1 Milandu 13:1-14
13 Devedi walanzile na akalamba ya pa yantu masauzandi na apa yantu 100 alino ni ntunguluzi zyonsi.
2 Lyene wanenyile Aina Izlaeli yonsi ati: “Ndi cakuti cili ningo kuli mwemwe nupya Yeova Leza witu akucizumilizya, lekini tutume amazwi uku ina itu asyala umu vitungu vyonsi vya mu Izlaeli na kuli ya simapepo nu ku Ina Levi aakaikala umu misumba yao iya kucemelamo iviteekwa kuti ize kuli sweswe.
3 Nupya lekini tuwezye Imbokosi ya Upangano yakwe Leza witu.” Pano yataisakamalanga umu manda yakwe Saulo.
4 Aina Izlaeli yonsi yazumile ukucita vivyo kwene, pano yonsi cayazipiile.
5 Fwandi Devedi wakolonganike Aina Izlaeli yonsi ukufuma uku luzi* lwa Ijipti ukufika nu ku Lebo-hamati* pakuti yalete Imbokosi ya Upangano yakwe Leza wa cumi ukufuma uku Kilyati-yelimu.
6 Devedi na Ina Izlaeli yonsi yaile uku Baala uku Kilyati-yelimu, umusumba uwayela umu mpanga yakwe Yuda umu kusenda Imbokosi ya Upangano yakwe Yeova Leza wa cumi uwikala papela* pali ya kelubi apaya izina lyakwe.
7 Nomba pa kufumya Imbokosi ya Upangano yakwe Leza wa cumi uku ng’anda yakwe Abinadabu, yaisile pa cikocikala icipya nupya Uza na Ahiyo aatungululanga ing’ombe izyatintanga icikocikala.
8 Devedi na Ina Izlaeli yonsi yazevyanga pa nkoleelo yakwe Leza wa cumi na maka yao yonsi ala yakulizya inyimbo ukuomvya mazeeze, mabanjo, viwaya,* mapenga na vyuze ivya kulizizyako inyimbo.
9 Nomba lino yafisile pa lwano lwakwe Kidoni, Uza watambalike ikasa nu kulema Imbokosi ya Upangano pano ing’ombe zyakasi ziiponye.
10 Fwandi Yeova wasokiile sana Uza nu kumukoma, pa mulandu wakuti watambalike ikasa lyakwe nu kulema Imbokosi ya Upangano, nupya wafwilile pa nkoleelo yakwe Leza.
11 Nomba Devedi wasosile pa mulandu na vino Yeova wasokiile Uza; nupya incende iiya ikaamwa ukuti Pelezi-uza* ukufika na ndakai.
12 Fwandi Devedi watiinyile sana Leza wa cumi pa wanda uuwa nu kulanda ati: “Uzye ningawezya uli Imbokosi yakwe Leza wa cumi kuno nkaikala?”
13 Devedi ataawezizye Imbokosi ya Upangano mu musumba uno wikalangamo uno yamanga ukuti Musumba Wakwe Devedi, lelo walesile ukuti yaitwale uku ng’anda yakwe Obedi-edomu Umwina Gati.
14 Mbokosi ya Upangano yakwe Leza wa cumi yatwalilile ukwikala umu ng’anda yakwe Obedi-edomu pa myezi itatu, nupya Yeova wapaalanga Obedi-edomu na vyonsi vino wakweti.
Mafutunoti
^ Nanti “uku Syiholi.”
^ Nanti “uku wingililo wa ku Hamati.”
^ Nanti limwi, “pakasi.”
^ Vyela vino yakapumanya pa kulizya.
^ Icikapiliula ukuti “Ukusokela Uza.”
