”
18 Lyene asilika yatatu yaile iingila umu nkambi ya Ina Filisti uku maka, nupya yaile iyatapa manzi umu cisima icayelile umupiipi ni mpongolo ya musumba wa Betelemu nu kutwalila Devedi; lelo wakanyile ukumwa manzi yayo nupya waitiile pansi pa nkoleelo yakwe Yeova.
19 Walanzile ati: “Ntanga incite ica musango uu pa mulandu wakuti nacindika Leza. Uzye imwe uwazi wa yantu yaa atiika maumi yao umu uzanzo? Pano iika maumi yao umu uzanzo pakuti yalete manzi yaa.” Fwandi Devedi wakanyile ukumwa manzi yayo. Vikwene ali vino asilika yakwe yatatu aamaka yacisile.
20 Abisyai umwina wakwe Yoabu wali pa yasilika na yauze yatatu, u watungululanga auze; wakomile antu 300 ni isumo, nawe kwene wamanyikwe kwati avino asilika ya maka yatatu yamanyikwe.
21 Umwi umba lii aliwe walumbwike ukucila auze yaili nupya aliwe wayatungululanga; lelo ataakweti icifulo icalingine na cino asilika yatatu aakutandikilapo yaakweti.
22 Benaya mwana Yeoyada wali u monsi umusipe uwaomvile imilimo ya maka umu Kabizeele. Wakomile ana aonsi yaili yakwe Alyeli uwa ku Moabu, nupya wingiile umu ciwina uwanda uno kwali usu wa mvula nu kukoma cisama.
23 Wakomile nu monsi umwi Umwina Ijipti uwali ipombolo, uwatalimfile mamita ukucilako pali yaili.* Nanti cakuti Umwina Ijipti wakweti isumo ilyali ilikulu wa cimuti cakwe ya kapikula, Benaya waile kuli aliwe ala ali ni ntuwa, waile asompola isumo uku Mwina Ijipti nupya wamukomile ni isumo kwene lilyo.
24 Vikwene ali vino Benaya mwana Yeoyada wacisile, nupya nawe kwene wamanyikwe wakwe vino aonsi yatatu aamaka yamanyikwe.
25 Nanti cakuti walumbwike ukucila asilika yaya 30, ataakweti icifulo icalingine ni ca yasilika yatatu. Lelo Devedi wamusonsile ukuya pali yano yamulindanga.
26 Asilika ya maka pa yasilika yonsi yaali a Asaeli umwina wakwe Yoabu, Elianani mwana Dodo uwa ku Betelemu,
27 Syamoti Umwina Haloli, Helezi Umwina Peloni,
28 Ila mwana Ikesyi Umwina Tekoa, Abi-eza Umwina Anatoti,
29 Sibekai Umwina Husya, Ilai Umwina Ahoi,
30 Maalai Umwina Netofa, Heledi mwana Baana Umwina Netofa,
31 Itai mwana Libai uwa ku Gibeya uwa mutundu wakwe Benjamini, Benaya Umwina Pilatoni,
32 Hulai uwa ku mikonko ya Gaasyi, Abiyeli Umwina Beti-alaba,
33 Azimaveti Umwina Baulimu, Elyaba Umwina Syaaliboni,
34 ana aonsi yakwe Hasyemu Umwina Gizoni, Yonatani mwana Syage Umwina Halali,
35 Ahiyamu mwana Sakali Umwina Halali, Elifala mwana Uli,
36 Hefeli Umwina Mekelati, Ahiya Umwina Peloni,
37 Hezilo Umwina Kalimeli, Naalai mwana Ezibai,
38 Yoweli umwina wakwe Natani, Mibali mwana Hagili,
39 Zeleki Umwina Amoni, Nahalai Umwina Beeloti uwasendelanga Yoabu mwana Zeluya ivyanzo;
40 Ila Umwina Itili, Galebu Umwina Itili,
41 Uliya Umwina Hiti, Zabadi mwana Ahalai,
42 Adina mwana Syiza uwa mu mutundu wakwe Lubeni, umukalamba wa mu mutundu wakwe Lubeni uwali na auze 30;
43 Hanani mwana Maaka, Yosafati Umwina Mitini,
44 Uziya Umwina Asyiteloti, Syama na Yeiyeli ana yakwe Hotamu Umwina Aloeli;
45 Yediaeli mwana Syimuli, na Yoa umwinakwe Umwina Tizi;
46 Eliyeli Umwina Mahavi, Yelibai na Yosyaviya ana aonsi yakwe Elinaamu, na Itima Umwina Moabu;
47 Eliyeli, Obedi, na Yaasieli Umwina Mezobai.
Mafutunoti
^ Mu Ciebele: “Limwi izwi lii likapiliula ukuti umwamba uno antu yapanga.”
^ Mu Ciebele: “Makyubiti 5.” Lolini Ivyeo na Vyuze pa B14.
