1 Yamwene 10:1-29
10 Lyene namwene wa ku Syeba uvwile pa lulumbi lwakwe Solomoni nu kuti ululumbi lwakwe lwalenganga izina lyakwe Yeova ukucindikwa, fwandi waile umu kumuzya mauzyo akome pakuti amwezye.
2 Wafisile umu Yelusalemu na aomvi yakwe aingi sana, ni ngamali izyasenzile mafuta yakwe basamu na goldi umwingi na mawe ya mutengo. Lyene waile kuli Solomoni nu kumunena vyonsi ivyali uku mwenzo wakwe.
3 Solomoni wamwaswike mauzyo yonsi, kutaali iuzyo ilikome lino umwene wafizilwe ukwasuka.
4 Lino namwene wa ku Syeba waweni mano yonsi yakwe Solomoni, ing’anda ino wakuuzile,
5 vyakulya vino walyanga, pano aomvi yakwe ikalanga, mulimo uno aamupekanyizizyanga ivyakulya yaombanga na vino yazwalanga, aamupeelanga waini, na malambo ya koca yano wapeelanga lyonsi pa ng’anda yakwe Yeova, camupezizye mano.
6 Fwandi wanenyile umwene ati: “Ilyasi lino nuvwile umu mpanga yane pali vino wacita na pa mano yako i lya cumi.
7 Lelo ntataile vino nuvwile kufikila niza nailolela nemwineco. Vino yanenyile vitaafisile nanti apakasi. Wakwata sana mano ni vyuma ukucila vino nuvwile.
8 Ansansa aaonsi yako na aomvi yako aakaya nawe lyonsi nu kukutika uku mano yako!
9 Si Yeova Leza wako alumbanyiziwe uwaweni visuma muli wewe pa ku kwika pa cilimba ca wene umu Izlaeli. Pa mulandu wakuti Yeova watemwa Aina Izlaeli manda pe, wakusonsile ukuya umwene pakuti uwapingula umu mulinganya nu ulungami.”
10 Lyene wapeezile umwene matalanti* 120 yakwe goldi na mafuta yakwe basamu na mawe ya mutengo. Mafuta yakwe basamu yano namwene wa ku Syeba wapeezile Umwene Solomoni yaali aingi sana ukucila mafuta yonsi yano yapeelanga umwene.
11 Mawato aingi yakwe Hilamu asenzile goldi ukufuma uku Ofili yasenzile ni mbao zya muti wa aligamu izingi sana na mawe ya mutengo.
12 Lyene umwene wapanzile ivya kutungilila ing’anda yakwe Yeova ni sano lyakwe ukuomvya imbao zya muti wa aligamu, wapanzile na mazeeze na ya banjo yakwe ya kimba. Kutaatala kwaya uwaletapo nupya imbao zya muti wa aligamu nupya zitaatala zyalolekapo kufika na ndakai.
13 Umwene Solomoni nawe wapeezile namwene wa ku Syeba vyonsi vino walondanga na vino walenzile ukulunda pali vino waitemiilwe sile ukumupeela. Pa cisila waswilile uku mpanga yakwe pamwi na aomvi yakwe.
14 Nupya goldi wino yatwalanga kuli Solomoni umu mwaka wafikanga matalanti 666,
15 kufumyako uwafumanga uku yaculuzi na wino ya mwene aaku Alabya ni ntunguluzi zya mu mpanga zyakwatilangapo nga zyakazya.
16 Umwene Solomoni wapanzile ivisyangu ivikalamba 200 vyakwe goldi umuiyele (cila cisyangu cakwatanga masyekele* 600 yakwe goldi)
17 wapanzile ni visyangu ivinono 300 ukuomvya goldi umuiyele (cila cisyangu cakwatanga goldi iingafina makilogilamu 1.7). Umwene wavisile umu ng’anda iyamwanga ukuti Umutengo wa Lebanoni.
18 Umwene wapanzile ni cilimba ca wene icikalamba ukuomvya mino ya nzovu nupya wacipasileko na goldi umwengululwe ningo.
19 Cilimba cakweti masitepu 6 na kalipaala akazinguluke uku cisila, cakweti na pa kwika makasa mu mbali zyoili na ya cisama yaili aimilile umu mbali.
20 Kwali na ya cisama 12 aimilile pa masitepu 6, cila cisama waimi pa mpela yi sitepu. Kutaali uwene na uze uwapanzile icilimba wakwe cii.
21 Viya vyonsi vya kumwelamo Umwene Solomoni vyali ivyakwe goldi, nupya iviya vyonsi ivya mu ng’anda ya Mutengo wa Lebanoni vyali ivyakwe goldi umwengululwe ningo. Kutaali icapangiilwe na siuva, pano siuva yamulolanga ukuti uwa sile sile umu manda yakwe Solomoni.
22 Umwene wakweti mawato aingi aku Tasyisyi pali yemba pamwi na mawato yakwe Hilamu. Muku onga nga papita imyaka itatu, mawato ya ku Tasyisyi yamutwalilanga goldi na siuva, mino ya nzovu, ya kolwe, ni vyunyi vino yakaama ukuti pikoko.
23 Fwandi Umwene Solomoni wakweti ivyuma na mano aingi ukucila ya mwene yonsi asyala aali umu nsi.
24 Nupya antu umu nsi yonsi yayanga kuli aliwe pakuti yakuvwe mano yano Leza wamupeezile.
25 Yonsi yamutwalilanga ivya upe, kuli kuti iviya vyakwe siuva, viya vyakwe goldi, vyakuzwala vya mu ulwi ni vyakuzwala vyuze, mafuta yakwe basamu, mfwalasi na ya punda, nupya vikwene avino yacitanga cila mwaka.
26 Solomoni watwalilile ukukwatilako maceleta ni mfwalasi; wakweti maceleta 1,400 ni mfwalasi 12,000, wavisungiile umu misumba ya kusungilamo maceleta nu mu Yelusalemu, mupiipi na kuno wikalanga.
27 Umwene wavuzizye siuva umu Yelusalemu kwati amawe, ni miti ya mikedali kwati imisamvu iyaya mu Syefela.
28 Imfwalasi zyakwe Solomoni yazifumyanga uku Ijipti, nupya aculuzi ya mwene yakalanga imfwalasi zingi pa mutengo uli umwi.
29 Cila celeta ilyafumanga uku Ijipti yalikalanga pa mpiya zyakwe siuva 600, ni mfwalasi nayo pa mpiya zyakwe siuva 150; lyene yavitwalanga kuli ya mwene yonsi aateekanga Aina Hiti na kuli ya mwene ya ku Silya.
Mafutunoti
^ Italanti lyonga lyafinanga makilogilamu 34.2. Lolini Ivyeo na Vyuze pa B 14.
^ Syekele wenga angalingana na magilamu 11.4. Lolini Ivyeo na Vyuze pa B14.
