1 Samweli 11:1-15
11 Lyene Nahasyi Umwina Amoni wizile nu kupanga inkambi ku kulwa na Ina Yabesyi amu Gileadi. Aonsi yonsi amu Yabesyi yanenyile Nahasyi iyati: “Pangana naswe icipangano, naswe tulakuombela.”
2 Nahasyi Umwina Amoni wayaswike ati: “Nimapangana sile namwe ndi cakuti mwazumila ukumutonkola manso akwi lunji. Namacita vii pakuti nzewanye Aina Izlaeli yonsi.”
3 Akalamba ya mu Yabesyi yamwaswike iyati: “Tupeele manda 7 pakuti tutume aakuyanena antu mu mpanga yonsi iya Izlaeli. Ndi cakuti kusi uwa kutupususya, tulacimba.”
4 Lino papisile insita, yano yatumile yafisile umu Gibeya muno mwikalanga Saulo nu kulanda amazwi yaa ala na antu yonsi yakuvwako nupya antu yonsi yatandike ukulila ala yakupunda.
5 Nomba Saulo wafumanga umu mpanga umu kucema ing’ombe, nupya Saulo uzizye ati: “I cani icikucitika uku yantu? U mulandu ci uno yakulilila? Fwandi yamunenyile amazwi yano Aina Yabesyi yatumile.
6 Umupasi wakwe Leza wizile pali Saulo lino uvwile amazwi yayo nupya wasosile sana.
7 Fwandi watozile ing’ombe ziili nu kuziputula umu vimpilinsya nupya watumile antu akutwala umu mpanga yonsi iya Izlaeli nu kulanda iyati: “Wensi aasikulondela Saulo na Samweli alinzile ukwenekela vii ukucitika uku ng’ombe zyakwe!” Nupya Yeova walenzile antu ukuya ni ntete nu mucinzi, na cico calenzile yaombele pamwi.
8 Lyene wayapenzile umu Bezeki nupya Aina Izlaeli yaali 300,000 na aonsi a Yuda yaali 30,000.
9 Nupya yanenyile aatumilwe iyati: “Vii avino muye mukanene aonsi Aina Yabesyi amu Gilyadi, ‘Mutondo nga kwakaya, mulatuulwa.’” Lyene yano yatumile yaile nu kuyanena aonsi Aina Yabesyi nupya Aina Yabesyi yasansamwike sana.
10 Lyene aonsi Aina Yabesyi yatiile: “Mutondo tuliza kuli mwemwe, nupya muce mutucite ivili vyonsi vino mwatemwa.”
11 Uwanda uwalondelilepo Saulo wankinye antu mu maumba yatatu, nupya ingile umu nkambi ya Ina Amoni ku macaca nu kuyayakomoola ukufikila lino kwakaya. Aapuswike yasalangine icakuti kutaali autukile pamwi yaili.
12 Lyene antu yanenyile Samweli iyati: “Aaweni aalandanga ukuti, ‘Saulo atanga aye umwene witu?’ Yaletini kuno tuyakome.”
13 Nomba Saulo walanzile ati: “Kusi umuntu alinzile ukukomwa ilelo, pano Yeova watapususya Aina Izlaeli.”
14 Pa cisila Samweli wanenyile antu ukuti: “Twapiteni uku Giligali pakuti nupya kwene tukalande ukuti Saulo u mwene.”
15 Fwandi antu yonsi yaile uku Giligali nupya yaile iika Saulo pa wene pa nkoleelo yakwe Yeova. Lyene yapeezile malambo ya mutende pa nkoleelo yakwe Yeova, nupya Saulo na Ina Izlaeli yonsi yazevizye ni nsansa.
