1 Samweli 15:1-35
15 Lyene Samweli wanenyile Saulo ati: “Yeova wantumile ukwiza kusoolola kuti uye umwene pa Ina Izlaeli; fwandi uvwa vino Yeova watalanda.
2 Vii avino Yeova wa maumba walanda: ‘Ndapeela Aina Amaleki umulandu pa mulandu na vino yacisile uku Ina Izlaeli lino yayacuzizye pa cisila ca kufuma umu Ijipti.
3 Yanga kakome Aina Amaleki nu kuyonona kumwi na vyonsi vino yakwata. Utalinzile ukusya nanti acimwi; ulinzile ukukoma aonsi na anaci, ana nu tunya, ing’ombe ni mfwele, ingamali na ya punda.’”
4 Saulo wamile antu nu kuyapenda umu Telaimu: Asilika aapitanga ulwa pansi yaali 200,000 na aonsi amu mutundu wakwe Yuda yaali 10,000.
5 Saulo wafisile mu musumba wa Ina Amaleki nupya wayateyamile umupiipi nu mukonko.
6 Lyene Saulo wanenyile Aina Kenite ati: “Fumini mu Ina Amaleki pakuti ntamukomela pamwi nayo. Pano mwalangizye ukutemwa kwa cumi uku Ina Izlaeli yonsi pa nsita ino yafumile umu Ijipti.” Fwandi Aina Kenite yafumile umu Ina Amaleki.
7 Pa cisila, Saulo wakomile Aina Amaleki kufuma uku Havila kufika uku Syuli, incende iyapalamana na Ijipti.
8 Walemile Agagi umwene wa Ina Amaleki, lelo antu yonsi asyala yakomilwe uku lupanga.
9 Lelo Saulo na antu yakwe yatakomile Agagi nupya yatakomile imbuzi ni mfwele izisuma sana, ing’ombe, iviteekwa iviine, na ya suuku, alino na vyonsi visuma. Yatalondanga ukuvyonona. Lelo yononyile sile vintu ivyali vya sile sile nupya vino yatalondanga.
10 Lyene Yeova wanenyile Samweli ati:
11 Indanguluka pali vino nasoolwile Saulo ukuya umwene pano watata ukundondela nupya watata ukuvwila mazwi yane. Samweli wasosile sana nupya watwalilile ukulilila kuli Yeova usiku onsi.
12 Lino Samweli wazyusile katondotondo nu kuya kuli Saulo, antu yamunenyile iyati: “Saulo waile uku Kalimeli nupya kuuku kwene akuno waile waimikila icipilala. Lyene Samweli wapiliwike nu kuya uku Giligali.”
13 Lino Samweli wafisile kuli Saulo, Saulo wamunenyile ati: “Si Yeova akupaale. Incita ukulingana na mazwi yakwe Yeova.”
14 Nomba Samweli uzizye Saulo ati: “Nga imbuzi zii ni mfwele ni ng’ombe zino nkuvwa zikulila?”
15 Saulo walanzile ati: “Izifuma uku Ina Amaleki pano antu yatakomile imbuzi ni mfwele ni ng’ombe izisuma sana pakuti zipeelwe kuli Yeova Leza wako; lelo ivyasyala vyene ivyononwa.”
16 Lyene Samweli waswike Saulo ati: “Ta nu kulanda! Leka nkunene vino Yeova iwanena usiku.” Saulo watiile: “Landa tuvwe!”
17 Samweli wamuzizye ati: “Uzye asi wewe wailolanga ukuti utacindama lino wasoolwilwe ukuya intunguluzi ya mitundu ya Ina Izlaeli nupya lino Yeova wakusonsile ukuya umwene wa Ina Izlaeli?
18 Pa cisila Yeova wakutumile nu kukunena ati, ‘Yanga ukonone Aina Amaleki ayembu. Ukayalwisye mpaka uyalovye.’
19 U mulandu ci uno utuvwilile vino Yeova wakunenyile? Utukiile umu kusenda ivikwatwa vya yalwani nu kucita icintu ciipe kuli Yeova!”
20 Lelo Saulo wanenyile Samweli ati: “Nomba inuvwila vino Yeova wanenyile! Naile kuno Yeova wantumile nupya indeta Agagi mwene wa Ina Amaleki nakomile na Ina Amaleki.
21 Lelo antu yasenzile imfwele ni ng’ombe izisuma sana izyali nu kononwa pakuti ize yapeele malambo kuli Yeova Leza wako uku Giligali.”
22 Lyene Samweli wamuzizye ati: “Uzye Yeova akazangila umu malambo ya koca nu mu malambo yauze ukucila ukuvwila Yeova? Icuvwila cazipa ukucila ilambo nu kuvwa kuli Leza kwazipa ukucila ukupeela mafuta yakwe ya suuku;
23 pano ucipondoka icili cimwi nu luyembu lwa kucita maleele, cilumba naco icili cimwi nu kucita ivinjelengwe nu kupepa ivilubi. Pa mulandu wakuti watukana ukuvwila Yeova nawe watakukana ukutwalilila ukuya pa wene.”
24 Lyene Saulo wanenyile Samweli ati: “Injembuka, pano ntuvwilile isunde lyakwe Yeova na mazwi yako, natiinyile antu nu kuvwa kuli vino yalanzile.
25 Fwandi napaapata, njelele pa luyembu lwane nupya leka tuswilile swensi pakuti nkapepe kuli Yeova.”
26 Lelo Samweli wanenyile Saulo ati: “Nsikuswilila nawe, pano watukana ukuvwila mazwi yakwe Yeova, nawe Yeova watakukana ukutwalilila ukuya umwene wa Ina Izlaeli.”
27 Lino Samweli wapiliwike ukuti apita, Saulo wamulemile ukwisika li koti lyakwe ilyaula makasa, nalyo lyalepwike.
28 Lyene Samweli wamunenyile ati: “Yeova watapoka uwene uwa Ina Izlaeli ukufuma kuli wewe ilelo, nupya alaupeela uku muntu muze umucindame ukukucila.
29 Nupya Leza wa Papelapela uwa Ina Izlaeli atalaya uwa ufi nanti ukusenula amelenganyo yakwe, pano asi umuntu uwakuti angasenula amelenganyo yakwe.”
30 Lino Saulo uvwile vivyo walanzile ati: “Injembuka. Nomba napaapata, ncindike pa manso ya ntunguluzi zya yantu yane na pa Ina Izlaeli. Leka tuswilile swensi, nupya nimaya nkapepe kuli Yeova Leza wako.”
31 Fwandi Samweli waswilile na Saulo, nupya Saulo waile apepa kuli Yeova.
32 Nupya Samweli watiile: “Letini Agagi umwene wa Ina Amaleki kuno.” Lyene Agagi waile kuli aliwe ntete ntete nupya ala akusitooka, pano welenganyanga ukuti: ‘Cumi kwene yasikunkoma.’
33 Nomba Samweli walanzile ati: “Wakwe viivi kwene vino anaci yakaloosya pa mulandu wakuti wakomile ana yao uku lupanga lwako, avino na mayo wako alaya pa yanaci aalaloosya.” Lyene Samweli waputozile Agagi mu vimpilinsya pa nkoleelo yakwe Yeova ku Giligali.
34 Lyene Samweli waile uku Lama, Saulo nawe waile uku ng’anda ukwakwe uku Gibeya.
35 Samweli atatazile alolepo Saulo ukufika pa wanda uno Samweli wafwile, pano Samweli wali sana nu ulanda pa mulandu wakwe Saulo. Nupya Yeova walangulwike pa mulandu wakuti wasoolwile Saulo ukuya umwene wa Ina Izlaeli.
