1 Milandu 18:1-17
18 Lino papisile insita, Devedi walwisizye Aina Filisti nu kuyacimvya nupya wayaposile umusumba wa Gati ni mizi yonsi iyalimo.
2 Lyene wacimvizye Aina Moabu, nayo izile iyaya aomvi yakwe nupya yamutwalilanga umusonko.
3 Devedi wacimvizye Umwene Hadadeza uwa ku Zoba umupiipi na Hamati lino wayanga uku Luzi Lwa Yufuleti pakuti akatandike ukuteeka nako kwene.
4 Wamuposile maceleta 1,000, asilika 7,000 aakwelanga pa mfwalasi, alino na aapitanga ulwa pansi aali 20,000. Lyene Devedi walemalike imfwalasi zyonsi ukufumyako sile izili 100.
5 Lino Aina Silya aku Damasika yaile umu kwazwa Umwene Hadadeza uwa ku Zoba, Devedi wakomile Aina Silya 22,000.
6 Lyene Devedi wapanzile inkambi ya yasilika umu Silya, incende ya mu Damasika nupya Ina Silya izile iyaya aomvi yakwe; yamutwalilanga umusonko. Yeova wamulenganga ukucimvya konsi kuno waya.
7 Nupya Devedi waposile ivisyangu vyakwe goldi uku yaomvi yakwe Hadadeza nu kuvitwala uku Yelusalemu.
8 Devedi wasenzile koopa umwingi sana kufuma umu misumba yakwe Hadadeza, kuli kuti umusumba wa Teba nu musumba wa Kuni. Muli koopa wiyo, Solomoni wapanzilemo itanki lyakwe koopa, incesi ni viya vyakwe koopa.
9 Lino Umwene Tou* uwa ku Hamati uvwile ukuti Devedi watacimvya asilika yonsi aa Mwene Hadadeza uwa ku Zoba,
10 lilyo kwene sile watumile umwanakwe Hadolamu kuli Devedi pakuti akamulamuke nu kumutaizya pali vino walwisizye nu kucimvya Hadadeza (pano ilingi Hadadeza walwanga na Tou), nupya watwalile Devedi iviya vyakwe goldi vipusanepusane, vyakwe siuva, alino na vyakwe koopa.
11 Umwene Devedi wapeezile ivintu vivyo kuli Yeova kumwi na siuva na goldi vino waposile uku nko zii zyonsi, kuli kuti ku Ina Edomu, ku Ina Moabu, ku Ina Amoni, ku Ina Filisti nu ku Ina Amaleki.
12 Abisyai mwana Zeluya wakomile Aina Edomu 18,000 mu Mukonko wa Musilya.
13 Devedi wapanzile inkambi zya yasilika umu Edomu, nupya Aina Edomu yonsi izile iyaya aomvi yakwe. Yeova walenganga Devedi ukucimvya konsi kuno waya.
14 Devedi watwalilile ukuteeka Aina Izlaeli yonsi nupya wapingulanga antu yakwe yonsi mu mulinganya nu mu ulungami.
15 Yoabu mwana Zeluya u watungululanga asilika, nupya Yeosyafati mwana Ailudi u wasunganga ivyeo pali vino vyacitikanga,
16 Zadoki mwana Aitubi na Aimeleki mwana Abiata yaali aa simapepo, nupya Syavisya wali a kalemba.
17 Benaya mwana Yeoyada u watungululanga Aina Keleti na Ina Peleti. Nupya ya mwana Devedi yaali aa cilolo yakalamba.
Mafutunoti
^ Akaamwa nu kuti Toi pali 2 Samweli 8:9, 10.
