1 Yamwene 14:1-31
14 Pa nsita kwene iiya Abiya umwana umonsi wakwe Yeloboamu walwile.
2 Fwandi Yeloboamu wanenyile umuci wakwe ati: “Napaapata, katuka, uivulunganye umu milolekele pakuti yatamanya ukuti wewe muci wakwe Yeloboamu nupya uye uku Syilo. Kuuku kwene akuno wayazana kasesema Ahiya. Aliwe walanzile ukuti ndaya umwene pa yantu yaa.
3 Usende imikate 10, ya keke nu uci, nu kuya kuli aliwe. Nawe wayakunena ivilacitikila umulumendo.”
4 Muci wakwe Yeloboamu wacisile vino iya wamunenyile. Wakatwike nu kuya uku Syilo nupya waile uku ng’anda yakwe Ahiya. Ahiya wezyanga ukumulolekesya lelo wafizilwe ukulola pa mulandu nu ukote.
5 Lelo walanga Yeova atanena Ahiya ati: “Umuci wakwe Yeloboamu akwiza umu kuzya kuli wewe pa mwanakwe pano umulwale. Nimakunena ivyakuti wize umunene. Nga wafika amaiza aifise pakuti utamumanya.”
6 Lino Ahiya uvwile sile imitinti ya muci wakwe Yeloboamu ala akwingila, walanzile ati: “Kalibu, we muci wakwe Yeloboamu. U mulandu ci uno ukuifisila? Nkweti ilyasi liipe ilya kukunena.
7 Pitanga ukanene Yeloboamu uti, ‘Yeova Leza wa Ina Izlaeli walanda wati: “Nakusoolwile ukufuma umu yantu yako nu kukulenga ukuya intunguluzi pa yantu yane Aina Izlaeli.
8 Lyene naposile uwene kufuma uku ya mu ng’anda yakwe Devedi nu kuupeela kuli wewe. Lelo utaaya wa muomvi wane Devedi, uwalondelanga masunde yane nu kumbombela nu mwenzo onsi nupya uwacitanga sile vino natemwa.
9 Wemo wacita iviipe ukucila yonsi aakukoleelile, nupya waipangila leza muze ni vilubi vya cela pakuti unsosye, nupya nene wafutatila.
10 Pa mulandu kwene uu ndaleta intazi pa ya mu ng’anda yakwe Yeloboamu nu konona aonsi yakwe Yeloboamu yonsi kumwi sile na atakwata uwa kuyaazwa, na atonte aaya umu Izlaeli, nupya ndapyela amu ng’anda yakwe wakwe vino umuntu akapyela usaali onsi!
11 Umuntu wakwe Yeloboamu wensi aalafwila umu musumba, ya simbwa yalamulya; na wensi aalafwila umu mpanga, ivyunyi vya mwi yulu vilamulya, pano avino Yeova watalanda.”’
12 “Fwandi katuka uwapita ukwako. Nga wafika sile umu musumba, umwana amafwa.
13 Aina Izlaeli yonsi yamamuloosya nu kumuziika, pano aali wa mu lupwa lwakwe Yeloboamu sile aalaziikwa umwi lindi, pa mulandu wakuti wene wenga sile awino Yeova Leza wa Ina Izlaeli watazanamo cimwi cisuma.
14 Yeova alaisoolwela umwene umu Izlaeli aalonona amu ng’anda yakwe Yeloboamu, nupya nga akulonda angacita vivyo likwene.
15 Yeova alonona Aina Izlaeli icakuti yalaya wi tete ilikutenkana umu manzi, nupya alayafumya umu mpanga yao isuma ino wapeezile uku vikolwe vyao nu kuyasalanganyizizya uku lusansa luze ulwa Luzi,* pano imiike incesi zya kupepa pakuti yasosye Yeova.
16 Nupya alasya Aina Izlaeli pa mulandu ni membu zino Yeloboamu wacita na zino walenga Aina Izlaeli ukucita.”
17 Lyene umuci wakwe Yeloboamu wakatwike nu kupita aaya uku Tiliza. Lino wafisile pa ng’anda yakwe umwana wafwile.
18 Fwandi yamuziisile, nupya Aina Izlaeli yonsi yamuloosizye wakwe viivi kwene vino Yeova walanzile ukupitila muli kasesema Ahiya umuomvi wakwe.
19 Nupya ilyasi lyonsi ilyasyala ilikalanda pali Yeloboamu, vino walwile inkondo na vino wateekanga, lyalembwa umwi buku lya mpiti ilikalanda pali ya mwene ya mu Izlaeli.
20 Yeloboamu wateesile imyaka 22, lyene pa cisila wafwile nu kuziikwa wa vikolwe vyakwe; nupya Nadabu umwanakwe wamupyanyile pa wene.
21 Pa nsita iiya ala Leoboamu mwana Solomoni akateeka umu Yuda. Wali ni myaka 41 lino watandike ukuteeka, nupya wateesile imyaka 17 mu musumba wa Yelusalemu uno Yeova wasoolwile ukufuma umu mitundu yonsi ya mu Izlaeli kuti muye izina lyakwe. Nyina wali a Naama Umwina Amoni.
22 Ayuda yasosyanga Yeova nupya pa mulandu ni membu zyao, yamusosizye sana ukucila vino ivikolwe vyao vyacisile.
23 Nayo kwene imikanga ivilubi, ivipilala ni ncesi zya kupepa pa ncende izitumpuke nu mu muti uli onsi ukulu nupya ulembe ningo.
24 Kwali na aonsi acitanga uzelele pi tempele. Yacitanga ivya winyi vyonsi vino inko zino Yeova wazinzile pa nkoleelo ya Ina Izlaeli zyacitanga.
25 Mu mwaka uwalenga 5 uwa kuteeka kwa Mwene Leoboamu, Umwene Syisyaki uwa ku Ijipti wizile umu kulwisya Yelusalemu.
26 Wasenzile ivyuma vya mu ng’anda yakwe Yeova ni vya mwi sano. Wasenzile vyonsi sile kumwi ni visyangu vyakwe goldi vino Solomoni wapanzile.
27 Fwandi Umwene Leoboamu wapanzile ivisyangu vyakwe koopa ivya kupyanikizya pa visyangu vivyo, nu kuvipeela uku ntunguluzi zyakwe ya kalinda aalindanga pa mpongolo ya kwi sano.
28 Lyonsi lino umwene waya uku ng’anda yakwe Yeova alinzi yasendanga ivisyangu, nupya pa cisila yaviswilizyanga umu muputule wao.
29 Ilyasi lyonsi lyasyala ilikalanda pali Leoboamu na pali vyonsi vino wacisile, lyalembwa umwi buku lya mpiti ilikalanda pali ya mwene ya mu Yuda.
30 Leoboamu na Yeloboamu yalwisyanyanga lyonsi sile.
31 Lyene Leoboamu wafwile nu kuziikwa ukwalaala ivikolwe vyakwe mu Musumba Wakwe Devedi. Nyina wali a Naama Umwina Amoni. Nupya umwanakwe Abijamu* u wamupyanyile pa wene.
