1 Samweli 14:1-52
14 Wanda umwi Yonatani mwana Saulo wanenyile umuomvi wakwe uwamusendelanga ivyanzo ati: “Tiye tulambe tuye uku mbalama yuze ukuyelile asilika Aina Filisti.” Nomba atanenyile isi.
2 Saulo wapangiile inkambi kunzi ya musumba wa Gibeya umwisika lya cimuti ca mapomegilaneti mu Migiloni nupya wali na aonsi mupiipi na 600.
3 (Nupya Ahiya mwana Aitubi, umwina wakwe Ikabodi, mwana Finiasi, umwana wakwe Eli simapepo wakwe Yeova mu Syilo u wasendanga efodi.) Nupya antu yataamanyile ukuti Yonatani watapita.
4 Lyene pakasi ka ncende ziili zya kulambilapo zino Yonatani wezyanga ukulambilapo pakuti aye uku mbalama yuze ukwayelile Aina Filisti, pali ivimawe ivyakozile amino, conga cayelile uku lusansa longa ni cuze cali uku lusansa luze; izina lyakwe conga a Bozezi ni cuze naco a Sene.
5 Iciliwe conga cali i cipilala icayelile uku katutu ukulozya uku Mikimasyi, icuze naco cayelile uku kaeya ukulozya uku Geba.
6 Fwandi Yonatani wanenyile uwamusendelanga ivyanzo ati: “Tiye tulambe tuye uku mbalama yuze ukuyelile inkambi ya onsi aatazembululwa. Limwi Yeova angatwazwa, pano kusi icingalesya Yeova ukupususya ukuomvya antu aingi nanti anono.”
7 Uwamusendelanga ivyanzo waswike ati: “Cita vyonsi vino ukulonda. Twapita konsi kuno ungatemwa, nupya namakulondela konsi kuno ukulonda ukuya.”
8 Lyene Yonatani walanzile ati: “Tiye tulambe tuye ukuyelile aonsi yaya nupya tumaya tukaimanyisye kuli aliyo.
9 Ndi cakuti yaya yatunena yati, ‘Imililini kuko kwene katwize!’ Tumaya tukimilile nupya tusikuyafika kuli aliyo.
10 Nomba ndi cakuti yalanda yati, ‘Izini!’ Tumaya tukaye kuli aliyo pano Yeova amaya akayapeele kuli sweswe. Cii cimaya ali cimanyililo.”
11 Lyene yoili yaimanyisizye uku ya mu nkambi ya Ina Filisti. Aina Filisti yatiile: “Lolini! Aebele yatandika ukufuma umu viwina muno yaafisime.”
12 Fwandi aonsi aali umu nkambi yanenyile Yonatani nu wamusendelanga ivyanzo iyati: “Izini kuno, mumacilola!” Lyene Yonatani wanenyile uwamusendelanga ivyanzo ati: “Nkonke, pano Yeova amayapeela uku Ina Izlaeli.”
13 Yonatani watandike ukusela ala uwamusendelanga ivyanzo akumukonka; nupya Yonatani watandike ukuzanza Aina Filisti ala uwamusendelanga ivyanzo akumalilila yano Yonatani atakomanga.
14 Umu kuzanza kwa kutandikilako kuno Yonatani nu muomvi wakwe yazanzile, yakomile aonsi umupiipi na 20 apa ntamfu sile inono iingalingana na afu wakwe eka pano ing’ombe zingalima umu wanda onga.
15 Antu aali umu nkambi na asilika yonsi aali pa ulinzi yuvwile intete, kumwi sile na maumba yatatu aa yasilika azanzanga Aina Izlaeli. Insi yatandike ukutenkana nupya Leza u walenzile cico cicitike.
16 Alinzi yakwe Saulo umu Gibeya mu mpanga yakwe Benjamini yaweni ukuti cimvulunganya casalangana umu ncende zyonsi.
17 Saulo wanenyile antu yano wali nayo ukuti: “Pendini antu, pakuti mulole aasipo.” Lino yapenzile, yazanyile ukuti Yonatani nu wamusendelanga ivyanzo yasipo.
18 Lyene Saulo wanenyile Ahiya ati: “Leta Imbokosi yakwe Leza wa cumi umupiipi!” (Pano pa nsita iiya Aina Izlaeli aakweti Imbokosi ya Upangano yakwe Leza wa cumi.)
19 Nupya lino Saulo walandanga na simapepo, icimvulunganya umu nkambi ya Ina Filisti cayanga cikukulilako sile. Lyene Saulo wanenyile simapepo ati: “Ta vino ukucita.”
20 Saulo na antu yano wali nawe yakolongine nu kuya uku ulwi, lino yafisile yazanyile Aina Filisti yakukomana nupya kwali icimvulunganya icikalamba.
21 Nupya Aebele aali uku lusansa lwa Ina Filisti aikalanga nu mu nkambi ya Ina Filisti yatandike ukuya uku lusansa lwa Ina Izlaeli aali na Saulo na Yonatani.
22 Aina Izlaeli yonsi aile iyafisama umu ncende ya myamba iya Efulemu yuvwile ukuti Aina Filisti iyutuka, fwandi nayo kwene yawezile nu kutandika ukuzinganya Aina Filisti.
23 Pa wanda uuwa, Yeova wapuswisye Aina Izlaeli nupya yalwisyanyizye na Aina Filisti mpaka iyafika uku Beti-aveni.
24 Nomba Aina Izlaeli yatonsile sana pa wanda uuwa, pano Saulo walenzile antu kuzumilizya uku mulapo uno walanzile uwakuti: “Wensi amalya ivyakulya lino citatala cafika manguzi nupya lino ntatala nalandula uku yalwani yane amatiipwa!” Fwandi kusi umuntu ali wensi uwaliile icakulya.
25 Antu yonsi yaile umu mpanga, nupya kwali uci uwingi pa musili.
26 Lino antu yafisile umu mpanga, yaweni uci ukutona, nomba kutaali uwakomvile uci pano yatiinanga umulapo.
27 Nomba Yonatani atuvwileko lino isi walenzile antu ukulapa umulapo, fwandi watimpike intuwa ino wakweti umwi lela lya uci nu kumyanta nupya wizile akwata amaka.
28 Lyene umwi wamunenyile ati: “Ya tata yako iyalenga antu kuzumilizya uku mulapo uno iyalanda uwakuti, ‘Aye umutiipwe aamalya ivyakulya ilelo!’ Ali mulandu uno antu iyatontela sana.”
29 Lelo Yonatani watiile: “Ya tata iyaleta intazi ikulu umu mpanga. Lolini vino nakwata maka pa mulandu sile wakuti iimyanta utuuci utunono.
30 Ndi cakuti ilelo antu iyalya ivyakulya vino iyapokolola uku yalwani yao nga icazipisya sana! Pano Aina Filisti nga iyakomolwa sana.”
31 Pa wanda uuwa yatwalilile ukukomola Aina Filisti kufuma uku Mikimasyi kuyafika uku Aijaloni nupya antu yatonsile sana.
32 Fwandi antu yatandike ukusimwilila ukusampa ivintu vino yaposile uku yalwani yao, yaposile imfwele ni ng’ombe nu kuzikoma nupya yatandike ukulya inyama kumwi nu wazi.
33 Yanenyile Saulo iyati: “Antu yakuyembukila Yeova pa mulandu nu kulya inyama umuli uwazi.” Nawe wayanenyile ati: “Mwacita ivintu ukwaula ucisinka. Kunkulusyini iciliwe mucilete kuno likwene.”
34 Lyene Saulo watiile: “Yangini mukanene antu ukuti, ‘Cila muntu alinzile ukuleta ing’ombe ni mfwele nu kuzikomela pano nu kulya. Mutalinzile ukulya inyama umuli uwazi nu kuyembukila Yeova.’” Fwandi pa wanda kwene uuwa usiku cila muntu waleesile ing’ombe nu kuikomela papa kwene.
35 Nupya Saulo wakuulile Yeova ulambo. Uu wali ulambo wa kutandikilako uno wakuulile Yeova.
36 Saulo watiile: “Lekini tuye uku Ina Filisti usiku tukayazanze nu kuyapoka ivintu lino utatala waca. Tutamaya tukasye nanti awenga.” Nayo yatiile: “Cita vino ukulonda.” Lyene simapepo watiile: “Lekini tuzye Leza wa cumi pa ncende kwene yii.”
37 Nupya Saulo uzizye Leza ati: “Uzye nkonke Aina Filisti? Uzye umayapeela uku Ina Izlaeli?” Nomba Leza atamwaswike pa wanda uuwa.
38 Lyene Saulo walanzile ati: “Izini kuno mwe ntunguluzi zya yantu mwensi, londelezyini uluyembu ulwatilucitwa ilelo.
39 Pano nkulapa pali Yeova Leza wa umi uwapuswisye Aina Izlaeli, nanti cakuti a Yonatani umwanane u watacita icintu cico, alinzile ukufwa.” Nomba kutaali nanti awenga uwamwaswike.
40 Lyene wanenyile Aina Izlaeli yonsi ati: “Mumaya uku lusansa longa nupya umwanane Yonatani nani tumaya uku lusansa luze.” Antu yaswike Saulo iyati: “Cita vino ukulonda.”
41 Saulo waneyile Yeova ati: “We Leza wa Ina Izlaeli asuka ukuomvya tumimu!” Lyene Yonatani na Saulo yasoolwilwe, nupya antu yasyazile ukwaula umulandu.
42 Lyene Saulo watiile: “Pendolini pakuti mumanye uwatacita vii pali nene nu mwanane Yonatani.” Nupya Yonatani wasoolwilwe.
43 Saulo wanenyile Yonatani ati: “Neene, i vyani vino watucita?” Yonatani nawe wamwaswike ati: “Inamyanta sile utuuci utunono utwali tuli uku nsongo ya ntuwa ino inkweti. Injipekanya ukufwa!”
44 Saulo watiile: “Leza akufulule Yonatani nupya alunde napo ndi cakuti utamafwa.”
45 Lyene antu yanenyile Saulo iyati: “Uzye Yonatani alinzile ukufwa uwatalenga Aina Izlaeli kucimvya? Citalinzile ukuya vivyo! Tukulapa pali Yeova Leza wa umi, kusi nanti ulunyele longa lwakwe Yonatani ulumapona pansi, pano a Leza ali walenga acite icintu cii ilelo.” Fwandi antu yapuswisye Yonatani nupya ataakomilwe.
46 Fwandi Saulo watiile ukuzinganya Aina Filisti, nupya Aina Filisti yaile uku mwao.
47 Umwene Saulo wizile akwatisya amaka pa luko lwa Ina Izlaeli nupya walwisizye alwani yakwe yonsi amuzingulwike, wacimvizye Aina Moabu, Aina Amoni, Aina Edomu, aene ya ku Zoba na Ina Filisti; nupya konsi kuno waya wacimvyanga.
48 Nupya walwisizye Aina Amaleki nu kuyacimvya, wapuswisye na Ina Izlaeli ku yantu aayapokanga ivintu.
49 Ana yakwe Saulo aonsi a Yonatani, Isyivi, na Malikisyua. Nupya wakweti ana akazyana yaili; umukalamba wali a Melabu, umwance nawe wali a Mikala.
50 Umuci wakwe Saulo wali a Ainoamu mwana Aimaazi. Umukalamba wa yasilika yakwe Saulo wali a Abineli mwana Neli isi munono wakwe Saulo.
51 Kisyi wali a isi wakwe Saulo, nupya Neli isi wakwe Abineli wali a mwana Abiyeli.
52 Ulwi wakomiile sana Aina Filisti manda yonsi yano Saulo wateekanga. Ndi cakuti Saulo walola umonsi uwa maka nanti umusipe, wamwikanga umwi umba lyakwe ilya yasilika.
