1 Yamwene 18:1-46
18 Lino papisile insita, umu mwaka wakwe citatu uwa cilala, Yeova wanenyile Eliya ati: “Yanga ukalolekele kuli Ahabu nupya ndaleta imvula umu mpanga.”
2 Fwandi Eliya waile alolekela kuli Ahabu ale umu Samaliya muli icipowe icipisye.
3 Pa nsita yii, Ahabu wamile Obadiya uwangalilanga isano. (Obadiya watiinanga sana Yeova,
4 nupya lino Yezebele wakomanga ya kasesema yakwe Yeova, Obadiya watozile ya kasesema 100 ayafisa umu macele yaili, umwi cele lyonga mwayanga ali 50, wayapeelanga nu mukate na manzi.)
5 Lyene Ahabu wanenyile Obadiya ati: “Yanga umu mpanga zyonsi umwaya inguzi nu mu mikonko yonsi. Limwi kungaya isote ilya kupeela imfwalasi na ya punda pakuti ivinyama vitu vitafwa vyonsi.”
6 Lyene yankiine impanga ino yali nu kuyako. Ahabu na Obadiya yalungime ukupusane.
7 Lino Obadiya wali pa lwendo, Eliya waile umu kumukomenkanya. Nupya lilyo kwene wamumanyile nu kufupama nupya wamuzizye ati: “Eliya musambazi wane, uzye awewe?”
8 Nawe wamwaswike ati: “Ee anene kwene. Pitanga ukanene umusambazi wako uti: ‘Eliya ali kuno.’”
9 Lelo Obadiya walanzile ati: “U luyembu ci luno naacita pakuti umpeele ne muomvi wako kuli Ahabu kuti ankome?
10 Nkulapa umwi zina lyakwe Yeova Leza wako nupya uwa umi ukuti kusi uluko nanti uwene kuno umusambazi wane ataatumako akuti yakakulonde. Lino yalanzile ukuti ‘usiko’ wayalenzile yalape ukuti yatakuzanyile.
11 Naawe ukunena ukuti, ‘Yanga ukanene umusambazi wako uti: “Eliya ali kuno.”’
12 Nga nafumapo, umupasi wakwe Yeova umakusenda uku ncende ino ntamanyile, nupya nga naya nanena Ahabu nawe wiza wakana ukukuzana, amaiza ankome. Nomba ne muomvi wako nkatiina Yeova ukufuma uku wance.
13 Musambazi wane, uzye utuvwa vino nacisile lino Yezebele wakomanga ya kasesema yakwe Yeova? Uzye utuvwa vino nafisile ya kasesema yakwe Yeova 100 umu macele yaili, ala umwi cele lyonga na lyonga yalimo 50, na vino nayapeelanga umukate na manzi?
14 Nomba lyene ukunene ukuti: ‘Yanga ukanene umusambazi wako uti: “Eliya ali kuno.’” Icumi kwene amaya akankome.”
15 Lelo Eliya walanzile ati: “Nkulapa umwi zina lyakwe Yeova wa maumba wino nkaombela nupya uwa umi ukuti ilelo nayalolekela kuli Ahabu.”
16 Lyene Obadiya waile umu kukomenkanya Ahabu nu kumunena pali Eliya. Nupya Ahabu waile umu kukomenkanya Eliya.
17 Lino Ahabu waweni sile Eliya, wamuzizye ati: “Uzye awewe wemuno watuleta intazi ikalamba pa Ina Izlaeli?”
18 Nawe waswike ati: “Ntalesile intazi pa Ina Izlaeli, lelo wewe kwene na amu ng’anda yakwe tata wako imuleta intazi, pano mwata ukulondela masunde yakwe Yeova nupya mukalondela ya Baali.
19 Nena Aina Izlaeli yonsi ukuti yakankomenkanye pa Mwamba wa Kalimeli, kumwi na ya kasesema yakwe Baali 450 na ya kasesema 400 aakapepa ulucesi ulwimike nupya aakulya pali tebo wakwe Yezebele.”
20 Fwandi Ahabu watumile akuyaama Aina Izlaeli yonsi nupya wakolonganike ya kasesema pa Mwamba wa Kalimeli.
21 Lyene Eliya wapalamile uku yantu yonsi nu kuyuzya ati: “Uzye mulatwalilila ukuya ni myenzo iili ukufika lilaci? Ndi cakuti Yeova ali Leza wa cumi, mulondelini; lelo ndi cakuti Baali ali leza wa cumi, mulondelini.” Nomba antu yatamwaswike icili consi.
22 Lyene Eliya wanenyile antu ati: “Nene indi kasesema sile wakwe Yeova uwasyala, lelo ya kasesema yakwe Baali yali aonsi 450.
23 Lekini yalete ya cipampasi yaili, lyene yasoolole cipambasi wenga, yamuputole umu vimpilinsya nu kumwika pa nkwi, lelo yatiikapo umoto. Nani nimacita vivyo kwene kuli cipambasi muze nu kumwika pa nkwi, lelo ntakwikapo umoto.
24 Lyene mupepe umwi zina lyakwe leza winu, nani nimapepa umwi zina lyakwe Yeova. Leza aamaasuka ukupitila umu kuleta umoto ale ali Leza wa cumi.” Lyene antu yonsi yalanzile iyati: “Cuvwika ningo cino walanda.”
25 Lyene Eliya wanenyile ya kasesema yakwe Baali ati: “Soololini cipambasi wenga nu kumukoma, pano mwemwe aingi. Lyene mupepe umwi zina lyakwe leza winu, lelo mutiikapo umoto.”
26 Fwandi yatozile cipambasi wino yapeezilwe nu kumupekanya, nupya yatwalilile ukupepa umwi zina lyakwe Baali ukufuma katondo ukufika akasanya ala yakuti: “Baali twasuke!” Lelo kutaali izwi nanti uwa kuyasuka. Yatwalilile ukutoloka ala yakucina ukuzinguluka ulambo uno yapanzile.
27 Lino cafisile umusanya pakasi, Eliya watandike ukuyaseka ati: “Pundisyini! Nga vino a leza! Limwi watasendwa na melenganyo nanti wataya uku cimbusu. Nanti limwi watakasula akulondekwa uwa kumuzyula.”
28 Yapundisyanga ala yakuicembola ni mipeni nu kuitotoola na masumo ukulingana nu lutambi lwao, mpaka amawazi iyatandika ukufuma monsi.
29 Insita ya musanya yapisile, nupya yatwalilile ukucita wakwe ya kasesema mpaka insita ya kupeela ilambo lya vyakulya ifika, lelo kutaali izwi nupya kutaali uwayaswike; kutaali nu wisileko amano.
30 Lyene Eliya wanenyile antu yonsi ati: “Palamilini kuli nene.” Nayo yapalime kuli aliwe. Nupya wazifizye ulambo wakwe Yeova muno utaali ningo.
31 Lyene Eliya watozile amawe 12 ukulingana ni mitundu yakwe ya mwana Yakobo, wino Yeova wanenyile ati: “Wakulaamwa ukuti Izlaeli.”
32 Wakuuzile ulambo umwi zina lyakwe Yeova ukuomvya mawe kwene yayo. Lyene wapanzile umwa kwikala amanzi ukuzinguluka ulambo, yaali incende ikulu ingingizya malita umupiipi na 15.
33 Lyene watantike ningo inkwi, aputola cipambasi umu vimpilinsya, alino amwika pa nkwi. Nupya walanzile ati: “Zuzyini amanzi umu nsembo izikalamba 4 nu kuitila api lambo lya koca na pa nkwi.”
34 Lyene wayanenyile ati: “Itilinipo nupya kwene.” Nayo itiilepo. Nupya kwene wayanenyile ati: “Itilinipo nu muku wakwe citatu.” Nayo itiilepo.
35 Pa ulambo ponsi paali amanzi, nupya wisile amanzi ukuzinguluka ulambo.
36 Mu nsita ya manguzi lino ilambo lya vyakulya likapeelwa, Eliya kasesema waile apa nkoleelo nu kalanda ati: “We Yeova Leza wakwe Abulahamu, Leza wakwe Isaki, nupya Leza wakwe Izlaeli, leka ilelo cimanyikwe ukuti wewe uli Leza umu Izlaeli nu kuti nene muomvi wako nupya wewe watunena ukuti incite vyonsi vii.
37 Ngasuke we Yeova! Ngasuke pakuti antu yaa yamanye ukuti we Yeova, wewe uli Leza wa cumi nu kuti wewe ukuyawezya kuli wemwineco.”
38 Lyene Yeova watumile umoto nu koca ilambo ilyali pa ulambo, inkwi, mawe, nu lukungu, nupya umoto wakamizye amanzi ali umu mbali ya ulambo.
39 Lino antu yonsi yaweni vivyo, lilyo kwene sile yafupime nupya yalanzile iyati: “Yeova ali Leza wa cumi! Yeova ali Leza wa cumi!”
40 Lyene Eliya wayanenyile ati: “Lemini ya kasesema yakwe Baali! Mutaleka ukuti nanti awenga autuke!” Lilyo kwene sile yayalemile, nupya Eliya wayatwazile uku luzi lwa Kisyoni nu kuyayakomela kuuku kwene.
41 Eliya wanenyile Ahabu ati: “Pitanga, kalye nu kumwa, pano nkuvwa icilulumo ca mvula iingi sana.”
42 Fwandi Ahabu waile umu kulya nu kumwa, Eliya nawe waile papela ya Mwamba wa Kalimeli, aya ainama afisya umutwe umupiipi na makokola.
43 Lyene Eliya wanenyile umuomvi wakwe ati: “Yanga papela ukalolekesye lwa kuli yemba.” Fwandi wacisile vino wamunenyile nupya wizile alanda ati: “Kusi icili consi.” Pa miku 7 Eliya wamunenanga ati, “Swilila.”
44 Pa muku uwalenga 7, umuomvi wakwe wizile alanda ati: “Kuli kalikumbi akanono akakuloleka wa lupi lwa muntu akakufuma pali yemba.” Lyene Eliya wamunenyile ati: “Yanga ukanene Ahabu uti, ‘Pekanya iceleta. Pitanga pakuti imvula itakuyalikizya.’”
45 Lyene cafiisizye nu muza iutandika ukupunga, ni mvula ikalamba yatandike ukutoonya nupya Ahabu watwalilile ukupisya iceleta ukuya uku Yezileele.
46 Lelo Yeova wapeezile Eliya amaka, nawe wanyefile icakuzwala cakwe umu musana nu kusimula aya akolelela Ahabu ukuya uku Yezileele.
