1 Samweli 23:1-29
23 Mu kuya kwa nsita yanenyile Devedi iyati: “Aina Filisiti yakulwa na Ina Keila nupya yakuyapoka ivyakulya.”
2 Fwandi Devedi uzizye Yeova ati: “Uzye nkalwisye Aina Filisti?” Yeova wamwaswike ati: “Yanga kalwisye Aina Filisti nu kupususya Aina Keila.”
3 Lelo aonsi yakwe Devedi yamunenyile iyati: “Tuli ni ntete lino tuli umu Yuda, fwandi cimacilapo ndi cakuti twaya uku Keila umu kulwa na Ina Filisti.”
4 Nupya kwene Devedi uzizye kuli Yeova. Yeova wamwaswike ati yanga uku Keila, namalenga ukuti ucimvye Aina Filisti.”
5 Fwandi Devedi waile na onsi yakwe uku Keila nu kuyalwisya Aina Filisti, waposile iviteekwa vyao nu kukoma antu aingi sana nupya wapuswisye Aina Keila.
6 Lino Abiata mwana Aimeleki utukiile kuli Devedi uku Keila, wasenzile efodi.
7 Saulo yamunenyile iyati: “Devedi wataiza uku Keila.” Lyene Saulo watiile: “Leza watamupeela kuli nene pano wataiteya umwineco pa kwingila umu musumba uwakwata impongolo ni mifikilo.”
8 Fwandi Saulo wamile asilika yakwe yonsi kuti yaye uku ulwi nupya yaile uku Keila ku kuzanza Devedi na antu yakwe.
9 Lino Devedi uvwile ukuti Saulo watamupangila, wanenyile Abiata simapepo ati: “Leta efodi kuno.”
10 Lyene Devedi wapefile ati: “We Yeova Leza wa Ina Izlaeli, umuomvi wako watauvwa ukuti Saulo akwiza uku Keila uku konona umusumba pa mulandu wane.
11 Uzye intunguluzi* zya mu Keila zilampeela kuli Saulo? Uzye Saulo aliza wakwe vino umuomvi wako watauvwa? We Yeova Leza wa Ina Izlaeli, napaapata ngasuke.” Lyene Yeova waswike ati: “Aliza”
12 Devedi uzizye ati: “Uzye intunguluzi zya mu Keila zilampeela kuli Saulo pamwi na antu yane?” Yeova waswike ati: “Ee zilacita vivyo kwene.”
13 Lilyo kwene sile Devedi na onsi yakwe aali mupiipi na 600 yafumile umu Keila nupya yatandike ukupitana umu ncende izipusanepusane muno yalolanga ukuti yangacingililwa. Lino Saulo yamunenyile ukuti Devedi watautuka ukufuma umu Keila, ataamulondiile.
14 Devedi wikazile umu ncende izitale ukuyako, umu ncende ya myamba iya lwanga lwa Zifu. Saulo wamulondanga lyonsi lelo Yeova atapeezile Devedi kuli aliwe.
15 Lino Devedi wali umu lwanga lwa Zifu mu Holesyi wamanyile ukuti Saulo walondanga ukumukoma.
16 Lyene Yonatani mwana Saulo waile kuli Devedi ku Holesyi nupya waile amukomelezya ukutaila Yeova.
17 Wamunenyile ati: “Utuvwa intete pano ya tata yatalakuzana, ulaya umwene wa Ina Izlaeli, nani ndaya wakwe ciili pali wewe na ya tata yamanya icisinka cico.”
18 Lyene yoili yapangiine upangano pa nkoleelo yakwe Yeova, nupya Devedi wasyazile umu Holesyi, Yonatani nawe waswilile ukwakwe.
19 Pa cisila Aina Zifu yaile kuli Saulo uku Gibeya, nupya yamunenyile iyati: “Devedi wafisama uku Holesyi uku ncende izitale ukuyako izyayela umupiipi nu kumwitu, pa mwamba wa Hakila uku kaeya ka Yesyimoni.
20 Fwandi mwene nga ukulonda, ungiza insita ili yonsi ino ukulonda nupya tuliza tumupeele kuli wewe.”
21 Saulo nawe wayanenyile ati: “Si Yeova amipaale pali vino mwandanga icikuuku.
22 Pitangini mukalondelezye pano ayelile nu kumanya uwamuweni, pano yanena ukuti u mucenjele sana.
23 Mukalondelezye ningo incende zyonsi zino akafisamamo nupya mukandetele usininkizyo. Lyene ndiza impite namwe nupya ndi cakuti ali umu mpanga inu, ndamulonda umu ndupwa zyonsi zyakwe Yuda.”
24 Fwandi yakoleliile Saulo nu kuswilila uku Zifu, ala Devedi na antu yakwe yali umu lwanga lwa Maoni mu Alaba ku kaeya ka Yesyimoni.
25 Lyene Saulo na antu yakwe yaile umu kulonda Devedi. Lino Devedi yamunenyile vivyo utukiile umu ciliwe icayelile umu lwanga lwa Maoni nupya wikazile mumu kwene. Lino Saulo uvwile vivyo wakonsile Devedi umu lwanga lwa Maoni.
26 Lino Saulo wafisile uku mbali yuze iya mwamba, Devedi na antu yakwe nayo yali uku mbali yuze iya mwamba. Lyene Devedi wacincile kuti autuke Saulo, lelo Saulo na antu yakwe aalanga iyapalama kuti yaleme Devedi na antu yakwe.
27 Lelo umuntu umwi wizile kuli Saulo nu kumunena ati: “Twapiteni zuwa zuwa pano Aina Filisti iiza umu kuzanza impanga itu!”
28 Saulo watiile ukuzinganya Devedi nupya waile umu kulwa na Ina Filisti. Ali mulandu uno yatemela incende iiya ukuti Ciliwe ca Kupaatukana.
29 Lyene Devedi wafumileko nu kuyafisama uku ncende izitale ukuyako umu Eni-gedi.
Mafutunoti
^ Nanti limwi, “Aina Keila.”
