1 Milandu 23:1-32
23 Lino Devedi wakosile nupya ala ali mupiipi nu kufwa, wasonsile Solomoni umwanakwe ukuya umwene wa Ina Izlaeli.
2 Lyene wakolonganike ya cilolo yonsi amu Izlaeli, ya simapepo na Ina Levi.
3 Aina Levi aali ni myaka 30 nu kucilapo yapenzilwe; yonsi pamwi yaali 38,000.
4 Pali yaa aali 24,000 yangalilanga umulimo wa pa ng’anda yakwe Yeova, nupya aali 6,000 yaali intunguluzi na ya kapingula,
5 na alinzi ya pa mpongolo 4,000 alino na aali 4,000 alumbanyanga Yeova ukuomvya ivya kulizizyako inyimbo vino Devedi wapanzile nu kulanda ati, “Navipanga kuti vyaomviwa uku kulumbanyizizyako Leza.”
6 Devedi wapaatwile amu ndupwa zyakwe ya mwana Levi mu maumba ukulingana na muno yafumile, kuli kuti muli Gesyoni, muli Koati, na muli Melali.
7 Mu Ina Gesyoni mwali Ladani na Syimei.
8 Ya mwana Ladani yaali yatatu, kuli kuti Yehiyeli uwali intunguluzi ya lupwa na Zetamu na Yoweli.
9 Ya mwana Syimei yaali a Syelomoti, Hazieli, na Halani, yonsi pamwi yaali yatatu. Yakwene yaali ali mitwe ya ndupwa umu lupwa lwakwe Ladani.
10 Ya mwana Syimei yaali a Yaati, Zina, Yeusyi, na Beliya, yonsi pamwi yaali 4.
11 Yaati wali intunguluzi ya lupwa lyene ipakonka Ziza. Lelo vino Yeusyi na Beliya yataakweti ana aonsi aingi yayapendanga wa lupwa longa nupya yayapeezile umulimo uli umwi.
12 Ana yakwe Koati yaali a Amulamu, Izali, Hebuloni na Uzieli, yonsi pamwi yaali 4.
13 Ana aonsi yakwe Amulamu yaali a Aloni na Mose. Lelo Aloni wasoolwilwe ukulaombela umu muputule wa Muzilo Sana pamwi na ana yakwe, kulapeela malambo pa nkoleelo yakwe Yeova, kulamuombela nu kulapaalila antu umwi izina lyakwe lyonsi.
14 Lelo ana yakwe Mose umuntu wakwe Leza wa cumi yapendelwanga uku mutundu wa Ina Levi.
15 Ya mwana Mose aonsi yaali a Gesyomu na Elieza.
16 Muli ya mwana Gesyomu, Syebueli wali ali intunguluzi.
17 Mu lupwa lwakwe Elieza, Lehabiya wali ali intunguluzi; Elieza ataakweti ana aonsi na yauze, lelo ana aonsi yakwe Lehabiya yaali aingi sana.
18 Mu yana aonsi yakwe Izali, Syelomiti wali ali intunguluzi.
19 Ya mwana Hebuloni aonsi yaali a Yeliya intunguluzi, wakwe ciili wali a Amaliya, wakwe citatu wali a Yaazieli, nu walenga 4 wali a Yekameamu.
20 Ana aonsi yakwe Uzieli yaali a Mika intunguluzi, na wakwe ciili wali a Isyiya.
21 Ana aonsi yakwe Melali yaali a Maali na Musyi. Ana aonsi yakwe Maali yaali a Elieza na Kisyi.
22 Elieza wafwile lelo ataakweti ana aonsi, wakweti sile anaci. Fwandi ana aonsi yakwe Kisyi umwinakwe aliyo yayatwazile.
23 Ana aonsi yakwe Musyi yaali a Maali, Edeli, na Yelemoti, yonsi pamwi yaali yatatu.
24 Yaa ali ya mwana Levi aonsi aalemvilwe ukulingana ni ndupwa zyao, ukulingana ni ntunguluzi zya mutundu wao, yapenzilwe nu kulembwa mazina nupya yaombanga umulimo wa pa ng’anda yakwe Yeova ukutandika pa wa myaka 20 ukuya papela.
25 Pano Devedi walanzile ati: “Yeova Leza wa Ina Izlaeli watalenga antu yakwe ukupuuza, nupya alikala umu Yelusalemu manda pe.
26 Nupya Aina Levi yatalaasenda icikuulwa ca kupepelapo nanti iviya ivili vyonsi ivya kuomvya pa cikuulwa cico.”
27 Wakwe vino Devedi walanzile pa kusyalikizya, Aina Levi ukutandikila pa wa myaka 20 kuya papela yapenzilwe.
28 Umulimo wao wali uwa kwazwa ya mwana Aloni ukuombela pa ng’anda yakwe Yeova, kusakamala imisolo, miputule ya kuliilamo, nu kusangulula ivintu vyonsi ivya muzilo, alino nu kuomba imilimo yonsi iyalondekwanga pa ng’anda yakwe Leza wa cumi.
29 Yazwilizyanga ukupanga umukate wa muzilo, kupekanya fulaulo umusuma uwa upe wa vyakulya, mukate wa kuzulunzya uwaula icitutumusi, kupanga ya keke ukuomvya pani, kusaakanya umunya na mafuta, nu kupima vyonsi ivyaomviwanga uku upe wa vyakulya.
30 Cila katondo na manguzi yaalinzile ukulaya pa ng’anda yakwe Leza ala yakutaizya nu kulumbanya Yeova.
31 Yaazwilizyanga lyonsi lino malambo ya koca yakupeelwa kuli Yeova pa wanda wi Sabata, lino kwaloleka umwezi upya na pa nsita ya mutebeto ukulingana ni vyalemvilwe umu masunde, nupya vivyo kwene avino yacitanga lyonsi pa nkoleelo yakwe Yeova.
32 Yaombanga nu mulimo wao uwa kusakamala itenti lya kupepelapo ni ncende ya muzilo, nupya yazwilizyanga na ina yao ya mwana Aloni ukuombela pa ng’anda yakwe Yeova.
