1 Milandu 27:1-34
-
Aakuomba umulimo wa mwene (1-34)
27 Yaa ali maumba ya Ina Izlaeli aali umwi umba lya yasilika ya mwene, mu maumba yaa mwali akalamba ya ndupwa, intunguluzi zya pa yantu masauzandi ni zya pa yantu 100 alino ni ntunguluzi izyasakamalanga maumba yaa. Maumba yaa yalekanilanga cila mwezi umu mwaka; nupya umwi umba lyonga na lyonga mwayanga aonsi 24,000.
2 Uwangalilanga iumba lya kutandikilako umu mwezi wa kutandikilako wali a Yasyobeamu mwana Zabidieli, nupya umwi umba lyakwe mwali asilika 24,000.
3 Mu ya mu lupwa lwakwe Pelezi, Yasyobeamu u wali ali mukalamba pa ntunguluzi zya maumba izyapeezilwe umulimo umu mwezi wa kutandikilako.
4 Uwangalilanga iumba lyakwe ciili umu mwezi wakwe ciili wali a Dodai Umwina Ahoi, nupya Mikiloti u wali intunguluzi, umwi umba lyakwe mwali asilika 24,000.
5 Uwangalilanga iumba lyakwe citatu ilyaombanga umu mwezi wakwe citatu wali a Benaya mwana Yeoyada simapepo mukalamba, nupya umwi umba lyakwe mwali asilika 24,000.
6 Benaya wali umusilika uwa maka pi umba lya yasilika aiyele 30 nupya u wayangalilanga, nupya Amizabadi umwanakwe u watungululanga iumba lyakwe.
7 Uwangalilanga iumba ilyalenga 4 umu mwezi uwalenga 4 wali a Asaeli umwina wakwe Yoabu, nupya Zebadiya umwanakwe u wamupyanyile, mwi umba lyakwe mwali asilika 24,000.
8 Uwangalilanga iumba ilyalenga 5 umu mwezi uwalenga 5 wali a Syamuti Umwina Izila, nupya umwi umba lyakwe mwali asilika 24,000.
9 Uwangalilanga iumba ilyalenga 6 umu mwezi uwalenga 6 wali a Ila mwana Ikesyi Umwina Tekoa, nupya umwi umba lyakwe mwali asilika 24,000.
10 Uwangalilanga iumba ilyalenga 7 umu mwezi uwalenga 7 wali a Helezi Umwina Peloni uwa mu mutundu wakwe Efulemu, nupya umwi umba lyakwe mwali asilika 24,000.
11 Uwangalilanga iumba ilyalenga 8 umu mwezi uwalenga 8 wali a Sibekai Umwina Husya uwa mu Ina Zela, nupya umwi umba lyakwe mwali asilika 24,000.
12 Uwangalilanga iumba ilyalenga 9 umu mwezi uwalenga 9 wali a Abi-eza Umwina Anatoti uwa mu mutundu wakwe Benjamini, nupya umwi umba lyakwe mwali asilika 24,000.
13 Uwangalilanga iumba ilyalenga 10 umu mwezi uwalenga 10 wali a Maalai Umwina Netofa uwa mu Ina Zela, nupya umwi umba lyakwe mwali asilika 24,000.
14 Uwangalilanga iumba ilyalenga 11 umu mwezi uwalenga 11 wali a Benaya Umwina Pilatoni uwa mu yana yakwe Efulemu, nupya umwi umba lyakwe mwali asilika 24,000.
15 Uwangalilanga iumba ilyalenga 12 umu mwezi uwalenga 12 wali a Helidai Umwina Netofa uwa mu lupwa lwakwe Otinieli, nupya umwi umba lyakwe mwali asilika 24,000.
16 Intunguluzi zya mitundu ya Ina Izlaeli aezi: Mu mutundu wakwe Lubeni, Elieza mwana Zikilai u wali intunguluzi; mu mutundu wakwe Simyoni, a Syefatiya mwana Maaka;
17 mu mutundu wakwe Levi, a Hasyabiya mwana Kemueli; mu lupwa lwakwe Aloni, a Zadoki;
18 mu mutundu wakwe Yuda, a Eliu wenga pa ina yakwe Devedi; mu mutundu wakwe Isakali, a Omuli mwana Mikaeli;
19 mu mutundu wakwe Zebuluni, a Isyimaya mwana Obadiya; mu mutundu wakwe Nafutali, a Yelimoti mwana Aziliyeli;
20 mu mutundu wakwe Efulemu, a Hosyia mwana Azaziya; muli afu wa mutundu wakwe Manase, a Yoweli mwana Pedaiya;
21 muli afu wa mutundu wakwe Manase uwa mu Gilyadi, a Ido mwana Zekaliya; mu mutundu wakwe Benjamini, a Yaasieli mwana Abineli;
22 mu mutundu wakwe Dani, a Azaleli mwana Yeloamu. Yakwene aali ya cilolo mu mitundu ya Ina Izlaeli.
23 Devedi ataapenzile aali ni myaka 20 ukwiza pansi, pano walanga Yeova walaya ukuti Aina Izlaeli yali nu kuvula wa ntanda zya mwi yulu.
24 Walanga Yoabu mwana Zeluya watatandika ukupenda antu, lelo ataamazile; pano Leza wasokiile Aina Izlaeli pa mulandu nu kupenda kuu, nupya impendwa iiyo itaalemvilwe umwi lyasi lya mpiti ilya Mwene Devedi.
25 Azimaveti mwana Adiyeli u wangalilanga ivipao vya mwene. Yonatani mwana Uziya u wangalilanga ivikuulwa umwa kusungila ivintu ivyali umu mpanga, mu misumba, mu mizi na muze umwa kusungila ivintu.
26 Ezili mwana Kelabu u wangalilanga alimanga ivyalo.
27 Syimei Umwina Lama u wangalilanga ivyalo vya myangazi; Zabidi Umwina Sifu nawe wangalilanga kuno yasungilanga waini.
28 Baali-hanani Umwina Gedeli u wangalilanga ivyalo vya miolivi ni miti ya masamvu mu Syefela; Yoasyi nawe wangalilanga ukwa kusungila mafuta.
29 Syitilai Umwina Syaloni u wangalilanga ing’ombe zino yacemelanga umu Syaloni; Syafati mwana Adilai nawe wangalilanga ing’ombe zino yacemelanga umu mikonko.
30 Obili Umwina Isumaeli u wangalilanga ingamila; Yedeiya Umwina Melonoti nawe wangalilanga ya punda.
31 Yazizi Umwina Hagili wangalilanga imfwele ni mbuzi. Yonsi yaa aliyo yangalilanga ivyuma vyakwe Devedi.
32 Yonatani umwipwa wakwe Devedi wali i mpandamano, umonsi uwilukanga nupya wali a kalemba, Yehiyeli mwana Hakimoni nawe wasakamalanga ana ya mwene.
33 Aitofeli wali impandamano ya mwene, Husyai Umwina Aliki nawe wali a cuza wa mwene.
34 Pa cisila cakwe Aitofeli, Yeoyada mwana Benaya na Abiata aliyo iizile iyaya impandamano; nupya Yoabu wali umukalamba wa yasilika ya mwene.
