Kalata wa Kutandikilako ku Ina Tesalonika 2:1-20
2 Inane mwamanya ningo ukuti ukwiza kwitu kuli mwemwe kwafumilemo ivisuma.
2 Pano nanti cakuti twatazile twaculako nu kusaalulwa sana umu Filipi, wakwe vino mwamanya, twasifile pa mulandu wakwe Leza witu kuti tumunene ilyasi lisuma pali aliwe ala antu yakutukaanya sana.
3 Pano ukumukonkomezya kuno tukamukonkomezya kutasintilila pa viipe nupya kutaaya u kukowele nupya tusicita vivyo pakuti tumubepe,
4 lelo wakwe vino Leza watuzumilizya ukusimikila ilyasi lisuma, tukalanda pakuti tuzanzye Leza aakaceceta imyenzo itu, tusizanzya antu.
5 Nupya mwamanya ukuti tutalandanga ivya kuizifilizya nanti ukulanda ivya ufi pa mulandu wa lunkumbwa; Leza ali kambone!
6 Nupya tutalondanga ukucindikwa na antu, kuli kuti mwemwe nanti antu yauze, nanti cakuti twali nu kuya icisendo sana pa mulandu wakuti sweswe yatumwa yakwe Klistu.
7 Lelo twamuteekeliile wakwe vino nyina aakoonsya akasakamala ana yakwe.
8 Lyene pa mulandu wakuti twamutemilwe sana, twalondesyanga ukumusimikila ilyasi lisuma pali Leza alino nu kupeela maumi itu pakuti tumwavwe, pa mulandu wakuti mwizile imuya atemwikwe sana kuli sweswe.
9 Inane ukwaula nu kutwisika, mukwiusya umulimo witu alino na vino twaombesyanga. Twaombanga usiku nu musanya pakuti tutaya icisendo kuli ali wensi muli mwemwe, lino twamusimikilanga ilyasi lisuma pali Leza.
10 Mwemwe ya kambone itu, na Leza kwene a kambone witu, pali vino twali acumi, alungami nupya aula umulandu kuli mwemwe mwemuno mwataila.
11 Mwamanya ningo ukuti twatwalilile ukumukonkomezya nu kumuteekezya alino nu kumusimikila mwensi kwene, wakwe vino isi akacita uku yana yakwe,
12 pakuti mungatwalilila ukucita vino Leza akalonda, uwamwama umu Wene wakwe alino nu ku ucindami wakwe.
13 Ali mulandu uno tukataizizya Leza ukwaula ukuta, pano lino mwapokelile izwi lyakwe Leza lino muvwile kuli sweswe, mwalipokelile wi zwi lyakwe Leza, wakwe viivi kwene vino lyaya, mutalipokelile wi zwi lya yantu, nupya i likuomba muli mwemwe mwemuno mwataila.
14 Pano mwemo ina itu, mwakolanyanga ivilongano vyakwe Leza ivikaombela pamwi na Klistu Yesu ivyaya umu Yudeya, pano mwacuzile uku yantu amu mpanga inu wakwe vino nayo kwene yakucula uku Yayuda,
15 aakomile nu Mwene Yesu na ya kasesema nupya naswe kwene yatucuzizye. Vino yakacita visizanzya Leza, nupya visizanzya nu muntu ali wensi,
16 yakatulesya ukuomba umulimo wa kusimikila uku yantu amu nko ungalenga yakapusuke. Ukucita vivyo kukalenga imembu zyao zyavulilako. Lelo ukali wakwe Leza iiwiza pali aliyo.
17 Lelo lino twapatukiine namwe ina itu pa nsita inono (nanti cakuti tutamulolanga, twamwiusyanga), pa mulandu wakuti twalondesyanga ukumulola, twezizye na maka ukwiza kuli mwemwe pakuti twize tumulole.
18 Ali mulandu kwene uno twalondelanga ukwiza kuli mwemwe, ne Paulo, nezizye ukwiza kuli mwemwe asi muku onga sile lelo imiku iili; nomba Satana watucilikile pa nzila.
19 Uzye pa nsita ya kuyapo kwa Mwene Yesu, a weni aalaya upaalilo witu, insansa zitu ni cisote ca ucindami witu? Uzye asi mwemwe kwene?
20 Icumi mwemwe kwene muli ucindami witu ni nsansa zitu.
