1 Samweli 12:1-25
12 Lyene Samweli wanenyile Aina Izlaeli yonsi ati: “Incita vyonsi vino mwanenyile nupya imusontela umwene uwakuti amuteeka.
2 Umwene aamamutungululanga aewi! Nemo iinkota nupya na anane muli nayo pakwene, nupya namutungulula ukufuma uku wance wane kufika na ndakai.
3 Anene pano. Nsinilini pa nkoleelo yakwe Yeova na pa nkoleelo ya musoololwe wakwe: Uzye a weni wino napoka ing’ombe nanti punda? Nanti uzye a weni wino nacenjezya nanti ukufyenga? A weni wino napokako mafisakanwa pakuti ntapingula ningo? Ndi cakuti avino nacita namamuwezezya.”
4 Nayo yaswike iyati: “Utatala watucenjezya nanti ukutufyenga nanti ukupoka cili consi uku muntu ali wensi.”
5 Fwandi wayanenyile ati: “Yeova a kambone pali mwemwe nu musoololwe wakwe a kambone pa wanda wi lelo ukuti mutazanyile umulandu uli onsi muli nene.” Nayo yatiile: “Ee, a kambone.”
6 Lyene Samweli wanenyile antu ati: “Yeova uwaomvizye Mose na Aloni nupya uwafumizye vikolwe vinu mu mpanga ya Ijipti ali kambone.
7 Fwandi lyene imililini, nani namamupingula pa nkoleelo yakwe Yeova, pa mulandu ni vilungame vyonsi vino Yeova wacita kuli mwemwe nu ku vikolwe vinu.
8 Lino Yakobo wafisile sile umu Ijipti nupya lino ivikolwe vinu vyatandike ukulilila kuli Yeova kuti avyazwe, Yeova watumile Mose na Aloni kuti yatungulule ivikolwe vinu kufuma umu mpanga ya Ijipti nu kuleka ukuti vyaikala umu mpanga kwene yii.
9 Lelo iilile Yeova Leza wao, nawe wayakazizye kuli Sisela umukalamba wa yasilika yakwe Hazoli nu ku Ina Filisti nu ku mwene wa ku Moabu, nayo yayalwisizye.
10 Nupya yaliliile kuli Yeova ukuti ayaazwe, yalanzile iyati, ‘Ituyembuka pano itusya Yeova nu kutandika ukuombela ya Baali ni vinkolanya vyakwe Asyitaloti, fwandi tupususye uku yalwani itu pakuti twakuombela.’
11 Lyene Yeova wamutumiile Yelubaali, Bedani, Yefuta, na Samweli nupya wamupuswisye uku yalwani inu aamuzingulwike pakuti muye acingililwe.
12 Lino mwaweni ukuti Nahasyi umwene wa Ina Amoni wiza ukuti amulwisye, mwatwalilile ukuneena ukuti, ‘Tukulonda umwene uwakuti atuteeka!’ nanti cakuti Yeova Leza winu ali Mwene winu.
13 Lyene umwene wino imuisoolwela nupya wino mwaleenzile aewi. Yeova watamusontela umwene uwakuti amutungulula.
14 Ndi cakuti mukutiina Yeova nu kumuombela nu kuvwa ukwi izwi lyakwe nupya musikupondokela vino Yeova akumunena, nupya mwensi kwene kumwi nu mwene aakumuteeka mukulondela Yeova Leza winu, ala mukucita ningo.
15 Lelo ndi cakuti mutakuvwila Yeova, nupya mukupondokela mazwi yakwe Yeova, ale Yeova alamufulula kumwi na avyazi inu.
16 Fwandi lyene imililini nu kulola icintu cii cikalamba cino Yeova amacita ale mukulola nako.
17 Uzye insita yii asi iya kuzombola ingano? Namapepa kuli Yeova pakuti alenge kuye ukupangalakansya ni mvula, lyene alino mumamanya ukuti mwacita icintu ciipe kuli Yeova, pa kuleenga ukuti mukwate umwene.”
18 Lyene Samweli wapefile kuli Yeova, nupya Yeova walenzile ukuti kuye ukupangalakansya ni mvula pa wanda uwo, icakuti antu yonsi yatiinyile sana Yeova na Samweli.
19 Nupya antu yonsi yanenyile Samweli iyati: “Tupepele kuli Yeova Leza wako swe yaomvi yako, tusikulonda ukufwa, pano itucita icintu na cuze iciipe kulunda pa membu zitu pa kuleenga umwene.”
20 Fwandi Samweli wanenyile antu ati: “Mutatiina. Imucita icintu cii iciipe. Mutata sile ukulondela Yeova, nupya mwaombela Yeova ni myenzo inu yonsi.
21 Mutaalondela ivintu ivya sile sile ivitanga vimwazwe nupya ivitanga vimupususye pano i vya sile sile.
22 Yeova atalatazyela antu yakwe pa mulandu ni zina ilikalamba, pano Yeova umwineco wamuleenga ukuya antu yakwe.
23 Pano ndi cakuti nata ukumupepelako ala nayembukila Yeova, namatwalilila ukumusambilizya umu nzila isuma nupya ilungame.
24 Mwatiina sile Yeova nu kumuombela umu cisinka ni myenzo inu yonsi, mwaiusya ivintu ivikalamba vino wamucitila.
25 Lelo nga mwatwalilila ukucita ivintu viipe uku mufulo, mulalowa mwensi kwene kumwi nu mwene winu.”
