1 Yamwene 12:1-33
12 Leoboamu waile uku Syekemu, pano Aina Izlaeli yonsi akuno yaile pakuti yakamwike pa wene.
2 Nupya Yeloboamu mwana Nebati uvwile ivyacitike (pa nsita iiya ala acili uku Ijipti kuno utukiile lino wapuukanga Umwene Solomoni),
3 lyene aonsi ya mu Izlaeli yatumile akuyamwama. Pa cisila, Yeloboamu na Ina Izlaeli yonsi yaile kuli Leoboamu nu kuyamunena iyati:
4 “Tata wako walesile kuti ivintu vyatutalila, lelo wemo ndi cakuti watwangusizya uwikazi nu kusisya ivisendo ivifine pa mitwe itu tumakuombelanga.”
5 Leoboamu nawe wayanenyile ati: “Tale pitangini; muce muwele pa cisila ca manda yatatu.” Nayo yapisile.
6 Lyene uzizye aikolo aombelanga Solomoni isi ala acili nu umi ati: “Uzye mungampanda uli amano pali vino ningasuka antu yaa?”
7 Nayo yamwaswike iyati: “Ndi cakuti ilelo umaya umuomvi wa yantu yaa nupya umauvwa vino iyakulenga nu kuyasuka ningo, yamakuombelanga lyonsi.”
8 Lelo wakanyile ukuvwa kuli aliyo, nupya waile umu kuzya aonsi acance alingine nawe umusinku nupya amuombelanga.
9 Wayuzizye ati: “Uzye mungampanda uli amano pali vino tungasuka antu akulanda yakuti ‘Utwangusizye icisendo cino tata wako wisile pali sweswe’?”
10 Aonsi yayo acance yamunenyile iyati: “Antu akulanda ukuti, ‘Tata wako walesile ivintu vyatutalila, lelo wemo utwangusizyeko icisendo’; ukayanena uti, ‘Ndalenga ukuti mwaombesya ukucila vino tata wacisile.
11 Tata walenzile icisendo ukumufinila, lelo nemo ndalenga cifinileko. Tata wamumanga sile ni mikota, lelo nemo ndaamuma na swepu.’”
12 Yeloboamu na antu yonsi yaile kuli Leoboamu pa wanda wakwe citatu, wakwe vino wayanenyile ati: “Muce muwele pa wanda uwalenga citatu.”
13 Lelo umwene wakalipile antu nupya wakanyile ukuomvya amano yano aikolo yamupanzile.
14 Wayanenyile wakwe viivi kwene vino aonsi acance yamupanzileko amano ati: “Tata walenzile icisendo ukumufinila, lelo nemo ndalenga cifinileko. Tata wamumanga sile ni mikota, lelo nemo ndaamuma na swepu.”
15 Fwandi umwene atuvwile kuli vino antu yalanzile, pano Yeova uwalenzile ukuti ciye vivyo, pakuti amazwi yano Yeova walanzile ukupitila muli Ahiya Umwina Syilo ukulozya kuli Yeloboamu mwana Nebati yafikiliziwe.
16 Lino Aina Izlaeli yonsi yaweni ukuti umwene wakana ukuvwa kuli aliyo, yalanzile iyati: “Lekini ica upyanyi ca mwana wakwe Yese cimusyalile. Twapiteni tuswilile kuli ya leza itu. Naawe Devedi syala na amu ng’anda yako!” Lyene Aina Izlaeli yonsi yaswilile uku mang’anda yao.
17 Lelo Leoboamu watwalilile ukuteeka Aina Izlaeli aikalanga umu misumba yakwe Yuda.
18 Lyene umwene Leoboamu watumile Adolamu uwangalilanga aombanga umulimo wa kupatikiziwa, lelo Aina Izlaeli yonsi yamutamile na mawe mpaka afwa. Umwene Leoboamu wene wakwezile iceleta lyakwe autukila uku Yelusalemu.
19 Nupya Aina Izlaeli yatwalilila ukupondokela amu ng’anda yakwe Devedi ukufika na ndakai.
20 Lino Aina Izlaeli yonsi yuvwile sile ukuti Yeloboamu watawela, yamwamile nu kumwika pa wene pakuti ayateeka. Amu mutundu wakwe Yuda sile asyazile yakulondela amu ng’anda yakwe Devedi.
21 Lino Leoboamu wafisile sile uku Yelusalemu wakolonganike yonsi amu lupwa lwakwe Yuda na amu lupwa lwakwe Benjamini, kuli kuti asilika 180,000 asambilile ivya kulwa kuti yakalwisye Aina Izlaeli pakuti yamuwezezye uwene.
22 Lyene Leza wa cumi wanenyile Syemaya umuntu wakwe Leza wa cumi ati:
23 “Ukanene Leoboamu mwana Solomoni umwene wa ku Yuda na yonsi amu lupwa lwakwe Yuda na lwakwe Benjamini na antu yonsi asyala uti,
24 ‘Yeova watalanda ati: “Mutalinzile ukuya umu kulwisya Aina Izlaeli aina inu. Mwensi swililini uku mang’anda inu pano nene indenga ukuti ivintu vii vicitike.”’” Fwandi yuvwile vino Yeova walanzile iyaswilila nu ku mang’anda yao wakwe viivi kwene vino Yeova wayanenyile.
25 Lyene Yeloboamu waile akuula cipya cipya umusumba wa Syekemu uwali umu ncende ya myamba yakwe Efulemu atandika nu kwikalamo. Nupya wafumile kuuku aya akuula umusumba wa Penueli.
26 Yeloboamu welenginye ati: “Lyene uwene umaswilila uku ya mu ng’anda yakwe Devedi.
27 Ndi cakuti antu yaa yatwalilila ukuya uku Yelusalemu uku ng’anda yakwe Yeova umu kupeela malambo, imyenzo yao ilaswilila uku musambazi wao umwene Leoboamu uwa ku Yuda. Nupya yalankoma nu kuswilila kuli aliwe.”
28 Pa cisila ca kuuzilizya, umwene wapanzile ivilubi vya twana twa ng’ombe viili, nupya wanenyile antu ati: “Mwe Ina Izlaeli mutafwile ukulaya uku Yelusalemu. Leza winu aewi, uwamufumizye umu mpanga ya Ijipti.”
29 Lyene wisile akana ka ng’ombe konga umu Betele na kauze uku Dani.
30 Cii calenzile ukuti yayembuke, nupya yayanga nu mu kupepa akana ka ng’ombe akali uku Dani.
31 Nupya wakuuzile mang’anda ya kupepelamo pa ncende zino yalolanga ukuti izya muzilo, wasonsile na ya simapepo ukufuma umu yantu ataali Aina Levi.
32 Yeloboamu wapekinye nu kuti kwaya umutebeto pa wanda uwalenga 15 umu mwezi wakwe 8, wakwe vino cali umu Yuda. Pa ulambo uno wapanzile uku Betele wapeelelangapo malambo uku twana twa ng’ombe tuno wapanzile. Nupya uku Betele wasonsileko ya simapepo aakuti yaombela pa ncende zino yalolanga ukuti izya muzilo.
33 Nupya watandike ukupeela malambo pa ulambo uno wapanzile uku Betele pa wanda uwalenga 15 umu mwezi wakwe 8, umu mwezi uno umwineco wasoolwile; wapekinye ukuti Aina Izlaeli yakwata umutebeto nupya waile uku ulambo umu kupeela ivya upe na malambo ya koca.
