1 Samweli 2:1-36
2 Lyene Hana wapefile ati:
“Nkazangila muli Yeova;Yeova aakampeela amaka.
Nkaasama pakuti nasuke alwani yane,Pano nkazangila umu kupususya kwako.
2 Kutaaya uwa muzilo wakwe Yeova,Kutaaya muze suka sile wewe,Kutaaya uwakoma wa ciliwe wakwe vino Leza witu waya.
3 Mutaaya ni cilumba lino mukulanda;Mutaleka mazwi ya kuitumika yafume umu tunwa twinu,Pano Yeova a Leza uwamanya ivintu vyonsi,Nupya aliwe akapima vino antu yakacita.
4 Maulapwa ya yantu amaka yakaavunolwa,Lelo antu atonte yakapeelwa maka.
5 Antu alyanga ningo yakuombela antu yauze pakuti yakwate ivyakulya,Lelo aali ni inzala yasi ni inzala.
Ing’umba yatikwata ana 7,Lelo uwakweti ana aingi watasyala sile.
6 Yeova akakoma nu kupeela umi;Akatwala ukwi Lindi,* nupya akatuutulula.
7 Yeova akalenga umuntu ukuya umupiina, nupya akalenga umuntu ukuya umukankala;Akalenga umuntu kusuulwa, nupya akalenga umuntu kucindamikwa.
8 Akakatusya antu asuulwe kufuma umu lukungu;Akakatusya apiina kufuma umwi twi,*Pakuti ikale pamwi ni vilolo,Nu kwikala pa vilimba vya mucinzi.
Incesi izyatungilila insi i zyakwe Yeova,Nupya apano wika insi.
9 Akacingilila antu yakwe aaya ni cisinka,Lelo antu aipe yalononwa umu mfinzi,Pano umuntu asicimvya uku maka yakwe.
10 Yeova alonona aakamulwisya;Ukali wakwe uliza pali aliyo wa kupangalakansya kwa nkuwa ukufuma umwi yulu.
Yeova alapingula amu nsi yonsi,Alapeela umwene wakwe amakaNupya alapeela umupakwe wakwe amaka.”
11 Lyene Elikana waswilile uku ng’anda ukwakwe uku Lama, lelo umulumendo wasyazile akuombela Yeova ala akwangalilwa na Eli simapepo.
12 Ya mwana Eli aonsi yali aipe, yatacindike Yeova.
13 Pa mulandu ni nsambu zino yakweti zya usimapepo, vino yacitanga uku yantu aevi: Lyonsi lino umuntu ali wensi waya umu kupeela ilambo, uwazwilizyanga simapepo wayanga ala watasenda cifoloko lino inyama ikupya,
14 watotanga muli beseni, mu mpoto ya misuka iili, iya musuka onga, nanti impoto ili yonsi ya kwelekelamo. Consi cino foloko yatota, simapepo watolanga. Vivyo kwene avino yacitanga umu Syilo uku Ina Izlaeli yonsi ayangako.
15 Nupya lino yatatala yoca mafuta ailambo lino umwi wataleta, uwazwilizyanga simapepo wayanga kuli wino wataleta ilambo nu kumunena ati: “Peela simapepo inyama iiyo pakuti aoce atamasenda ino umaeleka, amasenda sile iisi.”
16 Ndi cakuti uwataleta ilambo wamunena wati: “Leka tale yoce mafuta alino utole icili consi cino ukulonda,” ala amati: “Awe, mpeele ikwene; nga asi vivyo, namatola uku maka!”
17 Fwandi uluyembu lwakwe yano yazwilizyanga ya simapepo lwakuzile sana kuli Yeova, pano yatacindikanga malambo apeelwanga kuli Yeova.
18 Samweli waombelanga Yeova ala acili umwance, nupya wazwalanga icakuzwala cakwe efodi.
19 Nupya nyina wamusumilanga icakuzwala icaula makasa, wamutwalilanga cila mwaka nga yaya na iya mu kupeela ilambo lya pa mwaka.
20 Nupya Eli wapaazile Elikana na mamakwe nu kumunena ati: “Si Yeova akupeele umwana umu mwanaci wii aalapyanikizya pali wino wapeelwa kuli Yeova.” Lyene yaswilile uku ng’anda.
21 Yeova wiwisye Hana nupya watandike ukukwata ana, wakweti ana na yauze alumendo yatatu na akazyana yaili. Nupya Samweli watwalilile ukukula ala akuombela Yeova.
22 Eli wali umukote sana, lelo uvwile vyonsi vino ana yakwe yacitanga uku Ina Izlaeli yonsi na vino yacitanga uzelele na anaci aombelanga pa mulyango wi tenti lya kupepelapo.
23 Wayanenanga ati: “U mulandu ci uno mukucitila ivintu vya musango uu? Pano ivintu vino nkuvwa pali mwemwe ukufuma uku yantu yonsi i viipe.
24 Awe yanane ilyasi lino nkuvwa umu yantu yakwe Yeova litazifile.
25 Ndi cakuti umuntu wayembukila umuntu muze, umwi angamupaapatilako kuli Yeova;* nomba ndi cakuti umwi wayembukila Yeova, a weni angamupepelako? Nomba yatuvwilile isi pano Yeova walondanga ukuyakoma.
26 Lelo Samweli wakulanga umu cimo, nupya Yeova na antu yamutemilwe.
27 Muntu wakwe Leza waile kuli Eli nu kumunena ati: “Yeova walanda wati: ‘Uzye ntaisokolwile uku cikolwe cako nu ku lupwa lwa cikolwe cako lino yaali azya umu ng’anda yakwe Falao mu Ijipti?
28 Nupya icikolwe cako casoolwilwe ukufuma pa mitundu yonsi ya Ina Izlaeli pakuti caomba umulimo wa usimapepo nu kuya pa ulambo wane uku kupeela malambo, vinunkile, nu kusenda efodi pa nkolelo yane; nupya napeezile amu lupwa lwa cikolwe cako malambo yonsi akoca yano Aina Izlaeli yapeelanga.
29 U mulandu ci uno mukasaalwila malambo yane ni vya upe vino nalanzile ukuti antu yandetela umu ng’anda yane? U mulandu ci uno ukacindikila ana yako ukucila nene kupitila umu kulya ivimpilinsya ivisuma ivya malambo vino antu yane Aina Izlaeli yakapeela?
30 “‘Ali mulandu uno Yeova Leza wa Ina Izlaeli walandila wati: “Nalanzile ukuti amu lupwa lwako na amu lupwa lwa cikolwe cako yalaambombela lyonsi.” Nomba Yeova walanda wati: “Citalaya vivyo, pano aakancindika ayano ndacindika, lelo aakansaalula yalazewana.”
31 Manda yakwiza lino ndakupoka maka nu kupoka maka ya cikolwe cako pakuti kutaca kuye ali wensi umu lupwa lwako aalakota.
32 Lino ivintu vyazipila Aina Izlaeli ulalola umulwani mu ng’anda yane, nupya umu lupwa lwako mutalatala muye umukote.
33 Muntu wa mu lupwa lwako wino ndasya ukuti aombela pa ulambo wane alalenga manso yako yate ukulola nu kukuletela ulanda, lelo amu lupwa lwako asyala yalakomwa uku lupanga.
34 Nupya pakuti uce umanye ukuti vino nkulanda i vya cumi, ndakupeela icimanyililo cii: Ana yako yaili, kuli kuti Hofini na Finiasi yalafwa umu wanda onga.
35 Lyene ndaisoolwela simapepo wane uwa cisinka alaomba ukulingana na vino nkulonda; nupya ndalenga amu lupwa lwakwe kuomba usimapepo pa nsita itali, alaombela umupakwe wane manda yonsi.
36 Ali wensi aalasyala umu lupwa lwako aalaya kuli aliwe nu kumufukamila pakuti alipilwe impiya nu kupeelwa ivyakulya, nupya alalanda ati: “Napaapata mpeele umulimo umwi pa milimo ino ya simapepo yakaomba pakuti nkwate ivyakulya.”’”
Mafutunoti
^ Mu Ciebele: “Syeo.” Lolini Ulondolozi wa Mazwi.
^ Nanti limwi, “pa citumba.”
^ Nanti limwi, “Leza alamuvwangila.”
