1 Milandu 5:1-26
5 Iyeli lyakwe Izlaeli wali a Lubeni. Lelo pa mulandu wakuti waizi nu muci wakwe isi* yamuposile insambu zyakwe izya uyeli nu kupeela ya mwana Jozefu umwana wakwe Izlaeli, fwandi lino yalumbulanga mazina ya mu lupwa lwao ukulingana na muno yakonkaniile Lubeni ataalumbwilwe ngi iyeli.
2 Nanti cakuti Yuda wacizile aina yakwe nupya muli aliwe umwafumile intunguluzi, insambu zya uyeli zyene zyapeezilwe kuli Jozefu.
3 Ana aonsi yakwe Lubeni iyeli lyakwe Izlaeli yaali a Hanoki, Palu, Heziloni, na Kami.
4 Umwana umonsi wakwe Yoweli wali a Syemaya, Syemaya wali a isi wakwe Gogi, Gogi wali a isi wakwe Syimei,
5 Syimei wali a isi wakwe Mika, Mika wali a isi wakwe Leaya, Leaya wali a isi wakwe Baali,
6 Baali nawe wali a isi wakwe Beela, wino Tigilati-pinesa umwene wa ku Asilya wasenzile umu uzya, wali intunguluzi mu ya mu mutundu wakwe Lubeni.
7 Aina yakwe Beela ukulingana ni ndupwa zyao muno yakonkaniile aeya: Yeiyeli u wali intunguluzi, Zekaliya,
8 na Bela mwana Azazi mwana Syema mwana Yoweli. Amu ng’anda yakwe Bela iikalanga uku Aloeli kufika nu ku Nebo nu ku Baali-meoni.
9 Ku ufumondaka incende yao yafisile nu kwatandikile ulwanga uku Luzi Lwa Yufuleti, pano iviteekwa vyao vyavuzile sana umu mpanga ya Gilyadi.
10 Mu manda yakwe Saulo yaile umu kulwisya Aina Hagili nupya yayacimvizye, lyene yatandike ukwikala umu matenti yao umu ncende yonsi iyaali uku ufumondaka wa Gilyadi.
11 Amu mutundu wakwe Gadi iikalanga umupiipi na amu mutundu wakwe Lubeni mu mpanga ya Basyani ukufika nu ku Saleka.
12 Mu Basyani, Yoweli u wali ali mukalamba, nupya palondelile Syafamu, Yanai, na Syafati.
13 Nupya aina yao aafumile umu mitundu yao yaali a Mikaeli, Mesyulamu, Syeba, Yolai, Yakani, Ziya, na Ebali, yonsi pamwi yaali 7.
14 Yaa yaali ali yana aonsi yakwe Abihaili mwana Huli mwana Yalowa mwana Gilyadi mwana Mikaeli mwana Yesisyai mwana Yaado mwana Buzi.
15 Ahi mwana Abidieli mwana Guni u wali intunguluzi ya mu mutundu wao.
16 Iikalanga umu Gilyadi, mu Basyani, nu mu mizi iyalimo, alino nu mu ncende ya mulemvwe yonsi iya Syaloni.
17 Yonsi kwene yalemvilwe ukulingana na muno yakonkaniile umu manda yakwe Yotamu umwene wa ku Yuda nu mu manda yakwe Yeloboamu* umwene wa ku Izlaeli.
18 Mu mutundu wakwe Lubeni, mutundu wakwe Gadi, na afu wa mutundu wakwe Manase mwali asilika ya maka 44,760 aasendanga ivisyangu na ya panga alino na maulapwa nupya yasambilile ivya kulwa inkondo.
19 Yaile umu kulwisya antu aikalanga uku Hagili, ku Yetuli, ku Nafisyi, nu ku Nodabu.
20 Lino yalwanga Leza wayavwile nupya walenzile yacimvye Aina Hagili na yonsi yano yaali nayo, wacisile vivyo pa mulandu wakuti yalenzile uwazwilizyo kuli aliwe lino yaali umu ulwi nupya yamutaile.
21 Yaposile iviteekwa vyao, kuli kuti ingamila 50,000, imfwele 250,000 na ya punda 2,000 nupya yasenzile na antu 100,000.
22 Antu aingi yakomilwe pa mulandu wakuti ulwi wali uwakwe Leza wa cumi. Nupya yatandike ukwikala umu mpanga yao ukufikila lino yasenzilwe umu uzya.
23 Aafumile muli afu wa mutundu wakwe Manase iikalanga umu mpanga iyafumilile uku Basyani ukuya uku Baali-helimoni nu ku Senili nu ku Mwamba wa Helimoni.Yaali aingi sana.
24 Intunguluzi zya mu mitundu yao aezi: Efeli, Isyi, Eliyeli, Aziliyeli, Yelemiya, Hodaviya, na Yaadieli; yaali asilika ya maka, aonsi amanyikwe sana nupya intunguluzi zya mitundu yao.
25 Yataali acumi kuli Leza wa vikolwe vyao nupya yaombelanga ya leza ya yantu ya mu mpanga zino Leza ononyile.
26 Fwandi Leza wa Ina Izlaeli walesile ukuti Pulu, kuli kuti Tigilati-pinesa umwene wa ku Asilya akasende amu mutundu wakwe Lubeni, amu mutundu wakwe Gadi, na afu wa mutundu wakwe Manase umu uzya nupya wayatwazile uku Hala, ku Haboli, ku Hara, nu ku luzi lwa Gozani kuno yaya ukufika na ndakai.
