1 Milandu 28:1-21
28 Lyene Devedi wakolonganike ya cilolo yonsi amu Izlaeli uku Yelusalemu, kuli kuti ya cilolo ya mitundu, ntunguluzi zya maumba aombelanga umwene, ntunguluzi zya pa yantu masauzandi ni zya pa yantu 100, asakamalanga ivyuma vyonsi ivya mwene kumwi ni viteekwa vyakwe alino na asakamalanga anakwe kumwi na aomvi ya kwi sano alino na aonsi amaka nupya afikepo.
2 Lyene Umwene Devedi wimilile nu kulanda ati:
“Uvwini kuno mwe inane na mwe yantu yane. Nalondanga ukukuula ing’anda umwakuti imbokosi ya upangano yakwe Yeova iyaikala na kuti aino Leza alyatapo ingazo, nupya napekinye ukuti nkuule.
3 Lelo Leza wa cumi wanenyile ati, ‘Utalakuula ing’anda apa kucindikila izina lyane, pano waalwa sana inkondo nupya waakoma antu aingi.’
4 Lelo Yeova Leza wa Ina Izlaeli wansoolwile ukufuma muli yonsi amu ng’anda yakwe tata kuti inje umwene pa Ina Izlaeli amanda pe, wasoolwile Yuda ukuya intunguluzi, nupya umu lupwa lwakwe Yuda wasoolwile ulupwa lwakwe tata, nu mu yana yakwe tata wasoolwile nene ukuya umwene wa Ina Izlaeli yonsi.
5 Na pa yana yane yonsi aonsi yano Yeova wampeela, wasoolwile Solomoni kuti aikale pa cilimba ca wene cakwe Yeova pakuti ateeka Aina Izlaeli.
6 “Wanenyile ati, ‘Solomoni umwanako aliwe alankuulila ing’anda ni misolo pano namusoolola ukuya umwanane nupya nani ndaya isi.
7 Ndalenga uwene wakwe ukuya ukome amanda pe ndi cakuti alauvwila masunde yane wakwe vino akucita ndakai.’
8 Fwandi nkulanda apa nkoleelo ya yantu yakwe Yeova Aina Izlaeli ukuti: Mwamanya nu kulondela masunde yakwe Yeova Leza winu pakuti mukikale umu mpanga isuma nu kuleka ana inu yakapyane impanga iiyo amanda pe.
9 “Naawe Solomoni mwanane, umanye Leza wakwe tata wako nupya uwamuombela nu mwenzo onsi ni nsansa, pano Yeova akalola umu myenzo ya yantu yonsi nupya akamanya vyonsi vino yakwelenganya. Nga wamulonda alaisokolola kuli wewe, lelo nga wamusya alakukana amanda pe.
10 Lola, Yeova watakusolola kuti ukuule ing’anda ya muzilo. Sipa nu kuomba umulimo.”
11 Lyene Devedi wapeezile Solomoni umwanakwe pulani uwa muputule wa pa wingililo ni miputule yuze ipusanepusane, miputule ya kusungilamo ivintu, miputule ya papela, miputule ya mukasi, nu muputule wa kwelelelwamo imembu.
12 Wamupeezile na pulani yakwe vyonsi vino umupasi wakwe Leza wamusokolwelile pali vino imisolo ya pa ng’anda yakwe Yeova yali nu kupangwa, pa miputule yonsi iya kuliilamo, pa vipao vya mu ng’anda yakwe Leza wa cumi na pa vipao umwali nu kuya ivintu vya muzilo;
13 wamunenyile na vino maumba yakwe ya simapepo yaali nu kuya na maumba ya Ina Levi, wamunenyile na pa milimo iyaali nu kulaombwa pa ng’anda yakwe Yeova alino na pa viya vyonsi ivyali nu kulaomviwa umu ng’anda yakwe Yeova;
14 walanzile na pali goldi iyaali nu kuomviwa, kuli kuti goldi iyaali nu kuomviwa uku viya vyonsi ivyali nu kulaomviwa umu milimo ipusanepusane, nupya walanzile na pa kufina kwa viya vyonsi vyakwe siuva ivyali nu kulaomviwa umu milimo ipusanepusane;
15 na pa kufina kwa vya kuteekapo ya lampi vyakwe goldi ivipusanepusane na ya lampi, alino na pa kufina kwa vya kuteekapo ya lampi vyakwe siuva ivipusanepusane na ya lampi;
16 na pa kufina kwakwe goldi uwali nu kuomviwa kuli ya tebo ya kwikapo umukate wa muzilo, alino na pa kufina kwakwe siuva uwali nu kuomviwa kuli ya tebo yakwe siuva,
17 pali ya foloko, imbale, insembo zyakwe goldi umwengululwe ningo, na pa kufina kwa mbale zyakwe goldi izinono, alino na pa kufina kwa mbale zyakwe siuva izinono.
18 Wamunenyile na pa kufina kwakwe goldi umwengululwe ningo uwa kuomvya uku ulambo wa kocelapo ivinunkile, nu wa kuomvya kuli ya kelubi yakwe goldi aakonzolwile mapa yao nu kuvimba imbokosi ya upangano yakwe Yeova, aimililangako iceleta lyakwe Leza.
19 Devedi walanzile ati: “Yeova wantungulwile nu kumpeela amano aakulemba vyonsi vii pali pulani.”
20 Lyene Devedi wanenyile Solomoni umwanakwe ati: “Usipe nupya uye umukome nu kuomba umulimo. Utuvwa intete nanti ukutiina pano Yeova Leza, Leza wane ali naawe. Atalakusya nanti ukukutazyela lelo alaya naawe ukufikila umulimo onsi uwa pa ng’anda yakwe Yeova uce usile.
21 Nupya maumba yakwe ya simapepo na Ina Levi aakuomba imilimo yonsi iya pa ng’anda yakwe Leza wa cumi aeya. Watukwata aomvi aipeelesye nupya amanyile imilimo ipusanepusane pamwi na ya cilolo na antu yonsi aalaomba vyonsi vino ulaayanena.”
