1 Milandu 26:1-32
26 Vino yankinye aombelanga pa mpongolo aevi: mu Ina Kola mwali Mesyelemiya mwana Kore uwa mu yana aonsi yakwe Asafu.
2 Nupya ya mwana Mesyelemiya aonsi aeya: Iyeli wali a Zekaliya, wakwe ciili wali a Yediaeli, wakwe citatu wali a Zebadiya, uwalenga 4 wali a Yatinieli,
3 uwalenga 5 wali a Elamu, uwalenga 6 wali a Yeoanani, nu walenga 7 wali a Elieko-enani.
4 Nupya ana aonsi yakwe Obedi-edomu aeya: Iyeli wali a Syemaya, wakwe ciili wali a Yeozabadi, wakwe citatu wali a Yowa, uwalenga 4 wali a Sakali, uwalenga 5 wali a Netaneli,
5 uwalenga 6 wali a Amiyeli, uwalenga 7 wali a Isakali, nu walenga 8 wali a Peuletai; vii avino Leza wapaazile Obedi-edomu.
6 Nupya Syemaya umwanakwe wakweti ana aonsi aatungululanga indupwa zyao, pano yaali aonsi amaka nupya afikepo.
7 Ana aonsi yakwe Syemaya yaali a Otini, Lefaeli, Obedi na Elizabadi; nupya Eliu na Semakiya aina yao nayo kwene yaali aonsi afikepo.
8 Yonsi yaa yafumile muli ya mwana Obedi-edomu; yene pamwi na ana yao na ina yao yaali aonsi afikepo nupya alinge ukuomba umulimo, yonsi 62 yafumile muli Obedi-edomu.
9 Nupya Mesyelemiya wakweti ana aonsi na ina yakwe, yonsi pamwi yaali aonsi afikepo 18.
10 Hosa nawe uwafumile umu yana aonsi yakwe Melali wakweti ana aonsi. Syimuli wali intunguluzi, nanti cakuti ataali iyeli, isi wamusonsile ukuya intunguluzi,
11 wakwe ciili wali a Hilikiya, wakwe citatu wali a Tebaliya, nu walenga 4 wali a Zekaliya. Ana aonsi yonsi na ina yakwe Hosa yaali 13.
12 Pa maumba ya yalinzi ya pa mpongolo, intunguluzi zyapeezilwe imilimo ili imwi na ina yao iya kuombela pa ng’anda yakwe Yeova.
13 Fwandi yapendozile pakuti yamanye impongolo ino yali nu kulaombelako asi mulandu ulupwa ulunono nanti ulukalamba.
14 Cipendwilo ca ku ufumondaka caponiile pali Syelemiya. Pano icipendwilo cakwe Zekaliya umwanakwe uwali impandamano icenjele caponiile uku katutu.
15 Cipendwilo cakwe Obedi-edomu caponiile uku kaeya, nupya ana yakwe aonsi yapeezilwe umulimo wa kusakamala ukwa kusungila ivintu.
16 Cipendwilo cakwe Syupimu na Hosa caponiile uku uwondaka mupiipi ni Mpongolo ya Syaleketi iyayeelile umu museo uwaya ukupela; cila umba lya yalinzi lyalozyanyizye ni lyuze;
17 ku ufumondaka kwayanga Aina Levi 6; ku katutu nu ku kaeya kwayanga ali 4 cila wanda; nupya ukwa kusungila ivintu kwayanga yaili yaili;
18 ku ng’anda ya ncesi iya ku ufumondaka kwali alinzi 4 lwa ku museo, nupya yaili yaali pa ng’anda ya ncesi kwene.
19 Vikwene avino yankinye alinzi ya pa mpongolo kufuma mu yana ya Ina Kola na Aaina Melali.
20 Mu Ina Levi, Ahiya u wasakamalanga ivipao vya mu ng’anda yakwe Leza wa cumi ni vipao umwali ivintu vya muzilo.*
21 Mu yana yakwe Ladani kuli kuti ana aonsi afumile muli Gesyoni, mwali Yeeiyeli uwali pa ntunguluzi zya mu lupwa lwakwe Ladani
22 na ana yakwe aonsi kuli kuti Zetamu na Yoweli umwinakwe. Yasakamalanga ivipao vya pa ng’anda yakwe Yeova.
23 Kufuma umu Ina Amulamu, mu Ina Izali, mu Ina Hebuloni, nu mu Ina Uzieli,
24 Syebueli mwana Gesyomu mwana Mose u wali intunguluzi pa yantu asakamalanga umwa kusungila ivintu.
25 Aina yakwe Syebueli afumile muli Elieza yaali a Lehabiya, Yesyaya, Yolamu, Zikilai, na Syelomoti.
26 Syelomoti na ina yakwe yasakamalanga ivipao vyonsi umwali ivintu vya muzilo vino Umwene Devedi, akalamba ya mitundu, akalamba ya pa yantu masauzandi na pa yantu 100, na akalamba ya yasilika yapaatwile ukuya ivya muzilo.
27 Ivintu vino yapokolwile umu ulwi yavipaatwile ukuti viye ivya muzilo pakuti vyaomviwa uku ng’anda yakwe Yeova;
28 kumwi na vyonsi vino Samweli kalola wa vilolwa, Saulo mwana Kisyi, Abineli mwana Neli, na Yoabu mwana Zeluya yapaatwile ukuya ivya muzilo. Syelomiti na ina yakwe aliyo yasakamalanga vyonsi vino yapaatwile ukuya ivya muzilo.
29 Kufuma muli Izali, Kenaniya na ana yakwe yapeezilwe imilimo yuze isi ya pa ng’anda yakwe Leza; kuli kuti yaali intunguluzi nupya ya kapingula umu Izlaeli.
30 Kufuma umu Ina Hebuloni, Hasyabiya na ina yakwe, kuli kuti aonsi 1,700 afikepo yatungululanga Aina Izlaeli aku uwondaka wa Luzi Lwa Yodani mu milimo yonsi yakwe Yeova ni milimo ya mwene.
31 Kufuma mu ya mu lupwa lwakwe Hebuloni, Yeliya wali i ntunguluzi. Mu mwaka uwalenga 40 uwa kuteeka kwakwe Devedi, yalondelizye nu kuzana aonsi aamaka nupya afikepo mu musumba wa Yazeli mu Gilyadi.
32 Aina yakwe Yeliya, aonsi afikepo nupya intunguluzi zya ndupwa yaali 2,700. Fwandi Umwene Devedi wayasonsile ukulaangalila amu mutundu wakwe Lubeni, amu mutundu wakwe Gadi, na amuli afu wa mutundu wakwe Manase mu milimo yonsi yakwe Leza wa cumi ni milimo ya mwene.
Mafutunoti
^ Nanti “ivintu ivyapeezilwe kuli Leza.”
