1 Yamwene 15:1-34
15 Mu mwaka uwalenga 18 uwa kuteeka kwa Mwene Yeloboamu umwana wakwe Nebati, Abijamu wizile aya umwene umu mpanga ya Yuda.
2 Wateesile imyaka itatu umu Yelusalemu. Nyina wali a Maaka umwizikulu wakwe Abisyalomu.
3 Wacitanga imembu zyonsi zino na isi wacisile, nupya ataombelanga Yeova Leza wakwe nu mwenzo onsi wakwe vino Devedi icikolwe cakwe wali.
4 Lelo pa mulandu wakwe Devedi, Yeova Leza wakwe walesile ukuti lyonsi umu lupwa lwakwe mwafuma uwa kuteeka* umu Yelusalemu ukupitila umu kusonta umwanakwe uwa kumupyana nu kuleka umusumba wa Yelusalemu utwalilile ukuyako.
5 Pano Devedi wacitanga ivisuma kuli Yeova, nupya umu umi wakwe onsi walondelanga masunde yakwe yonsi, kufumyako sile umulandu wakwe Uliya Umwina Hiti.
6 Nupya umu umi wakwe onsi Leoboamu na Yeloboamu yalwisyanyanga.
7 Ilyasi lyonsi ilyasyala ilikalanda pali Abijamu na vyonsi vino wacisile, lyalembwa umwi buku lya mpiti ilikalanda pali ya mwene ya mu Yuda. Nupya Abijamu na Yeloboamu nayo kwene yalwisyanyanga.
8 Lyene Abijamu wafwile nu kuziikwa ukwalaala ivikolwe vyakwe umu Musumba Wakwe Devedi; nupya Asa umwanakwe u wamupyanyile pa wene.
9 Mu mwaka uwalenga 20 uwa kuteeka kwa Mwene Yeloboamu uwa ku Izlaeli, Asa watandike ukuteeka umu Yuda.
10 Wateesile imyaka 41 umu Yelusalemu. Nyinakulu wali a Maaka umwizikulu wakwe Abisyalomu.
11 Asa wacitanga ivisuma kuli Yeova, wakwe Devedi icikolwe cakwe.
12 Wazinzile aonsi ya cizelele ya pi tempele umu mpanga yakwe nupya wafumizyemo ivilubi vyonsi ivya winyi* vino ivikolwe vyakwe vyapanzile.
13 Wafumizye na Maaka nyinakulu pali unamwene pa mulandu wakuti wapanzile icilubi ca winyi ica kuomvya pa kupepa ulucesi.* Asa wawisizye icilubi nu kucocela umu mukonko wa Kiduloni.
14 Lelo atononyile incende izya kupepelapo zino antu yalolanga ukuti izya muzilo. Nanti ciye vivyo watwalilile ukuombela Yeova nu mwenzo onsi umu umi wakwe onsi.
15 Nupya umu ng’anda yakwe Yeova watwazilemo ivintu vino wene na isi yalolanga ukuti ivya muzilo, kuli kuti siuva, goldi ni viya vyuze.
16 Asa na Baasya umwene wa Ina Izlaeli lyonsi yalwisyanyanga.
17 Fwandi Baasya umwene wa Ina Izlaeli wizile umu kulwisya impanga ya Yuda, nupya watandike ukukuula cipya cipya umusumba wa Lama pakuti kutaya uwa kwingila nanti ukufuma ukuya kuli Asa umwene wa Yayuda.
18 Lyene Asa watozile siuva wensi na goldi ivyasyazile umu vipao vya mu ng’anda yakwe Yeova nu mwi sano nu kupeela uku yaomvi yakwe. Nupya wayatumile kuli Beni-hadadi mwana Tabilimoni mwana Hezioni umwene wa ku Silya, uwikalanga uku Damasika ati:
19 “Paya upangano pali wewe nani na pali tata na tata wako. Nakutumila siuva na goldi. Iza utame upangano na Baasya umwene wa Ina Izlaeli pakuti afume umu mpanga yane.”
20 Beni-hadadi uvwile uku Mwene Asa nupya watumile akalamba ya yasilika yakwe ukuyazanza imisumba ya mu Izlaeli, yaile iyonona Iyoni, Dani, Abeli-beti-maaka, impanga yonsi iya Kineleti ni mpanga yonsi iya Nafutali.
21 Lino Baasya uvwile vivyo, lilyo kwene sile watiile ukukuula umusumba wa Lama nupya watwalilile ukwikala umu Tiliza.
22 Umwene Asa wamile Ayuda yonsi ukwaula ukusyako nanti aumwi, nupya yaile iyasenda amawe ni mbao vino Baasya waomvyanga pa kukuula umusumba wa Lama, lyene Umwene Asa waviomvizye uku kukuulila umusumba wa Geba umu ncende ya mutundu wakwe Benjamini nu musumba wa Mizipa.
23 Ilyasi lyonsi ilyasyala ilikalanda pali Asa, pa maka yakwe, pali vino wacisile na pa misumba ino wakuuzile cipya cipya, lyalembwa umwi buku lya mpiti ilikalanda pali ya mwene ya mu Yuda. Lelo lino wakosile wacuzile uku ulwale wa ku ngazo.
24 Lyene Asa wafwile nu kuziikwa ukwalaala ivikolwe vyakwe umu Musumba Wakwe Devedi icikolwe cakwe; nupya Yeosyafati umwanakwe u wamupyanyile pa wene.
25 Nadabu umwana wakwe Yeloboamu wizile aya umwene umu Izlaeli umu mwaka wakwe ciili uwa kuteeka kwakwe Asa umu mpanga ya Yuda, nupya wateesile umu Izlaeli pa myaka iili.
26 Wasosyanga Yeova nu kulondela umu ngazo zyakwe isi nu mu membu zino walenzile Aina Izlaeli ukucita.
27 Baasya mwana Ahiya uwa mu ng’anda yakwe Isakali wamupangiile nupya wamukomiile uku Gibetoni, incende iyali iya Ina Filisti, Nadabu na Ina Izlaeli yonsi nayo yazingulwike umusumba wa Gibetoni.
28 Fwandi Baasya wamukomile umu mwaka wakwe citatu uwa kuteeka kwakwe Asa umu mpanga ya Yuda nupya wamupyanyile pa wene.
29 Nupya lino wizile aya sile umwene, wakomile amu ng’anda yakwe Yeloboamu yonsi. Atasilemo nanti aumwi. Wayakomile wakwe viivi kwene vino Yeova walanzile ukupitila muli Ahiya umuomvi wakwe uwa ku Syilo.
30 Cali vivyo pa mulandu ni membu zino Yeloboamu wacisile na vino walenzile Aina Izlaeli ukuyembuka alino na pa mulandu wakuti wasosizye sana Yeova Leza wa Ina Izlaeli.
31 Ilyasi lyonsi ilyasyala ilikalanda pali Nadabu na pali vyonsi vino wacisile, lyalembwa umwi buku lya mpiti ilikalanda pali ya mwene ya mu Izlaeli.
32 Nupya Asa na Baasya umwene wa mu Izlaeli yalwisyanyanga lyonsi.
33 Mu mwaka wakwe citatu uwa kuteeka kwakwe Asa umu Yuda, Baasya mwana Ahiya wizile aya umwene wa Ina Izlaeli ala akwikala umu Tiliza nupya wateesile pa myaka 24.
34 Lelo wasosyanga Yeova nupya walondelanga umu ngazo zyakwe Yeloboamu nu mu membu zino walenzile Aina Izlaeli ukucita.
Mafutunoti
^ Mu Ciebele: “Wamupeezile lampi.”
^ Izwi lya Ciebele lyakolana ni izwi ilikaomviwa uku usali. Nupya likaomviwa nu ku kulondolola icintu ca sile sile.
^ Lolini Ulondolozi wa Mazwi.
