1 Milandu 12:1-40
-
Aatungililanga Devedi pa wene (1-40)
12 Yaa ali yonsi aizile kuli Devedi uku Zikilagi lino wafisamanga Saulo mwana Kisyi, nupya yaali pa yasilika ya maka aamwazwanga umu ulwi.
2 Yaomvyanga maulapwa nupya yaomvyanga makasa yonsi yoili pa kuvwinta mawe nanti ukulasa inceto. Yaali aina yakwe Saulo uwa mu mutundu wakwe Benjamini.
3 Umukalamba wali a Ahieza alino ipakonka Yoasyi, yonsi yoili yaali ana aonsi yakwe Syema Umwina Gibeya; paali na Yezieli na Peleti ya mwana azimaveti, Belaka, Yeu Umwina Anatoti,
4 Isyimaya Umwina Gibyoni umusilika wa maka uwali pa yasilika 30 nupya u wayatungululanga; na Yelemiya, Yaazieli, Yoanani, Yozabadi Umwina Gedela,
5 Eluzai, Yelimoti, Bealiya, Syemaliya, Syefatiya Umwina Halifi,
6 Elikana, Isyiya, Azaleli, Yoezeli, na Yasyobeamu Aina Kola;
7 na Yowela na Zebadiya ya mwana Yeloamu uwa ku Gedoli.
8 Amu mutundu wakwe Gadi yamwi yaali uku lusansa lwakwe Devedi nupya yaile kuno wafisime umu lwanga; yaali asilika ya maka aasambilile ivya kulwa inkondo, yaakweti ivisyangu ivikulu na masumo, ni vinso vyao vyalolekanga kwati ivinso vyakwe ya cisama nupya yasimulisyanga wakwe ya mpombo ya mu myamba.
9 Ezeli wali ali mukalamba, wakwe ciili wali a Obadiya, wakwe citatu wali a Eliabu,
10 uwalenga 4 wali a Misyimana, uwalenga 5 wali a Yelemiya,
11 uwalenga 6 wali a Atai, uwalenga 7 wali a Eliyeli,
12 uwalenga 8 wali a Yoanani, uwalenga 9 wali a Elizabadi,
13 uwalenga 10 wali a Yelemiya, nu walenga 11 wali a Makibanai.
14 Yaa ali ya mu mutundu wakwe Gadi aali akalamba ya yasilika. Aatakweti sana maka wali nu kukwanisya ukulwisya asilika 100, nu wakweti sana maka wali nu kukwanisya ukulwisya asilika 1,000.
15 Yakwene ali yonsi alamvile Uluzi Lwa Yodani ala lwazuula umu mwezi wa kutandikilako nupya yonsi aikalanga umu mikonko yayazingiile uku ufumondaka nu ku uwondaka.
16 Aonsi yamwi amu mutundu wakwe Benjamini na amu mutundu wakwe Yuda nayo kwene yaile kuno Devedi wafisime.
17 Lyene Devedi waile ayakomenkanya nu kuyanena ati: “Ndi cakuti imwiza kuli nene mu mutende umu kungazwa, ale mumaya ivyuza vyane. Lelo ndi cakuti imwiza ukuti mumpeele uku yalwani yane lino pasi vino induvyanya, Leza wa vikolwe vitu alolekesyepo nu kupingula.”
18 Lyene umupasi wakwe Leza wizile pali Amasai uwali intunguluzi pa yonsi 30, nawe walanzile ati:
“Devedi sweswe yantu yako nupya tuli uku lusansa lwako we mwana Yese.
Si umutende uye naawe nupya uye na pa yantu aakukwazwa,Pano Leza wako akukwazwa.”
Fwandi Devedi wayapokelile nu kuyasonta ukuya intunguluzi pa yasilika yakwe.
19 Amu mutundu wakwe Manase yamwi nayo kwene yaile kuli Devedi lino wapisile na Ina Filisti mu kulwisya Saulo; lelo atazwilizye Aina Filisti, pano lino intunguluzi zyao zyalondelizye zyamunenyile ukuti aswilile, pano zyalanzile iziti: “Amaya akaye uku lusansa lwakwe Saulo umusambazi wakwe nupya maumi itu yamaya yakaye umu uzanzo.”
20 Lino Devedi waile uku Zikilagi, aamulondiile ukufuma umu mutundu wakwe Manase aeya: Adina, Yozabadi, Yediaeli, Mikaeli, Yozabadi, Eliu, na Ziletai, aatungululanga antu masauzandi amu mutundu wakwe Manase.
21 Yazwilizye Devedi ukulwisya alwani pano yonsi kwene yaali aonsi aamaka nupya asipe, aizile iyaya intunguluzi zya yasilika.
22 Cila wanda antu yayanga kuli Devedi uku kumwazwa asuka akwata asilika aingi wa yasilika yakwe Leza.
23 Yii ali mpendwa ya ntunguluzi zya yasilika aaipekinye ukuya umu ulwi aile kuli Devedi uku Hebuloni pakuti yakapoke uwene wakwe Saulo nu kuupeela kuli aliwe ukulingana na vino Yeova walanzile.
24 Asilika amu mutundu wakwe Yuda aipekinye uku ulwi aasendanga ivisyangu vikalamba na masumo yaali 6,800.
25 Mu mutundu wakwe Simyoni mwali asilika ya maka nupya aonsi asipe 7,100.
26 Mu mutundu wakwe Levi mwali aali 4,600.
27 Yeoyada u watungululanga ya mwana Aloni nupya wali na aonsi 3,700,
28 kumwi na Zadoki umonsi uwacance uwa maka nupya umusipe ni ntunguluzi 22 izya mu mutundu wakwe.
29 Mu ya mu mutundu wakwe Benjamini aina yakwe Saulo mwali aali 3,000, nupya aingi pali yayo uku cisila yalindanga ningo sana ing’anda yakwe Saulo.
30 Mu mutundu wakwe Efulemu mwali aonsi ya maka 20,800 asipe nupya alumbwike umu mitundu yao.
31 Muli afu wa mutundu wakwe Manase mwali aonsi 18,000 asoolwilwe kuti yakike Devedi pa wene.
32 Mu ya mutundu wakwe Isakali amanyanga insita nu kumanya vino Aina Izlaeli yalinzile ukucita mwali aonsi 200 aali intunguluzi nupya yatungululanga aina yao yonsi.
33 Mu mutundu wakwe Zebuluni mwali aonsi 50,000 aangaya umu ulwi, aonsi yaa yaipekinye uku ulwi nupya yakweti ivyanzo vyonsi ivikaomviwa umu ulwi, yonsi kwene yaile umu kwazwilizya Devedi nu mwenzo onga.
34 Mu mutundu wakwe Nafutali mwali intunguluzi 1,000 izyali na aonsi 37,000 akweti ivisyangu vikalamba na masumo.
35 Mu mutundu wakwe Dani mwali aonsi 28,600 aapitanga umu maumba pa kuya umu ulwi.
36 Nupya umu mutundu wakwe Asyeli mwali aonsi 40,000 aali aipekanye ukuya umu ulwi mu maumba.
37 Ku mbalama yuze iya Luzi Lwa Yodani, mu mutundu wakwe Lubeni, mutundu wakwe Gadi na muli afu wa mutundu wakwe Manase, mwali asilika 120,000 aakweti ivyanzo vyonsi ivikaomviwa umu nkondo.
38 Yonsi yaa yaali aonsi ya ulwi aipekinye ukulwa, yaile uku Hebuloni ni myenzo yao yonsi ku kwika Devedi pa wene kuti ateeka Aina Izlaeli yonsi, nupya Aina Izlaeli asyala yalemine pakuti ike Devedi pa wene.
39 Nupya ikazile kuuku kwene na Devedi pa manda yatatu ala yakulya nu kumwa vino aina yao yayapekanyizizye.
40 Nupya na antu ya mupiipi kumwi na akutali, kufika uku mutundu wakwe Isakali, mutundu wakwe Zebuluni, nu mutundu wakwe Nafutali, yaletanga ivyakulya pali ya punda, pa ngamila na pa ng’ombe, kuli kuti ivyakulya ivyapangilwa na fulaulo, ya keke aapangilwa na masamvu na aapangilwa ni myangazi iyume, waini, mafuta, ni ng’ombe ni mfwele izingi sana, pano mu mpanga iya Izlaeli mwali sana insansa.
