1 Yamwene 3:1-28
3 Solomoni wapangine upangano wa cupo na Falao umwene wa ku Ijipti. Watwazile mwana Falao nu kumutwala umu Musumba Wakwe Devedi kufikila lino wamazile ukukuula ing’anda yakwe ni ng’anda yakwe Yeova alino ni linga lya musumba wa Yelusalemu.
2 Lelo walanga antu yacili yakapeelela malambo pa ncende zya kupepelapo ya leza ya ufi, pano pa nsita iiya ala ing’anda pa kucindikila izina lyakwe Yeova itatala yakuulwa.
3 Solomoni watwalilile ukutemwa Yeova ukupitila umu kulondela masunde yano Devedi isi wamupeezile, lelo wene wapeelanga malambo ya koca pa ncende zya kupepelapo.
4 Umwene Solomoni waile uku Gibyoni mu kupeela malambo, pano kuuku kwene ukwali incende ikalamba iya kupepelapo. Wapeezile malambo ya koca 1,000 pa ulambo.
5 Lino Solomoni wali uku Gibyoni, Yeova walolekiile kuli aliwe usiku mu ciloto nupya wamunenyile ati: “Lenga cino ungatemwa ukuti nkupeele.”
6 Lyene Solomoni walanzile ati: “Wali sana nu kutemwa kwa cumi kuli Devedi tata nupya umuomvi wako, pano wali uwa cumi, uwa kaele nupya umulungami. Nupya watwalilila ukuya sana nu kutemwa kwa cumi kuli aliwe kufika na ndakai ukupitila umu kumupeela umwana uwa kwikala pa cilimba cakwe ica wene.
7 Lyene we Yeova Leza wane walenga ne muomvi wako ukupyana Devedi tata pa wene, nanti cakuti nene mwance nupya ntamanya ivya kuteeka.
8 Ne muomvi wako naya pa yantu yano wasoolola aaya aingi sana icakuti yatanga yapendwe.
9 Acino peela ne muomvi wako umwenzo wa cuvwila pakuti napingula antu yako, nu kulamanya icisuma ni ciipe, pano a weni angapingula antu yako aaya aingi sana?”*
10 Yeova uvwile ningo pali vino Solomoni walenzile.
11 Lyene Leza wamunenyile ati: “Pa mulandu wakuti vii avino walenga nupya utalenzile ukuti uwikale manda aingi nanti ivyuma nanti ukulengela alwani yako imfwa, lelo watulenga ukuti uye na mano pakuti uwapingula ningo imilandu,
12 nimacita vino watulenga. Nimakupeela mano nu kwiluka, pakuti wakwe viivi kwene vino kutaatala kwaya uwaya wakwe wewe, avino kutaca kuye alaya wakwe wewe nupya.
13 Nupya nimakupeela na vino utalenzile, kuli kuti vyuma nu lulumbi pakuti kutaca kuye umwene ali wensi aalaya wakwe wewe manda yonsi aumi wako.
14 Nupya ndi cakuti ukupita umu nzila zyane kupitila umu kulondela masunde yane, wakwe vino Devedi tata wako wali, ndakulenga nu kwikala manda aingi.”
15 Lino Solomoni wazyusile, wazanyile ukuti cali iciloto. Lyene waile uku Yelusalemu nu kuyaimilila pa nkoleelo ya mbokosi ya upangano yakwe Yeova nupya wapeezile malambo ya koca na malambo ya mutende, wapekanyizizye na aomvi yakwe yonsi umutebeto.
16 Pa nsita kwene iiya ya cizelele yaili yaile uku Mwene Solomoni nu kuyaimilila pa nkoleelo yakwe.
17 Umwanaci wenga walanzile ati: “Musambazi, mwanaci wii nani tukaikala umu ng’anda yonga, nupya nakweti umwana ale tukwikala nawe umu ng’anda.
18 Pa wanda wakwe citatu kufuma pano nakwatiile umwana, nawe kwene wapaafile. Twali sile yaili, kutaali muze wino twikalanga nawe umu ng’anda.
19 Usiku umwana wa mwanaci wii wafwile, pa mulandu wakuti wamulaalilile.
20 Fwandi wakatwike usiku pakasi atola umwanane ala ne muomvi winu inkasula amulaalika kuno waizi nupya watozile umwanakwe umufwe amulaalika pali nene.
21 Lino nakatwike katondo ukuti nonsye umwanane, naweni ukuti watafwa. Lyene namulolekisye sana nu kuzana ukuti asi ali mwana wino naviile.”
22 Lelo umwanaci muze walanzile ati: “Awe, nemo umwanane u mupuma, uwa kwako uwatafwa!” Umwanaci wa kutandikilako nawe walandanga akuti: “Awe, umwanako uwatafwa, nemo umwanane u mupuma.” Vikwene avino yapazyanyanga pa nkoleelo ya mwene.
23 Lyene umwene watiile: “Wii akuti, ‘Umwanane aewi umupuma, umwanako uwatafwa!’ wii nawe akuti, ‘Umwanako uwatafwa, nemo umwanane u mupuma!’”
24 Umwene walanzile ati: “Ndetelini ulupanga.” Nayo yamuletiile.
25 Lyene umwene watiile: “Putulini umwana umupuma pakasi, alino mupeele icipande conga uku mwanaci wii ni cuze uku mwanaci muze.”
26 Lilyo kwene sile umwanaci umwineco wa mwana umupuma, wapaapasile uku mwene pano uvwilile sana umwanakwe uluse. Walanzile ati: “Napaapata musambazi wane! Mupeelini umwana umupuma! Mutamukoma.” Lelo umwanaci muze walandanga ati: “Leka yamuputule paili! Pano lyene atamaya uwane nanti uwako.”
27 Lyene umwene walanzile ati: “Peelini umwana aali nu umi uku mwanaci wa kutandikilapo pano ali nyina! Mutamukoma.”
28 Aina Izlaeli yonsi yuvwile vino umwene wapingwile umulandu uu, nupya yamucindike sana, pano yaweni ukuti akutungululwa na mano yakwe Leza pa kupingula imilandu.
Mafutunoti
^ Nanti limwi, “atale.”
