1 Milandu 16:1-43
16 Fwandi yaleesile Imbokosi ya Upangano yakwe Leza wa cumi nu kuika umwi tenti lino Devedi wapanzile; nupya yapeezile malambo ya koca na malambo ya mutende pa nkoleelo yakwe Leza wa cumi.
2 Lino Devedi wamazile ukupeela malambo ya koca na malambo ya mutende wapaazile antu umwi zina lyakwe Yeova.
3 Lyene wapeezile Aina Izlaeli yonsi aonsi na anaci, cila muntu mukate uulungane, keke uwapangilwa ni vizao vya tuncindu, na keke uwapangilwa ni myangazi iyume.
4 Lyene wasonsile Aina Levi yamwi aakuti yaombela pa nkoleelo ya Mbokosi ya Upangano yakwe Yeova, kucindika, kutaizya, nu kulumbanya Yeova Leza wa Ina Izlaeli.
5 Asafu wali ali mukalamba, wakwe ciili wali a Zekaliya, nupya Yeiyeli, Syemilamoti, Yehiyeli, Matitiya, Eliabu, Benaya, Obedi-edomu, na Yeiyeli yalizyanga ya banjo na mazeeze; Asafu nawe walizyanga iviwaya,*
6 nupya Benaya na Yaazieli ya simapepo yalizyanga mapenga lyonsi pa nkoleelo ya Mbokosi ya Upangano yakwe Leza wa cumi.
7 Ukwene ali wanda uno Devedi wasisile ulwimbo lwa kutaizya kuli Yeova nu kunena Asafu na ina yakwe ukuti iimbe pa muku wa kutandikilako, ulwakuti:
8 “Taizyini Yeova, lumbanyini izina lyakwe,Lekini vino wacita vimanyikwe uku yantu!
9 Mwimbilini, mulumbanyini umu nyimbo,Mwaelenganya* pa milimo yonsi ya maka ino wacita.
10 Mwauvwa icilumba api zina lyakwe ilya muzilo.
Lekini imyenzo ya yantu aakalonda Yeova isekelele.
11 Londini Yeova na maka yakwe.
Mwamulonda lyonsi.
12 Mwaiusya imilimo ikalamba ino wacita,Nu kwiusya ivizungusyo vyakwe nu upinguzi,
13 Mwe yana yakwe Izlaeli umuomvi wakwe,Mwe yana yakwe Yakobo asoololwe yakwe.
14 A Yeova Leza witu.
Upinguzi wakwe waya umu nsi yonsi.
15 Mwaiusya upangano wakwe manda pe,Ulayo uno walavile uku nkulo masauzandi,
16 Upangano uno wapangine na Abulahamu,Nu mulapo uno walafile kuli Isaki,
17 Mulapo uno walenzile ukuti upampamikwe kuli YakoboNupya uno walenzile ukuti uye upangano wa manda pe kuli Izlaeli,
18 Lino walanzile ati, ‘Ndakupeela impanga ya KenaniKuti iye impanga yako iya kwikalamo.’
19 Walanzile vii ala mutatala mwavula,Ee, ala mutatala mwavula nupya ala mucili aenyi umu mpanga.
20 Mwalulumbanga ukufuma uku mpanga yonga imuya uku mpanga yuze,Kufuma uku wene uu imuya uku wene uze.
21 Ataazumilizye umuntu ali wensi ukumucuzya,Lelo wakalipilanga ya mwene pa mulandu winu,
22 Ala akuti, ‘Uku yantu yane asoololwe mutalemako,Nupya mutacita iviipe kuli ya kasesema yane.’
23 Insi yonsi kiimbiile Yeova!
Mwamanyisya ukupususya kwakwe cila wanda!
24 Manyisyini ululumbi lwakwe uku nko,Ni milimo yakwe iya maka uku yantu yonsi.
25 Pano Yeova umukulu nupya uwalinga ukulumbanyiziwa.
Awino tulinzile ukutiina sana ukucila ya leza yauze.
26 Ya leza yonsi ayantu aa sile sile,Lelo Yeova u wapanzile mayulu.
27 Muno akaikala mwaya ululumbi nupya mwayemba;Maka nu luzango vyaya muno akaikala.
28 Peelini Yeova vino alinzile ukupeelwa mwe yantu mwensi,Peelini Yeova vino alinzile ukupeelwa pa mulandu nu lulumbi lwakwe na maka.
29 Lumbanyini izina lyakwe Yeova;Letini ica upe nu kuya pa nkoleelo yakwe.
Fukamilini Yeova mu vyakuzwala vya muzilo.*
30 Insi yonsi kizakaze!
Insi yapampamikwa itanga itenkanyiziwe.
31 Lekini mayulu yazange ni insi isansamuke;Manyisyini inko muti: ‘Yeova wataya umwene!’
32 Lekini yemba alulume na vyonsi ivyayamo.Lekini ivyalo na vyonsi ivyayamo visansamuke.
33 Pa nsita ili imwi kwene lekini imiti ya mu mpanga ipunde nu luzango pa nkoleelo yakwe Yeova,Pano akwiza umu kupingula insi.
34 Taizyini Yeova, pano umusuma;Kutemwa kwakwe ukwa cumi kukaikalilila manda pe.
35 Nupya landini muti, ‘Tupususye we Leza, kapususya witu,Tukolonganike nu kutupususya uku mfwa,Pakuti twataizya izina ilya muziloNu ku kulumbanya ni nsansa.
36 Si Yeova Leza wa Ina IzlaeliAlumbanyiziwe manda pe.’”
Lyene antu yonsi yalanzile iyati, “Ameni!”* nupya yalumbanyizye Yeova.
37 Lyene Devedi wasiile Asafu na ina yakwe pa nkoleelo ya Mbokosi ya Upangano yakwe Yeova kuti yaomba ukwaula ukuta, ukulingana ni milimo ino yaali nu kulaomba cila wanda.
38 Obedi-edomu na ina yakwe, yonsi pamwi 68, na Obedi-edomu mwana Yedutuni na Hosa yaali alinzi ya pa mpongolo;
39 Zadoki simapepo na ya simapepo yauze yaombelanga pa nkoleelo ya cikuulwa cakwe Yeova icayelile pa ncende ya muzilo uku Gibyoni
40 ala yakupeela malambo ya koca kuli Yeova lyonsi pa ulambo wa kupeelelapo malambo ya koca, katondo na manguzi, nu kucita vyonsi ivyalemvilwe umu masunde yakwe Yeova yano wapeezile Aina Izlaeli.
41 Yaali na Hemani na Yedutuni pamwi na aonsi asyala asoolwilwe ukulataizya Yeova, pa mulandu wakuti ukutemwa kwakwe ukwa cumi kukaikalilila manda pe.
42 Nupya Hemani na Yedutuni yaali nayo ala yakulizya mapenga, viwaya ni vya kulizizyako inyimbo vyuze ivyaomviwanga uku kulumbanya Leza wa cumi, nupya ya mwana Yedutuni yaombelanga pa mpongolo.
43 Lyene antu yonsi yaaswilile uku mang’anda yao, nupya Devedi waile umu kupaala amu ng’anda yakwe.
Mafutunoti
^ Vyela vino yakapumanya pa kulizya.
^ Nanti limwi, “mwalanda.”
^ Nanti limwi, “pa mulandu na vino waya sana uwa muzilo.”
^ Nanti “ciye vivyo kwene.”
