1 Samweli 24:1-22
24 Lino Saulo wafumile sile umu kuzinganya Aina Filisti, yamunenyile iyati: “Devedi ali umu lwanga ulwa Eni-gedi.”
2 Fwandi Saulo wasenzile aonsi 3,000 aasoolwilwe kufuma umu Ina Izlaeli yonsi nupya yaile umu kulonda Devedi na antu yakwe umu vimawe vya mu myamba umukaikala imbuzi zya myamba.
3 Saulo wingile umwi cele ilyayelile umupiipi ni citata ca mfwele icapangiilwe na mawe icali mu mbali ya museo kuti akayazwilizye, ala Devedi na antu yakwe iikala mukasi kasi ki cele.
4 Aonsi yakwe Devedi yamunenyile iyati: “Uwanda uu u wanda uno Yeova akukunena ukuti, ‘Inkupeela umulwani wako, nupya ungacita icili consi icingakuzipila.’” Fwandi Devedi wapisile cimyamya nu kuyaputula isempe ku cakuzwala cino Saulo wazwite icaula makasa.
5 Devedi watandike ukucula nu mwenzo pano waputwile isempe lya cakuzwala cakwe Saulo icaula makasa.
6 Wanenyile aonsi yakwe ati: “Ntalinzile ukucita icintu cii ku musambazi wane pano u musoololwe wakwe Yeova, Yeova atanga atemwe ndi cakuti nacita iciipe uku musoololwe wakwe Yeova.”
7 Fwandi Devedi walesizye antu yakwe lino walanzile mazwi yayo, nupya atalesile ukuti yazanze Saulo. Saulo nawe wafumile umwi cele muno wali nu kutwalilila nu lwendo lwakwe.
8 Lyene Devedi wafumile umwi cele nu kwama Saulo ati “Mwene wane!” Lino Saulo wapepiile icisila, Devedi wafukime nu kufupama pansi.
9 Devedi uzizye Saulo ati: “U mulandu ci uno mukuvwila uku yantu akulanda ukuti, ‘Devedi akulonda ukumucitila iciipe’?
10 Ilelo umuilolela vino Yeova watamupeela umu minwe yane umwi cele. Nomba lino umwi iwanena ukuti mukome, inamuvwila uluse nu kulanda ukuti, ‘Ntamacitila umusambazi wane iciipe, pano u musoololwe wakwe Yeova.’
11 Lolini ndemile isempe lya ku cakuzwala cinu caula makasa pano lino inaputula isempe ntali namukoma. Fwandi mungasininkizya ukuti ntakulonda ukumucitila iciipe nanti ukumupondokela, nupya ntamuyembukila icakuti mwandonda pakuti munkome.
12 Si Yeova apingule pali mwemwe nani, nupya si Yeova andandwile, lelo nemo ntalacita iciipe kuli mwemwe.
13 Wakwe viivi kwene vino ipinda lya mpiti likati, ‘Uku mwipe u kukafuma iviipe,’ lelo nemo ntalacita iciipe kuli mwemwe.
14 U mulandu ci uno umwene wa Ina Izlaeli akuzinganyizizya simbwa mufwe wakwe nene nupya ulupantila longa sile wakwe nene?
15 Si Yeova apingule, nupya apingule pali mwemwe nani, alalola nu kumpingwila umulandu nupya alampingula nu kumpususya kuli mwemwe.”
16 Lino Devedi wamazile ukulanda mazwi yaa, Saulo uzizye ati: “Devedi mwanane uzye izwi lii lino nkuvwa ilyako?” Nupya Saulo watandike ukulila umu kupongomoka.
17 Wanenyile Devedi ati: “Wewe mulungame ukuncila, pano watuncitila icisuma lelo nemo inkucitila iciipe.
18 Ilelo wanena icisuma cino iwancitila vino utali wankoma lino Yeova iwampeela kuli wewe.
19 Uzye a weni angazana umulwani wakwe nu kumusya ukwaula ukumucisa? Yeova alakupaala pa cisuma cino watuncitila uwanda wi lelo.
20 Imanya ukuti ukwaula nu kutwisika ulaya umwene nu kuti ulateeka Aina Izlaeli pa nsita itali.
21 Nomba lapa kuli nene umwi izina lyakwe Yeova ukuti utalalovya ana yane pa cisila cakuti nafwa nu kuti utalalovya izina lyane umu ng’anda yakwe tata.”
22 Fwandi Devedi walafile kuli Saulo, pa cisila Saulo waswilile ukwakwe. Lelo Devedi na antu yakwe yaswilile muno yafisime.
