1 Milandu 22:1-19
22 Lyene Devedi walanzile ati: “Paa apalaya ing’anda yakwe Yeova Leza wa cumi nupya palaya ulambo uno Aina Izlaeli yalaapeelelapo malambo ya koca.”
2 Devedi watumile aakuti yakolonganike antu afumile uku mpanga zyuze aikalanga umu mpanga iya Ina Izlaeli, nupya wayapeezile umulimo uwa kuputola amawe nu kuyalinganya pakuti yace yaomviwe ukukuulila ing’anda yakwe Leza wa cumi.
3 Devedi wapekinye ivyela ivingi sana ivya kupangila insunga izya kuomvya uku visaasa vya pa mpongolo ni vya kupangila maincezi, nupya wapekinye na koopa umwingi sana aatanga apimwe,
4 ni mbao zya mikedali izitanga zipendwe, pano Aina Sidoni na Ina Tuli yamuletiile imbao zya mikedali izingi sana.
5 Nupya Devedi walanzile ati: “Solomoni umwanane u mwance nupya atamanyile imilimo, alino ing’anda yakwe Yeova iilinzile ukukuulwa ilazipa sana, icakuti ululumbi ulwa ng’anda iiyo nu kuyemba vilamanyikwa umu mpanga zyonsi. Acino nimamupekanyizizya ivya kuomvya.” Fwandi Devedi wapekinye ivya kuomvya ivingi sana lino atatala wafwa.
6 Nupya Devedi wamile Solomoni umwanakwe nu kumunena ukukuula ing’anda yakwe Yeova Leza wa Ina Izlaeli.
7 Devedi wanenyile Solomoni umwanakwe ati: “Nemo nalondanga ukukuula ing’anda apa kucindikila izina lyakwe Yeova Leza wane.
8 Lelo Yeova wanenyile ati, ‘Wakoma antu aingi sana nupya walwa sana inkondo. Utalakuula ing’anda apa kucindikila izina lyane, pano nalola ukuti wakoma antu aingi sana umu nsi.
9 Lola! Ulakwata umwana umonsi aalaya umuntu wa mutende, nupya ndalenga ukuti apuuze uku yalwani yakwe yonsi amuzinguluka, izina lyakwe alaya a Solomoni,* ndalenga Aina Izlaeli ukuya nu mutende nupya ndalenga umu mpanga yao ukuya mya umu manda yakwe.
10 Aliwe alankuulila ing’anda. Alaya umwanane nani ndaya isi. Ndalenga uwene wakwe pa Ina Izlaeli uye ukome manda pe.’
11 “Fwandi mwanane si Yeova aye naawe nupya utunguluke nu kukuulila Yeova Leza wako ing’anda wakwe viivi kwene vino walanzile ukuti avino ulacita.
12 Si Yeova akupeele mano nu kwiluka lino wakupeela maka pa Ina Izlaeli pakuti uwasunga masunde yakwe Yeova Leza wako.
13 Ulatunguluka ndi cakuti ukulondela sana masunde yano Yeova wanenyile Mose ukupeela Aina Izlaeli. Usipe nupya uye umukome. Utuvwa intete nanti ukutiina.
14 Imbombesya sana ukupekanya ivya kuomvya uku ng’anda yakwe Yeova, kuli kuti matalanti* 100,000 yakwe goldi na matalanti yakwe siuva 1,000,000, alino na koopa umwingi sana ni vyela ivitanga vipimwe, nupya impekanya ni mbao na mawe, lelo ulalundilapo na vyuze.
15 Ukweti antu aingi aamaombanga naawe, kuli kuti aakuputula mawe, aakukuula ukuomvya mawe, ya kaapenta na antu yonsi aamanya imilimo ipusanepusane.
16 Goldi, siuva, koopa ni vyela i vingi sana. Katuka utandike ukuomba nupya si Yeova aye naawe.”
17 Lyene Devedi wanenyile ya cilolo ya mu Izlaeli ukwazwa Solomoni umwanakwe, wayanenyile ati:
18 “Uzye Yeova Leza winu asi namwe, nupya uzye atamulenga ukupuuza umu ncende zyonsi? Pano wangavwile ukucimvya antu ya mu mpanga nupya impanga ikatungululwa na Yeova na antu yakwe.
19 Fwandi ipeelesyini ukulonda Yeova Leza winu ni myenzo inu yonsi nu umi winu onsi, nupya tandikini ukukuula icikuulwa ca muzilo cakwe Yeova Leza wa cumi, pakuti muce muwezye imbokosi ya upangano yakwe Yeova ni viya vya muzilo vyakwe Leza wa cumi umu ng’anda iilakuulwa pakuti izina lyakwe Yeova lyacindikilwamo.”
Mafutunoti
^ Ukufuma ukwi izwi lya Ciebele ilikapiliula ukuti “umutende.”
^ Italanti lyonga lyafinanga makilogilamu 34.2. Lolini Ivyeo na Vyuze pa B14.
