1 Samweli 19:1-24
19 Lyene Saulo wanenyile Yonatani na aomvi yakwe yonsi ukuti walondanga ukukoma Devedi.
2 Pa mulandu wakuti Yonatani umwana wakwe Saulo watemilwe sana Devedi, wanenyile Devedi ati: “Ya tata yakulonda ukukukoma. Fwandi katondo ukacenjele nu kuya uku ncende icingililwe nu kufisama kuuku kwene.
3 Ndaya nkimilile umupiipi na ya tata kuno ulafisama. Ndaya nkalande nayo pali wewe, nupya nga namanya ivili vyonsi ndakunena.”
4 Fwandi Yonatani walanzile ivisuma pali Devedi kuli isi Saulo. Walanzile ukuti: “Umwene atalinzile ukupondokela Devedi umuomvi wakwe, pano wene atamuyembukila nupya vyonsi vino wamucitila vyamwazwa sana.
5 Wisile umi wakwe umu uzanzo pakuti akome Umwina Filisti, na cico calenzile ukuti Yeova apususye Aina Izlaeli yonsi. Mwailoliile vii nupya mwasansamwike sana. Nomba u mulandu ci uno mukulonda ukuyembukila umuntu wa kaele pa mulandu wakuti mukulonda ukukoma Devedi ukwaula umulandu?”
6 Saulo uvwilile Yonatani nupya walafile ati: “Nkulapa pali Yeova Leza wa umi, Devedi atamakomwa.”
7 Pa cisila Yonatani wamile Devedi nu kumunena ivintu vii vyonsi. Fwandi Yonatani watwazile Devedi kuli Saulo, nupya Devedi watwalilile ukuombela Saulo wakwe vino cali mpiti.
8 Lino papisile insita, Devedi waile umu kulwa na Ina Filisti, nupya wakomile Aina Filisti aingi, na asyala yutwike.
9 Lino Saulo watenzi umu ng’anda umwakwe ala alemile ni sumo, umupasi uwipe ukufuma kuli Yeova wizile pali aliwe ala Devedi akulizya ni zeeze.
10 Saulo wezizye ukulasa Devedi ni isumo ukupulinkanya umu ciumba, lelo Devedi wakwefile nupya Saulo walasile sile umu ciumba. Devedi utwike uwanda kwene uuwa usiku.
11 Lyene Saulo watumile akuyalinda ing’anda yakwe Devedi nu kumukoma katondo, nomba Mikala umuci wakwe Devedi wamunenyile ati: “Ndi cakuti ututwike usiku kwene uu, mutondo ulafwa.”
12 Lilyo kwene sile Mikala wazwilizye Devedi ukufumila pi windo pakuti autuke.
13 Mikala watozile icilubi nu kuciika pa bedi, nupya watozile icakuzwala icapangilwa na mavumbu ya mbuzi nu kuciika uku mitwe nupya wacivimvile ni cakuzwala.
14 Lyene Saulo watumile aakuyasenda Devedi, lelo Mikala walanzile ati: “Watalwala.”
15 Fwandi Saulo watumile aakuyalola Devedi nupya wayanenyile ati: “Mumuletele pali bedi yakwe kwene pakuti nize mukome.”
16 Lino yano Saulo watumile ingile, yazanyile icilubi pa bedi ni cakuzwala icapangilwa na mavumbu ya mbuzi uku mitwe.
17 Saulo uzizye Mikala ati: “U mulandu ci uno iwambepela nu kuleka umulwani wane autuke?” Mikala nawe waswike Saulo ati: “Iwanena wati, ‘Leka napita, pano nga cisi vivyo namakukoma!’”
18 Lyene Devedi utwike nu kuya kuli Samweli ku Lama. Wamunenyile vyonsi vino Saulo wamucisile. Lyene Devedi na Samweli yutwike nu kuyaikala uku Nayoti.
19 Lino papisile insita, yanenyile Saulo iyati: “Devedi ali ku Nayoti umu Lama.”
20 Papo kwene sile Saulo watumile aakuyalema Devedi. Lino yano Saulo watumile yaweni ya kasesema aikolo yakusesema nupya ala Samweli akuyatungulula, umupasi wakwe Leza wizile pali aliyo nayo yatandike ukusesema.*
21 Lino Saulo yamunenyile vii, watumile iumba lyuze, nalyo kwene lyaile ilitandika ukusesema. Fwandi Saulo watumile nupya iumba lyakwe citatu, nalyo kwene lyaile ilitandika ukusesema.
22 Nu mu kusyalikizya Saulo nawe kwene waile uku Lama. Lino wafisile pa ciwina icikulu ca kusungilamo manzi uku Seku, uzizye ati: “Aekwi kuno Samweli na Devedi yali?” Nayo yamwaswike iyati: “Yali uku Nayoti umu Lama.”
23 Lino Saulo wali pa lwendo ala akuya uku Nayoti umu Lama, umupasi wakwe Leza wizile pali aliwe nupya lino wapitanga watandike ukusesema mpaka lino wafisile uku Nayoti mu Lama.
24 Nupya wazuzile ivyakuzwala vyakwe nu kutandika ukusesema pa nkoleelo yakwe Samweli, waizi paapa kwene uwanda onsi nu usiku onsi ala azwite sile kamukasi.* Ali mulandu uno kwayela imvwango yakuti: “Uzye Saulo nawe kwene a kasesema?”
