1 Milandu 17:1-27
17 Lino Devedi wikazile sile umwi sano lyakwe wanenyile Natani kasesema ati: “Nemo nkwikala umu ng’anda ya mikedali lelo Imbokosi ya Upangano yakwe Yeova ikwikala umwi tenti.”
2 Natani wanenyile Devedi ati: “Cita consi cino ukulonda, pano Leza wa cumi ali naawe.”
3 Pa wanda kwene uuwa usiku, Leza wanenyile Natani ati:
4 “Kanene Devedi umuomvi wane uti, ‘Yeova walanda wati: “Asi wewe ulankuulila ing’anda umwakuti naikala.
5 Pano ntatala nikalapo umu ng’anda ili yonsi kufuma pa wanda uno nafumizye Aina Izlaeli mu Ijipti kufika ni lelo, lelo nkaikala umu matenti nupya nkakuukakuuka.
6 Pa nsita yonsi ino napitanga na Ina Izlaeli yonsi, uzye natazile inena ya kapingula ya Ina Izlaeli yano nasoolwile ukuti yasakamala antu yane Aina Izlaeli, inti, ‘U mulandu ci uno mutankuulila ing’anda ya mikedali?’”’
7 “Lyene unene Devedi umuomvi wane uti, ‘Yeova wa maumba walanda wati: “Nakufumizye umu ncende ya mulemvwe muno wacemelanga imfwele, pakuti uye intunguluzi ya yantu yane Aina Izlaeli.
8 Nupya ndaya naawe konsi kuno ulaya, ndacimvya alwani yako yonsi; nupya ndalenga izina lyako ukulumbuka wa yantu aalumbuka umu nsi.
9 Ndasoolola incende iyakuti antu yane Aina Izlaeli yakikalemo nupya yalikalamo ukwaula ivili vyonsi ivya kuyapumvyanya; yatalayacuzya uku yantu aipe wakwe vino cali mpiti,
10 kufuma pa wanda uno natandike ukusonta ya kapingula pa yantu yane Aina Izlaeli. Nupya ndacimvya alwani yako yonsi. Nkukunena nu kuti, ‘Ne Yeova ndakukuulila ing’anda.’*
11 “‘“Lino ulafwa nu kuziikwa ukwaziikwa ivikolwe vyako, ndasoolola umwanako wenga ukufuma umu yana yako ukuya umwene, nupya ndalenga uwene wakwe ukuya ukome.
12 Aliwe alankuulila ing’anda nupya ndalenga uwene wakwe ukuya ukome manda pe.
13 Ndaya isi nawe alaya umwanane. Ntalata ukumulanga ukutemwa kwa cumi wakwe vino natiile ukulanga ukutemwa kwa cumi kuli wino wakukoleelile.
14 Ndamuleka ukuti aikala umu ng’anda yane na pa wene manda pe, nupya uwene wakwe ulayako manda pe.”’”
15 Lyene Natani wanenyile Devedi mazwi yaa yonsi ni cilolwa cii consi.
16 Devedi nawe wikazile pa nkoleelo yakwe Yeova nu kulanda ati: “Uzye nene weni, we Yeova Leza? Uzye amu lupwa lwane aaweni pakuti uncitile vyonsi vii?
17 Nupya we Leza, walanda na pa vilacitikila amu ng’anda ya muomvi wako uku nkoleelo sana, nupya we Yeova Leza ukandola wa muntu umucindame.
18 I vyani vino ne muomvi wako ningalanda kuli wewe pali vino watuncindamika lino wewe wamanya ningo?
19 We Yeova, pa mulandu na vino ukansakamala na pa mulandu nu kulonda kwako icaticilenga ucite vintu vyonsi vii ivikalamba nu kusokolola ukulu wako.
20 We Yeova, kutaya uwaya wakwe wewe, nupya kutaya Leza muze ukucila pali wewe; vyonsi vino tuvwa vikalenga tusininkizye icisinka cii.
21 Nupya u luko ci pano nsi ulwaya wa yantu yako Aina Izlaeli? We Leza wa cumi waile uyakulula pakuti yaye antu yako. Waipangiile izina pa mulandu ni milimo yako ikalamba, nu kuzinga inko ukufuma uku yantu yako yano wakulwile ukufuma umu Ijipti.
22 Walenzile Aina Izlaeli kuti yaye antu yako manda yonsi; nupya we Yeova, wizile uya Leza wao.
23 We Yeova si ulayo uno walavile uku muomvi wako na amu ng’anda yakwe uye uwa cumi manda yonsi, nupya ucite wakwe viivi kwene vino walavile.
24 Si zina lyako litwalilile ukuyako nu kucindikwa manda pe, pakuti antu yangalanda ukuti, ‘Yeova wa maumba Leza wa Ina Izlaeli, a Leza umu Izlaeli,’ nupya si uleke amu ng’anda yakwe Devedi umuomvi wako yatwalilile ukuyako.
25 Pano we Leza wane, watusokolwela ne muomvi wako ukuti ukulonda ukunkuulila ing’anda.* Ali mulandu uno ne muomvi wako nkupepa ipepo lii mu kusipa.
26 Lyene we Yeova, wewe uli Leza wa cumi, nupya watulaya ne muomvi wako ivintu vii visuma.
27 Fwandi si paala amu ng’anda yane ne muomvi wako, nu kutwalilila ukucita vivyo kwene manda pe, pano we Yeova, watuyapaala nupya ulatwalilila ukuyapaala manda pe.”
