1 Samweli 25:1-44
25 Mu kuya kwa nsita Samweli wafwile nupya Aina Izlaeli yonsi yakolongine nu kutandika ukumuloosya, yamuzisile apa ng’anda yakwe uku Lama. Lyene Devedi waile umu lwanga lwa Palani.
2 Mu Maoni mwali umonsi umwi uwaombelanga uku Kalimeli.* Wali umunkankala sana, wakweti imfwele 3,000 ni mbuzi 1,000 nupya pa nsita iya wapelanga imfwele umu Kalimeli.
3 Izina lyakwe wali a Nabali na mamakwe wali a Abigeo. Mamakwe wakweti mano nupya wali u musuma, lelo iya Umwina Kalebu wali u munkalwe nupya wali ni miyele iipe.
4 Lino Devedi wali umu lwanga uvwile ukuti Nabali akupela imfwele.
5 Fwandi Devedi watumile alumendo 10 nupya wayanenyile ati: “Yangini uku Kalimeli, nga mwafika kuli Nabali mumunene ukuti Devedi akukulamuka.
6 Lyene mukamunene muti: ‘Si uye nu mutende, na amung’anda yako kwene yaye nu mutende kumwi na vyonsi vino wakwata.
7 Nomba inuvwa ukuti ukupela imfwele. Lino ya kacema yako yali naswe tutaayacitiile iciipe nupya kutaali icili consi cino yaponzizye insita yonsi ino yali umu Kalimeli.
8 Nanti cakuti uzya aomvi yako yangakunena api lyasi lilyo. Si pokelela ningo alumendo yane pano itwiza pa nsita isuma. Si peela alumendo yaa na Devedi umwanako ivili vyonsi vino ungakwanisya.’”
9 Fwandi alumendo yakwe Devedi yaile iyanena Nabali vyonsi vino Devedi wayanenyile. Nomba lino yamazile sile ukulanda,
10 Nabali waswike aomvi yakwe Devedi ati: “Uzye Devedi a weni? Nupya mwana Yese a weni? Manda yaa aomvi aingi yakupuuka uku yasambazi yao.
11 Uzye intole umukate wane na manzi yane ni nyama ino inkomela aomvi yane nu kupeela antu yano ntamanyile na kuno yafumile?”
12 Aomvi yakwe Devedi yaswilile nu kuyamunena vyonsi vino Nabali walanzile.
13 Lilyo kwene sile Devedi wanenyile antu yakwe ati: “Cila muntu atole ulupanga lwakwe.” Fwandi yonsi yatozile impanga zyao na Devedi nawe watozile ulupanga lwakwe, aonsi umupiipi na 400 yapisile na Devedi nupya aonsi 200 yasyazile yakulola iviya.
14 Lelo umuomvi wenga pa yaomvi yakwe Nabali waile anena Abigeo umuci wakwe Nabali ati: “Devedi iwatuma aomvi yakwe ukufuma umu lwanga kuti ize yalamuke umusambazi witu, lelo umusambazi iwayatuka.
15 Antu yaya yatusakamiile ningo sana. Yatatazile yatucitile iciipe nupya tutaatazile itupozyapo icili consi insita yonsi ino twali nayo umu mpanga.
16 Yaali wi linga lya kutucingilila, usiku nu musanya insita yonsi ino twali nayo lino twacemanga imfwele.
17 Fwandi lolini vino mumacita pano intazi yasya iize pa musambazi witu na amung’anda yakwe yonsi nupya umusambazi witu u muwelewele icakuti kusi aangalanda nawe.”
18 Fwandi zuwa zuwa Abigeo watozile imikate 200, insembo ziili zikulu umwali waini, imfwele 5 izikomelwe limwi, imise* 5 iya ngano izisalule, ya keke 100 aapangilwa ni myangazi iyume na ya keke 200 apangilwa na masamvu nupya wakwezizye ivintu vii pali ya punda.
19 Lyene wanenyile aomvi yakwe ati: “Koleliini, namamulondela.” Lelo atanenyile uwakwe Nabali icili consi.
20 Lino Abigeo wayanga ala ali pali punda, Devedi na antu yakwe yapalamilanga lwa kuli aliwe lelo yatamuweni pano umwamba wamucinzile, lyene Abigeo wayakomenkinye.
21 Nomba Devedi waivwanzyanga akuti: “Fwandi naicuzizye sile pa kulinda ivintu vya muntu wii lino nali umu lwanga. Kusi nanti acimwi cino waponzizye, lelo wene wancitila iviipe lino nemo namucitiile ivisuma.
22 Si Leza afulule alwani yakwe Devedi nu kucilapo ndi cakuti namaleka umonsi ali wensi umu lupwa lwakwe Nabali ukutwalilila ukuya nu umi ukufika katondo.”
23 Lino Abigeo waweni Devedi, wisile pali punda zuwa zuwa nupya waile afukama pa nkoleelo yakwe Devedi ala afupiime.
24 Lyene waile afukama umupiipi ni ngazo zyakwe Devedi nu kulanda ati: “Musambazi wane leka umulandu uye pali nene, leka ne muomvi wako ndande naawe nupya kutika uku mazwi yano ne muomvi wako nimalanda.
25 Musambazi wane, si utiika mano kuli Nabali umuwelewele pano vino akacita vyalingana nu upiliulo wi zina lyakwe. Izina lyakwe a Nabali* nupya atakwata mano lelo ne muomvi wako ntali nalola alumendo yano iwatuma.
26 Musambazi wane nkulapa pali Yeova Leza wa umi na pa umi wako, ukuti a Yeova uwatakulesya ukucita umulandu wa wazi nu kuilandwila. Si alwani yako na yonsi aakulonda ukukucitila iciipe yaye wakwe Nabali.
27 Fwandi leka upe uno ne muomvi wako inkuletela upeelwe uku yaomvi yako aakukulondela.
28 Si njelele ne muomvi wako, pano Yeova alalenga ing’anda yako itwalilile pa mulandu wakuti ukalwa inkondo zyakwe Yeova nupya kusi iciipe icazanwa muli wewe amanda yako yonsi.
29 Ndi cakuti umwi wakukatukila nu kulonda ukukukoma, Yeova Leza wako alacingilila umi wako umu nyambi ya umi lelo alavwinta alwani yako wakwe vino umwi angavwinta mawe ukuomvya ica kuvwintilako.
30 Nupya lino Yeova alakucitila ivisuma vyonsi vino wakulaya nu kukusonta ukuya umwene wa Ina Izlaeli,
31 utaluvwa uyi nanti ukulanguluka pa mulandu wa kukoma antu ya kaele nu kulandula. Lino Yeova alakucitila ivisuma uce unjiusye ne muomvi wako.”
32 Lino Devedi uvwile vivyo wanenyile Abigeo ati: “Si alumbanyiziwe Yeova Leza wa Ina Izlaeli uwatakutuma ukwizankomenkanya ilelo.
33 Nupya upaalwe pa mulandu na mano yako. Si upaalwe pa kundesya ukuya nu mulandu wa wazi ilelo na pa kundesya ukulandula.
34 Nkulapa pali Yeova Leza wa umi uwa Ina Izlaeli uwatandesya ukukucitila iciipe, ukuti ndi cakuti utiza zuwa kuli nene nga kusi umonsi aliwensi uwa mu lupwa lwakwe Nabali uwangasyale ukufika katondo.”
35 Lyene Devedi watozile upe uno Abigeo wamutwaliile nu kumunena ati: “Swilila ukwako umu mutende. Inuvwa vino watulanda nupya ndacita vino watulenga.”
36 Lyene Abigeo waile kuli Nabali, wazanyile watapanga umutebeto umu ng’anda umwakwe kwati umwene, Nabali wasansamwike nupya alanga watakoleka. Abigeo ataanenyile Nabali vili vyonsi ukufikila katondo.
37 Lyene katondo ala Nabali watakololoka, umuci wamunenyile ivintu vivyo vyonsi. Lino Nabali uvwile vivyo, amaka yasizile nupya umile aya wa ciliwe.
38 Lino papisile amanda umupiipi na 10, Yeova walesile ukuti Nabali afwe.
39 Lino Devedi uvwile ukuti Nabali watafwa, watile: “Alumbanyiziwe Yeova uwatandwila uku muzewanya wakwe Nabali na pa kundesya ukucita iciipe icili consi. Nupya Yeova watawezezya uyi pali Nabali pa viipe vino wacisile.” Lyene Devedi watumile akuyamulanzizya Abigeo pakuti aye mamakwe.
40 Fwandi aomvi yakwe Devedi yaile kuli Abigeo ku Kalimeli nu kuyamunena iyati: “Devedi watatutuma ukwizakusenda pakuti ukaye mamakwe.”
41 Lilyo kwene sile Abigeo wafukiime nu kwinama alino alanda ati: “Mukwai ne muzya winu nene muipekanye ukuya umuomvi wa kufula ingazo zya yaomvi ya musambazi wane.”
42 Lyene zuwa zuwa Abigeo wakwezile pali punda nu kupita nupya aomvi yakwe akazyana 5 yamulondiile, wapitiile pamwi na aomvi yano Devedi watumile nupya waile aya u muci wakwe Devedi.
43 Devedi alanga watwala Ainoamu uwa ku Yezileele nupya yonsi yoili izile iyaya ya mama yakwe.
44 Lelo Saulo alanga wapeela umwanakwe Mikala umuci wakwe Devedi, kuli Paliti mwana Laisyi uwa ku Galimu.
Mafutunoti
^ Umusumba wa mu Yuda; asi uliumwi nu mwamba wa Kalimeli.
^ Mu Ciebele: “Masiya 5.” Siya wenga walingananga na malita 7.33. Lolini Ivyeo na Vyuze pa B14.
^ Icikapiliula ukuti “Ukuulwa mano; kutumpa.”
