1 Samweli 30:1-31
30 Lino Devedi na antu yakwe yafisile umu Zikilagi pa wanda uwalenga citatu, yazanyile Aina Amaleki iyazanza incende ya ku kaeya* nu musumba uwa Zikilagi, nupya alanga iyoca umusumba uwa Zikilagi.
2 Nupya yasenzile anaci na yonsi aali umu musumba, ukutandikila pa munono ukufika uku mukalamba. Lelo yatakomile ali wensi, alanga iyayasenda sile.
3 Lino Devedi na antu yakwe yafisile umu musumba, yazanyile iyaoca, nupya ya mama yao, ana yao aonsi na akazyana ale iyayasenda umu uzya.
4 Fwandi Devedi na antu yano wali nayo yatandike ukulila mpaka na maka ya kulilila iyasila.
5 Na ya mama yakwe Devedi yaili, kuli kuti Ainoamu uwa ku Yezileele na Abigeo uwali muka Nabali Umwina Kalimeli lino Nabali atatala wafwa, nayo kwene yasenzilwe umu uzya.
6 Devedi wali sana nu ulanda pano antu yatandike ukulanda ukuti yamutame na mawe pa mulandu wakuti antu yonsi yakalipe sana pa kuponzya ana yao aonsi na akazyana. Lelo Devedi wakomeleziwe pa mulandu nu kwazwa kwakwe Yeova, Leza wakwe.
7 Lyene Devedi wanenyile Abiata simapepo, mwana Aimeleki ati: “Leta efodi kuno.” Abiata nawe watwaliile Devedi efodi.
8 Devedi wapefile kuli Yeova ati: “Uzye inkonke antu yaa atiyazanza umusumba? Uzye nimayazana?” Leza nawe wamwaswike ati: “Yakonke, umayazana nupya umaya ukapoke vyonsi vino iyasenda kumwi na antu yonsi.”
9 Lilyo kwene sile Devedi wakatwike pamwi na aonsi 600 yano yali nawe, nupya yaile iyafika ku mukonko wa Besoli kuno aonsi yamwi yasyazile.
10 Devedi watwalilile nu ulendo na aonsi 400, lelo aonsi 200 aatonsile sana nu kufilwa ukulamba umukonko wa Besoli yasyazile.
11 Yazanyile umonsi umwi Umwina Ijipti umu mpanga nupya yamutwazile kuli Devedi. Yamupeezile ivyakulya na manzi ya kumwa,
12 na keke iputulwe iyapangilwa na masamvu alino na makeke yaili aapangilwa ni myangazi iyume. Lino waliile wizile akwata maka pano atatazile alyepo ivyakulya ivili vyonsi nanti ukumwa manzi pa manda yatatu umusanya nu usiku.
13 Lyene Devedi wamuzizye ati: “Wewe muomvi wakwe weni, nupya aekwi kuno ufumile?” Nawe waswike ati: “Nene Umwina Ijipti, umuomvi wa Mwina Amaleki, lelo umusambazi wane wansiile pa mulandu wakuti nalwile pa manda yatatu aapitapo.
14 Twazanzile kaeya* ka mpanga ya Ina Keleti ni mpanga yakwe Yuda alino na kaeya* ka mpanga yakwe Kalebu, nupya tosile umusumba wa Zikilagi.”
15 Lino Devedi uvwile vivyo wamuzizye ati: “Uzye umantungulula ukuli antu yayo?” Nawe waswike ati: “Ndi cakuti walapa umwi zina lyakwe Leza ukuti utakunkoma, nu kuti usikuntwala uku musambazi wane, namakutungulula ukuli antu yayo.”
16 Fwandi wamutungulwile kuno yasalangine incende yonsi, ala yakulya, ukumwa, nu kuzevya pa mulandu ni vintu uwingi vino yasenzile umu mpanga iya Ina Filisti ni mpanga yakwe Yuda.
17 Lyene Devedi watandike ukuyakomola kufuma uku macaca ukufika manguzi; kutapuswike umuntu nanti a wenga suka sile aonsi 400 autwike pa ngamali.
18 Devedi wapokolwile vyonsi vino Aina Amaleki yasenzile nupya wapuswisye ya mama yakwe yaili.
19 Kutaali nanti a wenga pa yantu yao uwaponzile kufuma pa munono kufika pa mukalamba. Yapokolwile ana yao aonsi na akazyana kumwi ni vintu vyao vyonsi; Devedi wapokolwile vyonsi vino antu yayo yasenzile.
20 Fwandi Devedi wasenzile imfwele zyonsi, imbuzi, ni ng’ombe nupya yalesile ukuti vyapitila pamwi ni viteekwa vyao. Yalanzile iyati: “Vii avino Devedi watapokolola.”
21 Lyene Devedi waile ukwali aonsi 200 aatonsile sana, aasyazile umupiipi nu mukonko wa Besoli nupya aafizilwe ukupita pamwi nawe, nayo yaile umu kukomenkanya Devedi pamwi na antu yano wapisile nayo. Lino Devedi wafisile umupiipi na aonsi yayo, wayalamwike.
22 Lelo aonsi aali aipe nupya awelewele apisile pamwi na Devedi yalanzile iyati: “Vino antu yaa yatapisile naswe, tusikuyapeelako icili consi pali vino twapokolwile yamasenda sile ya mama yao na ana yao nu kupita.”
23 Nomba Devedi walanzile ati: “Inane mutacita vivyo uku vintu vino Yeova watatupeela. Watucingilile nu kupeela aizile umu kutulwisya kuli sweswe.
24 Uzye a weni angazumilizya icintu cico? Vino uwaile umu nkondo amapeelwa vimalingana na vino uwasiile akulola iviya amapeelwa. Mwensi kwene mumakwata ivili vimwi.”
25 Nupya ukufuma pa wanda kwene uwo, Devedi wisile isunde lilyo pa Ina Izlaeli kufika na ndakai.
26 Lino Devedi waswilile uku Zikilagi watumile vimwi uku yakalamba ya mu Yuda aali acuza yakwe, walanzile ati: “Namutumila upe kufuma pa vintu vino twapokolwile uku yalwani yakwe Yeova.”
27 Watumiileko na aikalanga uku Betele, aikalanga uku Lamoti mu mpanga iya Negebu,* aikalanga uku Yatili,
28 aikalanga uku Aloeli, aikalanga uku Sifumoti, aikalanga uku Esyitemoa,
29 aikalanga uku Lakali, aikalanga umu misumba iya Ina Yelameeli, aikalanga umu misumba iya Ina Kenite,
30 aikalanga uku Holima, aikalanga uku Bolasyani, aikalanga uku Ataki,
31 aikalanga uku Hebuloni alino nu ku ncende zyonsi zino Devedi na antu yakwe yapitanangako sana.
