1 Samweli 9:1-27
-
Samweli wakomenkanya Saulo (1-27)
9 Kwali umonsi umwi uwafumile mu lupwa lwakwe Benjamini uwi zina lyakuti Kisyi, mwana Abiyeli, mwana Zeloli, mwana Bekolati, mwana Afiya, Umwina Benjamini uwakweti sana ivyuma.
2 Wakweti umwana umonsi uwi zina lyakuti Saulo, wali u mulumendo umusuma umu milolekele ukucila Aina Izlaeli yonsi, nupya wali u mutali kucila antu yonsi, yamufikanga sile umu viye
3 Lino ya punda yakwe Kisyi, isi wakwe Saulo yaponzile, Kisyi wanenyile Saulo umwanakwe ati: “Senda umuomvi wenga pakuti muye umu kulonda ya punda.”
4 Yapisile umu mpanga ya myamba yakwe Efulemu nu mu mpanga yakwe Syalisya, lelo yatazanyile ya punda. Yapisile umu mpanga yakwe Syaalimu nomba nako kwene yatayazanyile. Yapisile umu mpanga yonsi ya Ina Benjamini lelo namo kwene yatayazanyile.
5 Lyene yaile umu mpanga iya Zufi nupya Saulo wanenyile umuomvi wakwe wino wali nawe ati: “Leka tuswilile, pakuti ya tata yataleka ukusakamala pali ya punda nu kutandika ukusakamala pali sweswe.”
6 Nomba umuomvi walanzile ati: “Mu musumba uu mwaya umuntu wakwe Leza wino antu yacindika. Vyonsi vino walanda vikafikiliziwa. Leka akuno tuye. Limwi angaya akatunene kuno tungazana ya punda.”
7 Saulo uzizye umuomvi wakwe ati: “I vyani vino tumatwalila umuntu wiyo ndi cakuti twayako? Tutakweti ivyakulya umu vyola vitu, nupya tutakweti upe uli onsi uno tungatwalila umuntu wakwe Leza wa cumi. I vyani vino tukweti?”
8 Nupya kwene umuomvi waswike Saulo ati: “Inkwata ulupiya lumwi lwakwe syekele* wakwe siuva. Nimaya nkapeele umuntu wakwe Leza wa cumi, nawe amaya akatunene kuno tumazana ya punda.”
9 (Mpiti umu Izlaeli muntu nga kuya umu kuzya kuli Leza walandanga akuti: “Twapiteni kuli wino akalola ivilolwa.” Pano mpiti kasesema uwayako ndakai yamwamanga yakuti kalola wa vilolwa.)
10 Lyene Saulo wanenyile umuomvi wakwe ati: “Vino walanda vili sile ningo. Twapita.” Fwandi yaile umu musumba umwali umuntu wakwe Leza wa cumi.
11 Lino yalemelanga umulundu umu nzila iyaya umu musumba, yakomenkinye akazyana ala yakuya umu kutapa manzi. Yayuzizye iyati: “Uzye kalola wa vilolwa ali umu ncende yii?”
12 Nayo yaswike iyati: “Amuno ali. Mukonkiine sile. Pitisyini, ilelo wataiza umu musumba pano ilelo antu yakupeela ilambo pa ncende ya kupepelapo.
13 Mumamuzana nga mwingila sile umu musumba lino atatala waya umu kulya pa ncende ya kupepelapo. Antu yasikulya mpaka aize, pano aliwe akapaala ilambo. Lyene pa cisila, alino antu atiyalaalikwa yangalya. Fwandi pitangini likwene mumamuzana.”
14 Fwandi yaile umu musumba. Lino yafisile umu musumba, yaweni Samweli akuyakomenkanya pakuti yaye uku cifulo ca kupepelapo.
15 Lino kwasiile uwanda onga ukuti Saulo aye kuli Samweli, Yeova wanenyile Samweli ati:
16 “Mutondo pa nsita kwene yii, ndakutumila umuntu kufuma uku mpanga yakwe Benjamini. Uce umusonte* ukuya intunguluzi pa yantu yane Aina Izlaeli, alapususya antu yane uku Ina Filisti. Pano indola vino antu yane yakucula nupya inuvwa ukulila kwao.”
17 Lino Samweli waweni Saulo, Yeova wamunenyile ati: “Wikwene ali muntu wino nakunenyile, ‘Aliwe alaateeka antu yane.’”
18 Lyene Saulo wapalime kuli Samweli pa mpongolo nu kumuzya ati: “Nkuzyako, uzye ukwayela ing’anda yakwe wino akalola ivilolwa aekwi?”
19 Samweli waswike Saulo ati: “Nene indi kalola wa vilolwa. Koleela twapita uku cifulo ca kupepelapo, nupya ilelo tumaliila pamwi ivyakulya. Mutondo katondo ndakunena vyonsi vino ulinzile ukumanya* nu kukuleka ukuti wapita.
20 Utasakamala pali ya punda yano yaponzile manda yatatu ku cisila, pano iyaloleka. Nupya uzye ivisuma vyonsi vino Aina Izlaeli yakalonda i vyakwe weni? Uzye asi vyako kumwi na amu ng’anda yakwe tata wako?”
21 Lino Saulo uvwile vivyo uzizye ati: “Uzye asi nene wa mu mutundu wakwe Benjamini, umutundu uwacepesya mu mitundu ya Ina Izlaeli? Nupya uzye ulupwa lwane asi ali lupwa ulwasuulwa mu ndupwa zyonsi zya mu mutundu wakwe Benjamini? U mulandu ci uno walandila nani umu nzila iiyo?”
22 Lyene Samweli wasenzile Saulo nu muomvi wakwe nu kuyatwala umu cikuulwa ica kuliilamo ivyakulya, wayapeezile incende icindamisye apakwikala ukucila yonsi aalalikwe; antu azanyilweko yali umupiipi na 30.
23 Samweli wanenyile uwelekanga ati: “Leta icimpilinsya ca nyama ‘Cino inakunena nati sunga.’”
24 Lino uwelekanga uvwile vivyo watozile umwendo nu kutwala pali Saulo. Samweli walanzile ati: “Ivintu vii iyapekanyizizya mwemwe. Liini pano mwemwe iyapekanyizya ivintu vii pa wanda uu. Inayanena ukuti, ‘Inama aenyi.’” Fwandi Saulo waliilile pamwi na Samweli pa wanda uuwa.
25 Lyene yafumile uku ncende ya kupepelapo nu kuya umu musumba, nupya Samweli watwalilile ukulanzyanya na Saulo api paala lya nga’anda ilipapatane.
26 Yakatwike katondotondo, nupya pa macaca, Samweli wamile Saulo api paala ilipapatane nu kumunena ati: “Ipekanye pakuti nkuleke uwapita.” Fwandi Saulo waipekanyizye, nupya wene pamwi na Samweli yafumiile panzi.
27 Lino yatentemukanga ukufuma umu musumba Samweli wanenyile Saulo ati: “Nena umuomvi wako akoleele, lelo wemo utale wimilile pakwene pakuti nkunene mazwi yakwe Leza.” Fwandi umuomvi wakoleezile.
Mafutunoti
^ Syekele wenga angalingana na magilamu 11.4. Lolini Ivyeo na Vyuze pa B14.
^ Nanti “ukumwitila mafuta uku mutwe.”
^ Mu Ciebele: “Vyonsi ivili umu mwenzo wako.”
