1 Milandu 21:1-30
21 Lyene Satana* wakatukiile Aina Izlaeli nu kutunka Devedi ukuti apende Aina Izlaeli.
2 Lyene Devedi wanenyile Yoabu ni ntunguluzi zya yantu ati: “Yangini mukapende Aina Izlaeli kufuma uku Belisyeba kufika uku Dani; lyene mwize muneene pakuti imanye impendwa yao.”
3 Lelo Yoabu walanzile ati: “Si Yeova avuzye antu yakwe imiku 100! Musambazi wane uzye antu yonsi, asi aomvi yako? U mulandu ci uno ukulondela ukucita icintu cii? U mulandu ci uno ukulonda ukuletela Aina Izlaeli intazi?”
4 Lelo amazwi ya mwene yakweti sana amaka ukucila mazwi yakwe Yoabu. Fwandi Yoabu wapisile nu kuya umu mpanga iya Izlaeli yonsi, lyene pa cisila waile uku Yelusalemu.
5 Yoabu wizile anena Devedi impendwa ya yantu aalemvilwe. Aina Izlaeli yonsi aonsi aali na ya panga yaali 1,100,000, aonsi amu Yuda nayo ali na ya panga yaali 470,000.
6 Lelo amu mutundu wakwe Levi na amu mutundu wakwe Benjamini yatalemvilwe, pano Yoabu ataatemilwe vino umwene walanzile.
7 Cintu cii casosizye sana Leza wa cumi, fwandi wafulwile Aina Izlaeli.
8 Lyene Devedi wanenyile Leza wa cumi ati: “Injembuka sana pa kucita icintu cii. Fwandi si unjelele ne muomvi wako pano incita icintu ca uwelewele sana.”
9 Lyene Yeova wanenyile Gadi uwalolelanga Devedi ivilolwa ati:
10 “Yanga kanene Devedi uti, ‘Yeova walanda wati: “Namakunena ivintu vitatu. Usoololepo conga cino ndinzile ukuleta pali wewe.”’”
11 Fwandi Gadi waile kuli Devedi nu kumunena ati: “Yeova walanda wati, ‘Soololapo,
12 uzye ndete icipowe umu mpanga pa myaka itatu, nanti alwani inu yace yamucimvye pa myezi itatu ale yakumukoma nu lupanga, nanti Yeova ace alete ulupanga pa manda yatatu, kuli kuti icikuko, muno malaika wakwe Yeova alonona impanga yonsi iya Ina Izlaeli?’ Elenganyapo ningo pakuti unene ivya kuyanena uwatantuma.”
13 Fwandi Devedi wanenyile Gadi ati: “Indi sana nu ulanda. Leka Yeova aliwe amfulule, pano wene wakwata sana uluse; kucila ukuti antu aliyo yankome.”
14 Lyene Yeova watumile icikuko uku Ina Izlaeli icakuti antu 70,000 aafwile.
15 Nupya Leza wa cumi watumile malaika kuti akonone umusumba wa Yelusalemu; lelo lino Yeova waweni ukuti malaika watandika ukonona umusumba uvwilile antu yakwe uluse, nupya wanenyile malaika uwakomanga antu ati: “Casila! Ponya ikasa!” Malaika wakwe Yeova waimi umupiipi nu lwano lwakwe Onani Umwina Yebusi.
16 Lino Devedi wakatwisye manso waweni malaika wakwe Yeova aimi pakasi ka nsi ni yulu ala alemile ulupanga atakonzolola ni ikasa ukulozya uku musumba wa Yelusalemu. Devedi na akalamba ya yantu yazwite ivyakuzwala vya kulangilamo ulanda, nupya yaisumvile pansi iyafupama.
17 Devedi wanenyile Leza wa cumi ati: “Uzye asi nene nalanzile ukuti yapende antu? Nene nayembwike; nupya nene naluvyanyizye; nomba i vyani vino imfwele zii izicita? We Yeova Leza wane, si leka ikasa lyako liye pali nene na pa ya mu ng’anda yakwe tata; lelo utaleta icikuko cii pa yantu yako.”
18 Lyene malaika wakwe Yeova wanenyile Gadi ukuyanena Devedi ukuti apangile Yeova ulambo pa lwano lwakwe Onani Umwina Yebusi.
19 Fwandi Devedi wapisile ukulingana na mazwi yano Yeova wanenyile Gadi.
20 Lyene Onani wapiliwike nu kulola malaika nupya ana yakwe 4 yano wali nayo yafisime. Pa nsita iiya Onani wapuulanga ingaano.
21 Lino Devedi wayanga kuli Onani, Onani wamuweni nupya lilyo kwene wafumile pa lwano aya afupama pa nkoleelo yakwe Devedi.
22 Devedi wanenyile Onani ati: “Nkazye incende ya lwano, pakuti nkuulilepo Yeova ulambo. Unkazye pa mutengo ukumanile. Pakuti icikuko icaticiza pa yantu cisile.”
23 Lelo Onani wanenyile Devedi ati: “Tola iye iyako, nupya si we musambazi wane ucite cino ukulola ukuti icisuma. Nupya nimakupeela ing’ombe izya kupeela ngi lambo lya koca ni ca kupuulilako icakuti uomvye pa kupemba umoto, alino ni ngaano izya kupeela ngu upe wa vyakulya. Nakupeela vii vyonsi.”
24 Lelo Umwene Devedi wanenyile Onani ati: “Awe, nimakala incende yii pa mutengo uukumanile, pano ntanga ntole icintu cako nu kucipeela kuli Yeova nanti ukupeela malambo ya koca ukwaula ukulipila icili consi.”
25 Fwandi Devedi wakazile incende kuli Onani pa masyekele* 600 yakwe goldi.
26 Nupya wakuulile Yeova ulambo pa ncende kwene iiya nu kupeelelapo malambo ya koca na malambo ya mutende, lyene wapefile kuli Yeova, nawe wamwaswike lino waleesile umoto pa ulambo wa kupeelelapo malambo ya koca.
27 Lyene Yeova wanenyile malaika ukuswilizya ulupanga umu cipata.
28 Lino Devedi waweni ukuti Yeova wasuka ipepo lyakwe pa lwano lwakwe Onani Umwina Yebusi, watwalilile ukupeelela malambo paapa kwene.
29 Lelo pa nsita iiya cikuulwa ca kupepelapo Yeova cino Mose wapanzile umu lwanga, nu ulambo wa kupeelelapo malambo ya koca vyali pa ncende ya kupepelapo uku Gibyoni.
30 Lelo Devedi ataayangako umu kuzya kuli Leza, pano watiinanga ulupanga lwakwe malaika wakwe Yeova.
Mafutunoti
^ Nanti limwi, “kakaanya.”
^ Syekele wenga angalingana na magilamu 11.4. Lolini Ivyeo na Vyuze pa B14.
