1 Yamwene 11:1-43
11 Umwene Solomoni watemilwe anaci aingi aku mpanga zyuze kulunda pa mwana umwanaci wakwe Falao, kuli kuti Aina Moabu, Aina Amoni, Aina Edomu, Aina Sidoni, na Ina Hiti.
2 Yafumile umu nko zino Yeova wanenyile Aina Izlaeli ati: “Mutalinzile ukutwalizyanya nayo, pano yangalenga mutandike ukuombela ya leza yao.” Lelo Solomoni wayatemilwe sana.
3 Nupya watwazile anaci 700 na anaci yauze 300, mu kuya kwa nsita ya mama yakwe yamutonsizye umwenzo.
4 Lino Solomoni wakosile, ya mama yakwe yalenzile ukuti atandike ukuombela ya leza yauze, nupya ataombelanga Yeova Leza wakwe nu mwenzo onsi wakwe vino Devedi isi wacitanga.
5 Nupya Solomoni watandike ukuombela Asyitaloti, leza umwanaci uwa Ina Sidoni, na Milikomu leza wa Ina Amoni uwali uwa winyi kuli Leza wa cumi.
6 Nupya wacitanga iviipe kuli Yeova, wene ataombelanga Yeova nu mwenzo onsi wakwe Devedi isi.
7 Lyene Solomoni wakuuzile incende iya kupepelapo yakwe Kemosyi leza wa winyi uwa Ina Moabu pa mwamba umupiipi nu musumba uwa Yelusalemu na yakwe Moleki leza wa winyi uwa Ina Amoni.
8 Vikwene avino wacisile uku yaci yakwe yonsi aku mpanga zyuze aapeelanga malambo ya koca kuli ya leza yao.
9 Yeova wasokiile sana Solomoni, pa mulandu wakuti watiile ukuombela Yeova Leza wa Ina Izlaeli uwalolekile kuli aliwe imiku iili
10 nupya walanga wamucelula ukuti atalinzile ukuombela ya leza yauze. Lelo atalondiile vino Yeova wamunenyile.
11 Lyene Yeova wanenyile Solomoni ati: “Pa mulandu wakuti wacita cii nupya utasunzile upangano wane na masunde yano nakunenyile, ndakupoka uwene nu kuupeela kuli wenga pa yaomvi yako.
12 Lelo pa mulandu wakwe Devedi tata wako, ntalacita vivyo lino ucili nu umi. Ndapoka uwene uku mwanako,
13 nomba ntalapoka uwene onsi. Mutundu onga ndaupeela uku mwanako, pa mulandu wakwe Devedi umuomvi wane na pa mulandu wa musumba wa Yelusalemu uno nasoolola.”
14 Lyene Yeova walesile ukuti kuye uwa kulwisya Solomoni, kuli kuti Hadadi Umwina Edomu uwa mu lupwa lwa mwene wa ku Edomu.
15 Lino Devedi wacimvizye impanga ya Edomu, Yoabu umukalamba wa yasilika waile umu kuziika aakomilwe, nupya wezizye ukukoma aonsi yonsi amu Edomu.
16 (Pano Yoabu na aonsi yonsi amu Izlaeli ikazile kuuku kwene pa myezi 6 kufikila wakoma aonsi yonsi amu Edomu.)
17 Lelo Hadadi utwike pamwi na aomvi yamwi yakwe isi Aina Edomu nu kuya uku Ijipti; pa nsita iiya Hadadi wali umulumendo.
18 Yafumile uku Midyani iyaya uku Palani. Nupya yasenzile aonsi aku Palani nu kuya uku Ijipti, kuli Falao umwene wa ku Ijipti uwamupeezile ing’anda, ivyakulya, ni mpanga.
19 Falao watemilwe sana Hadadi icakuti wamupeezile mulamu wakwe umuto wakwe Tapenesi kuti aye umuci wakwe.
20 Lino papisile insita, umuto wakwe Tapenesi wamuvyalile umwana umonsi uwi zina lyakuti Genubati, nupya Tapenesi wamukuzizye umu ng’anda yakwe Falao, Genubati watwalilile ukwikala umu nga’nda yakwe Falao mu yana yakwe Falao.
21 Lino Hadadi wali umu Ijipti uvwile ukuti Devedi watafwa nu kuziikwa ukwalaala ivikolwe vyakwe nu kuti Yoabu umukalamba wa yasilika watafwa. Fwandi Hadadi wanenyile Falao ati: “Leka nswilile uku mpanga yane.”
22 Lelo Falao wamuzizye ati: “I cani cino uulizya kuno icingalenga ukuti uswilile uku mpanga yako?” Nawe waswike ati: “Kusi nanti acimwi, lelo napaapata leka nswilile.”
23 Leza walenzile ukuti kuye na muze uwa kulwisya Solomoni, kuli kuti Lezoni mwana Eliyada uutwike ukufuma kuli Hadadeza umusambazi wakwe nupya umwene wa ku Zoba.
24 Wakolonganike aonsi nu kuya intunguluzi ya vipondo lino Devedi wayacimvizye. Fwandi yaile uku Damasika nu kuyaikala kuuku kwene nupya yatandike ukutungulula umu Damasika.
25 Lezoni walwisyanga Aina Izlaeli mu manda yonsi yakwe Solomoni, kulunda pa viipe vino Hadadi wacisile, nupya wapasile sana Aina Izlaeli amanda yonsi yano wateekanga umu Silya.
26 Kwali na Yeloboamu mwana Nebati, uwa mu mutundu wakwe Efulemu kufuma uku Zeleda, wali umuomvi wakwe Solomoni nupya nyina wali a Zeluya mukamfwilwa. Nawe kwene watandike ukupondokela umwene.
27 Mulandu uno wapondokiile umwene aewu: Solomoni wakuuzile Milo* nupya wakuuzile apasiile ukwi linga lya musumba wakwe Devedi isi.
28 Yeloboamu wali uwa maka. Lino Solomoni waweni ukuti waombesyanga, wamusonsile ukulaangalila amu ng’anda yakwe Jozefu aaombanga umulimo wa kupatikiziwa.
29 Pa nsita iiya Yeloboamu wafumile uku Yelusalemu, nupya Ahiya kasesema Umwina Syilo wamuzanyile umu museo. Ahiya wazwite icakuzwala icipya, nupya aonsi yaa yali sile yoili umu mpanga.
30 Ahiya watozile icakuzwala icipya cino wazwite nu kucilepola umu viputulwa 12.
31 Lyene wanenyile Yeloboamu ati:
“Tola iviputulwa 10 ivya cakuzwala, pano Yeova Leza wa Ina Izlaeli watalanda ukuti: ‘Namapoka uwene kuli Solomoni nupya ndakupeela imitundu 10.
32 Lelo ndamusiila umutundu onga pa mulandu wakwe Devedi umuomvi wane na pa mulandu wa musumba wa Yelusalemu uno nasoolola ukufuma umu mitundu yonsi ya Ina Izlaeli.
33 Ndacita vivyo pa mulandu wakuti yata ukundondela nupya yakafukamila Asyitaloti leza mwanaci uwa Ina Sidoni na Kemosyi leza wa Ina Moabu na Milikomu leza wa Ina Amoni, nupya yata ukundondela, kuli kuti yata ukucita vino nkalola ukuti ivisuma nupya yata ukulondela masunde yane wakwe vino Devedi isi wakwe Solomoni wacitanga.
34 Lelo ntalamupoka uwene onsi nupya ndamuleka ukuya intunguluzi manda yakwe yonsi, pa mulandu wakwe Devedi umuomvi wane wino nasoolola pano walondelanga masunde yane.
35 Lelo ndapoka uwene, kuli kuti imitundu 10 uku mwanakwe nu kukupeela.
36 Umwanakwe ndamupeela umutundu onga pakuti lyonsi mu lupwa lwakwe Devedi muce mwaya uwa kuteeka umu Yelusalemu, umusumba uno nasoolola kuti amuno izina lyane lyacindikilwa.
37 Ndakusonta nupya ulaateeka antu yonsi yano ukulonda, ulaya nu mwene umu Izlaeli.
38 Nupya ndaaya naawe ndi cakuti ukucita vyonsi vino nkukunena, ukundondela nupya ukucita ivisuma ukupitila umu kuvwila masunde yane wakwe vino Devedi muomvi wane wacitanga. Ndaleka ukuti amu lupwa lwako yateeka wakwe vino nacita uku ya mu lupwa lwakwe Devedi, nupya ndaleka ukuti uwateeka umu Izlaeli.
39 Ndazewanya amu lupwa lwakwe Devedi pali cii, lelo asi lyonsi lino ndaacita vivyo.’”
40 Fwandi Solomoni watandike ukulonda ukukoma Yeloboamu, lelo Yeloboamu utukiile uku Ijipti kuli Syisyaki umwene wa ku Ijipti, nupya watwalilile ukwikala kuuku kwene kufika lino Solomoni wafwile.
41 Ilyasi lyonsi ilyasyala ilikalanda pali Solomoni, pali vyonsi vino wacisile na pa mano yano wakweti, lyalembwa umwi buku lya mpiti ilikalanda pa vyacitike umu umi wakwe Solomoni.
42 Solomoni wateesile Aina Izlaeli yonsi umu Yelusalemu pa myaka 40.
43 Lyene Solomoni wafwile nu kuziikwa ukwalaala ivikolwe vyakwe mu Musumba Wakwe Devedi isi; nupya Leoboamu umwanakwe wamupyanyile pa wene.
Mafutunoti
^ Mu Ciebele izwi lii likapiliula ukuti “kuzuuzya.”
