1 Samweli 10:1-27
10 Lyene Samweli watozile ibotolo lya mafuta nu kwitulwila Saulo pa mutwe. Wamutonswile nu kumunena ati: “Uzye Yeova atakusoolwile ukuya intunguluzi ya yantu yakwe?
2 Ilelo nga wafuma pano, umazana aonsi yaili mupiipi ni lindi lyakwe Lakeli mu mpanga yakwe Benjamini pa Zeliza nupya yamaya yakakunene yati, ‘Ya punda yano waile umu kulonda yaloleka, nupya ya tata yako ilila pali ya punda nu kutandika ukusakamala pali wewe. Yakulanda yakuti: “Nimacita uli pa mwanane?”’
3 Uye ukapite ukufuma papo ukafike pa cimuti cikulu ca mu Taboli, pano umaya ukazane aonsi yatatu yakuya uku Betele kuli Leza wa cumi, wenga asenzile imbuzi zitatu, muze nawe asenzile imikate itatu, nupya umuze nawe asenzile insembo ikulu umuli waini.
4 Yamaya yakakulamuke nu kukupeela imikate iili, nupya ulinzile ukutola imikate iiyo.
5 Pa cisila cakwe cico uye uku mwamba wakwe Leza wa cumi kuno umaya ukazane iumba lya yasilika Aina Filisti. Nga wafika umu musumba, umaya ukazane iumba lyakwe ya kasesema yakufuma uku cifulo ca kupepelapo, ala antu iyayakoleelela yakuyalizizya mabanjo, tungoma, mitolilo, na mazeeze lino yakusesema.
6 Umupasi wakwe Yeova umaya ukaye pali wewe nupya wayatandika ukusesema pamwi nayo nu kuya wa muntu muze.
7 Ndi cakuti vimanyililo vii vyacitika, ukacite consi cino ungakwanisya, pano Leza wa cumi ali naawe.
8 Lyene ukoleele uku Giligali nupya ndakuzana kuuku kwene lino indiza umu kupeela malambo ya koca na malambo ya mutende. Ulinzile ukuloleela pa manda 7 kufikila ince nize. Lyene ndakunena vino ulinzile ukucita.
9 Lino Saulo wapiliwike sile nu kusya Samweli, Leza watandike ukusenula umwenzo wakwe ukuya wa mwenzo wa muntu muze, nupya ivimanyililo vii vyonsi vyacitike pa wanda kwene uuwa.
10 Fwandi yafumile kuuku nu kuya uku mwamba, nupya iumba lyakwe ya kasesema lyamukomenkinye. Lilyo kwene sile umupasi wakwe Leza wizile pali aliwe nupya watandike ukusesema pamwi nayo.
11 Lino yonsi aamumanyile mpiti yaweni akusesema pamwi na ya kasesema, yatandike ukulanzyanya iyati: “I cani caticicitika kuli mwana Kisyi? Uzye Saulo nawe a kasesema?”
12 Lyene umuntu umwi papa kwene walanzile ati: “Nga ya kasesema asyala aamwana weni?” Ali cino kwayela imvwango iyakuti: “Uzye Saulo nawe kwene a kasesema?”
13 Lino wamazile ukusesema waile uku cifulo ca kupepelapo.
14 Pa cisila lupwa wakwe isi wakwe Saulo uzizye Saulo nu muomvi wakwe ati: “Mwaile kwi?” Nawe waswike ati: “Twaile umu kulonda ya punda, nomba lino twaweni ukuti tusikuyalola, twaile kuli Samweli.”
15 Lupwa wakwe isi wakwe Saulo uzizye ati: “I vyani vino Samweli wakunenyile?”
16 Nawe waswike ati: “Watunenyile ukuti ya punda iyaloleka.” Lelo Saulo atamunenyile vino Samweli wamunenyile pa kuya umwene.
17 Lyene Samweli wamile antu kuti yakolongane pa nkoleelo yakwe Yeova pa Mizipa,
18 nupya wanenyile Aina Izlaeli ati: “Vii avino Yeova Leza wa Ina Izlaeli walanda: ‘A nene nemuno namufumizye umu Ijipti nu kumupususya uku Ina Ijipti nu ku mawene yonsi amucuzyanga.
19 Nomba ilelo imukana Leza winu uwamupuswisye uku vintu vyonsi viipe nupya ivyamucuzyanga nu kulanda ukuti: “Tusontele uwakuti aatutungulula.” Fwandi lyene imililini pa nkoleelo yakwe Yeova mu mitundu nu mu ndupwa.’”
20 Fwandi Samweli walesile ukuti mitundu ya Ina Izlaeli yonsi ipalame nupya umutundu wakwe Benjamini u wasoolwilwe.
21 Lyene walesile umutundu wakwe Benjamini ukupalama nu kwimilila umu ndupwa, nupya ulupwa lwa Ina Matili u lwasoolwilwe. Nu mukusyalikizya Saulo mwana Kisyi u wasoolwilwe. Nomba lino yaile umu kumulonda yatamuzanyile.
22 Fwandi yuzizye Yeova iyati: “Uzye umuntu wii wataiza mpiti?” Yeova waswike ati: “Awiyo kuko watafisama umu viya.”
23 Lyene yasimwile nu kuyamufumya muno wafisime. Lino wimilile pakasi ka yantu wali u mutali kucila yonsi, yamufikanga sile umu viye.
24 Samweli wanenyile antu yonsi ati: “Uzye imulola wino Yeova watasoolola, kusi angalingana nawe?” Nupya antu yonsi yatandike ukupunda iyati: “Si kawala we mwene!”
25 Samweli wanenyile antu vino umwene alalonda ukufuma kuli aliyo nupya wavilemvile umwi buku nu kulika pa nkoleelo yakwe Yeova. Lyene Samweli wanenyile antu yonsi ukuswilila uku mwao.
26 Saulo nawe kwene waswilile ukwakwe mu Gibeya, nupya asilika yano Yeova watonsizye imyenzo yamusukilile.
27 Lelo antu yamwi awelewele yalanzile iyati: “Uzye wikwene aangatupususya?” Yamusuzile nupya yatamutwalile ica upe icili consi. Lelo atalanzilepo ivili vyonsi.
