1 Yamwene 17:1-24
17 Lyene Eliya* Umwina Tisyibe wanenyile Ahabu ati: “Nkulapa umwi zina lyakwe Yeova Leza wa Ina Izlaeli wino nkaombela ukuti umu myaka ilalondelelapo kutalaya ulumi nanti imvula kufikila lino ndalanda ukuti viyeko.”
2 Yeova wamunenyile ati:
3 “Fuma kuno nu kulungama uku ufumondaka nupya ukafisame umu Mukonko wa Keliti uwayela uku ufumondaka wa Luzi Lwa Yodani.
4 Uwamwa manzi ya mu luzi, nupya nakulatuma ya mwankole akulakuletela ivyakulya.”
5 Lilyo kwene sile wapisile nu kucita ukulingana na vino Yeova wamunenyile; waile aikala umupiipi nu Mukonko wa Keliti uku ufumondaka wa Luzi Lwa Yodani.
6 Katondo na manguzi ya mwankole yamutwalilanga umukate ni nyama, nupya wamwanga manzi ya mu luzi.
7 Lelo lino papisile manda, uluzi lwapwile pa mulandu wakuti imvula itatoonyanga umu mpanga.
8 Lyene Yeova wamunyile ati:
9 “Katuka, yanga uku Zalefati umusumba uwayela uku Sidoni nupya ukikale kuuku kwene. Nimanena mukamfwilwa kuti aakupeela ivyakulya.”
10 Fwandi wakatwike nu kuya uku Zalefati. Lino wafisile pa mpongolo ya musumba, waweni mukamfwilwa akutiiya inkwi. Lyene wamunenyile ati: “Napaapata mpeeleko manzi anono muli kapu akuti imwe.”
11 Lino wayanga umu kumuletela amanzi, Eliya wamunenyile ati: “Napaapata undeteleko nu mukate.”
12 Nawe walanzile ati: “Nkulapa umwi zina lyakwe Yeova Leza wako ukuti ntakweti umukate, nkweti sile tufulaulo utunono umu mpakwilo nu tumafuta tunono umu kasembo. Nkutiiya inkwi zinono pakuti nkapekanye ivyakuti tulye nu mwanane. Vikwene ivimaya ivyakulya vitu ivya kusyalikizya nupya pa cisila tumafwa.”
13 Lyene Eliya wamunenyile ati: “Utuvwa intete. Pitanga ukacite vino watulanda. Lelo inkoleelo umpangile umukate unono uzinguluke ukuomvya ivintu vino usile navyo, lyene undetele. Nupya pa cisila ungapekanya ivyakuti ulye pamwi nu mwanako.
14 Pano Yeova Leza wa Ina Izlaeli watalanda ati: ‘Fulaulo ali umu mpakwilo atalasila, na mafuta ali umu kasembo yatalasila kufikila pa wanda uno Yeova alalenga imvula ukutoonya umu mpanga.’”
15 Fwandi wapisile nu kuyacita vino Eliya walanzile, nupya wene na Eliya pamwi na amu ng’anda yakwe yakwatanga ivyakulya pa manda ingi.
16 Fulaulo uwali umu mpakwilo ataatazile asile, na mafuta ali umu kasembo nayo kwene yataatazile yasile wakwe viivi kwene vino Yeova walanzile ukupitila muli kasesema Eliya.
17 Pa cisila ca vintu vii, umwana umonsi wakwe mukamfwilwa walwile sana mpaka afwa.
18 Lyene umwanaci uzizye Eliya ati: “I cani cino naacita kuli wewe we muntu wakwe Leza wa cumi? Uzye wiiza kuno umu kunjiusya pali vino naluvyanya nu ku kukoma umwanane?”
19 Lelo wamunenyile ati: “Leta umwanako.” Lyene wamutozile nu kumusenda umu muputule wa papela uno wikalangamo nupya wamulaalike pali bedi yakwe.
20 Wapefile kuli Yeova ati: “We Yeova Leza wane, uzye umaleka mukamfwilwa wino nkwikalapo nawe kwene aacula? U mulandu ci uno watulekela umwanakwe ukufwa?”
21 Lyene winamile pa mwana imiku itatu nu kupepa kuli Yeova ati: “We Yeova Leza wane, napaapata leka umwana wii aye nu umi nupya.”
22 Yeova uvwile vino Eliya walenzile nupya umwana wizile aya nu umi nupya.
23 Eliya wasenzile umwana ukufuma umu muputule wa papela nu kumutwala kuli nyina, nupya walanzile ati: “Lola, umwanako ali nu umi.”
24 Umwanaci nawe wanenyile Eliya ati: “Lyene namanya ukuti umu cumi wewe muntu wakwe Leza, na mazwi yakwe Yeova yano walaanda acumi.”
Mafutunoti
^ Icikapiliula ukuti “Yeova ali Leza wane.”
