1 Milandu 15:1-29
15 Nupya watwalilile ukuikuulila mang’anda umu Musumba Wakwe Devedi, wapekinye ni ncende apa kwika Imbokosi ya Upangano yakwe Leza wa cumi aikapo ni tenti.
2 Lyene Devedi walanzile ati: “Kusi alinzile ukulasenda Imbokosi ya Upangano yakwe Leza wa cumi suka sile Aina Levi, pano ayano Yeova wasoolola ukulasenda Imbokosi ya Upangano yakwe Yeova nu kulamuombela lyonsi.”
3 Lyene Devedi wakolonganike Aina Izlaeli yonsi umu Yelusalemu kuti yakasende Imbokosi ya Upangano yakwe Yeova nu kuitwala uku ncende ino wapekinye.
4 Yano Devedi wakolonganike ukufuma umu lupwa lwakwe Aloni nu mu Ina Levi aeya:
5 mu Ina Koati, Uliyeli intunguluzi na ina yakwe 120;
6 mu Ina Melali, Asaiya intunguluzi na ina yakwe 220;
7 mu Ina Gesyomu, Yoweli intunguluzi na ina yakwe 130;
8 mu lupwa lwakwe Elizafani, Syemaya intunguluzi na ina yakwe 200;
9 mu lupwa lwakwe Hebuloni, Eliyeli intunguluzi na ina yakwe 80;
10 nu mu lupwa lwakwe Uzieli, Aminadabu intunguluzi na ina yakwe 112.
11 Nupya Devedi wamile Zadoki na Abiata ya simapepo, aama na Uliyeli, Asaiya, Yoweli, Syemaya, Eliyeli, na Aminadabu aali Aina Levi
12 nu kuyanena ati: “Mwemwe yakalamba ya ndupwa zya Ina Levi. Isangululini pamwi na ina inu nu kuyaleta Imbokosi ya Upangano yakwe Yeova Leza wa Ina Izlaeli pa ncende ino impekanya.
13 Vino mutaasenzile imbokosi ya upangano pa kutandika, Yeova Leza witu watusokiile sana pa mulandu wakuti tutaalondelizye vino tulinzile ukucita pa kuisenda.”
14 Fwandi ya simapepo na Ina Levi yaisangulwile kuti yakalete Imbokosi ya Upangano yakwe Yeova Leza wa Ina Izlaeli.
15 Lyene Aina Levi yasenzile Imbokosi ya Upangano yakwe Leza wa cumi pa viye vyao ukuomvya utumiti twa kunyemwilako wakwe vino Yeova wanenyile Mose.
16 Lyene Devedi wanenyile akalamba ya Ina Levi kuti yanene aina yao ya kiimba yaimba ni nsansa ala yakulizya ivya kulizizyako inyimbo kuli kuti ya banjo, mazeeze ni viwaya.*
17 Fwandi Aina Levi yasoolwile Hemani mwana Yoweli, nupya umu ina yao yasoolwile Asafu mwana Belekiya, nu mu Ina Melali aina yao yasoolwile Etani mwana Kusyaya.
18 Yaali na ina yao amwi umba lyakwe ciili, kuli kuti Zekaliya, Beni, Yaaziyeli, Syemilamoti, Yehiyeli, Uni, Eliabu, Benaya, Maaseya, Matitiya, Elifeleu, na Mikineya, alino na Obedi-edomu na Yeiyeli aali alinzi ya pa mpongolo.
19 Hemani, Asafu, na Etani yaali nu kulalizya iviwaya vyakwe koopa;
20 Zekaliya, Aziyeli, Syemilamoti, Yehiyeli, Uni, Eliabu, Maaseya, na Benaya nayo yalizyanga ya banjo akweti iviunda vya papela;
21 Matitiya, Elifeleu, Mikineya, Obedi-edomu, Yeiyeli, na Azaziya nayo yatungulwile ala yakulizya mazeeze aaciunda ca pansi.
22 Kenaniya umukalamba wa Ina Levi u wangalilanga imisendele ya mbokosi ya upangano pano wamanyile sana umulimo uu,
23 nupya Belekiya na Elikana yalindanga Imbokosi ya Upangano.
24 Syebaniya, Yosafati, Netaneli, Amasai, Zekaliya, Benaya, na Elieza aombanga umulimo wa usimapepo yalizyanga mapenga ni ciunda icikulu pa nkoleelo ya Mbokosi ya Upangano yakwe Leza wa cumi, nupya Obedi-edomu na Yeaya nayo kwene yalindanga Imbokosi ya Upangano.
25 Lyene Devedi na akalamba ya mu Izlaeli ni ntunguluzi zya pa yantu masauzandi yalondiile imbokosi ya upangano yakwe Yeova ni nsansa lino yaifumyanga uku ng’anda yakwe Obedi-edomu.
26 Lino Leza wa cumi wazwilizye Aina Levi asenzile imbokosi ya upangano yakwe Yeova, yapeezile ya cipambasi 7 na ya suuku 7.
27 Devedi, Aina Levi asenzile Imbokosi ya Upangano, ya kiimba, na Kenaniya uwangalilanga imisendele ya mbokosi ya upangano na ya kiimba, yazwite ivyakuzwala vya nsalu isuma ivyaula amakasa; nupya Devedi wazwite na efodi wa nsalu isuma.
28 Aina Izlaeli yonsi yawezyanga imbokosi ya upangano yakwe Yeova ala yakupunda ni nsansa nu kulizya mapenga, viwaya, ya banjo na mazeeze.
29 Lelo lino yafisizye imbokosi ya upangano yakwe Yeova umu Musumba Wakwe Devedi, Mikala mwana Saulo wasungamile api windo nu kulola Umwene Devedi akutolooka nu kuzevya; nupya watandike ukumutumfya umu mwenzo.
Mafutunoti
^ Vyela vino yakapumanya pa kulizya.
