1 Yamwene 5:1-18
5 Lino Hilamu umwene wa ku Tuli uvwile ukuti Solomoni watasontwa ukupyana isi pa wene, watumile aomvi yakwe kuli aliwe, pano Hilamu wali a cuza wakwe Devedi.
2 Solomoni nawe watumile mazwi kuli Hilamu ati:
3 “Wamanya ningo ukuti Devedi tata ataakuuzile ing’anda apa kucindikila izina lyakwe Yeova Leza wakwe pa mulandu wakuti yamulwisyanga ukufuma umu ncende zyonsi kufika lino Yeova wamwavwile ukucimvya alwani yakwe.
4 Nomba lyene Yeova Leza wane wandenga ukupuuza umu ncende zyonsi. Kusi akunkaanya nupya kusi iviipe ivili vyonsi vikucitika.
5 Nkulonda ukukuula ing’anda pa kucindikila izina lyakwe Yeova Leza wane, wakwe vino Yeova walavile Devedi tata, ukuti: ‘Mwanako wino ndapyanika pa cilimba cako ica wene, aalakuula ing’anda pa kucindikila izina lyane.’
6 Fwandi nena antu yako ukuti yankomele imikedali iya mu Lebanoni. Aomvi yane yalaombela pamwi na aomvi yako, nupya ndalipila aomvi yako kulingana na vino ulapingula, pano wamanya ukuti kusi nanti aumwi muli sweswe uwamanya ukukoma imiti wa Ina Sidoni.”
7 Lino Hilamu uvwile mazwi yakwe Solomoni wasansamwike sana nu kulanda ati: “Si Yeova alumbanyiziwe ilelo, pano watapeela Devedi umwana uwa mano uwa kutungulula antu yaa aingi!”
8 Lyene Hilamu watumile mazwi kuli Solomoni ati: “Inuvwa mazwi yano watumile kuli nene. Ndacita vyonsi vino ukulonda, ndapekanya imikedali ni mbao zya milemo.
9 Aomvi yane yalazifumya uku Lebanoni nu kuzileta kuli yemba, nupya ndazinyepelela pamwi nu kuleka zyaelela pali yemba mpaka zice zifike uku ncende ino ulanena. Kuuku kwene akuno ndaziputolela, naawe uce uzisende. Lyene naawe uce upekanyizizye amu ng’anda yane ivyakulya.”
10 Fwandi Hilamu wapekinye imbao zya mikedali ni zya milemo zino Solomoni walondanga.
11 Nupya Solomoni wapeezile Hilamu ingano makilogilamu 3,200,000 kuti ziye ivyakulya ku ya mu ng’anda yakwe na malita 4,400 aamafuta ya miolivi asuma sana. Vikwene avino Solomoni wapeelanga Hilamu cila mwaka.
12 Yeova wapeezile Solomoni mano wakwe viivi kwene vino wamulavile. Nupya paali umutende pali Hilamu na Solomoni; yoili yapangine upangano.
13 Umwene Solomoni wamile aonsi 30,000 ukufuma umu Ina Izlaeli yonsi aakuti yamuombela.
14 Wayatumanga uku Lebanoni, cila mwezi watumanga aali 10,000. Iikalanga kuuku kwene pa mwezi onga lyene pa myezi iili yayanga pa mang’anda yao; Adonilamu u wangalilanga aonsi yaa.
15 Solomoni wakweti aomvi 70,000 aakuomba imilimo ipusanepusane na aomvi 80,000 aaputulanga mawe umu myamba,
16 wakweti ni ntunguluzi 3,300 izyangalilanga aomvi yakwe.
17 Kulingana na vino umwene walanzile, imbanga mawe akalamba na mawe ya mutengo, lyene iyayaputola pakuti yangaomviwa ukukuulila umufula wa ng’anda.
18 Lyene ya kakuula yakwe Solomoni na ya kakuula yakwe Hilamu na Ina Gebali yaputulanga mawe yayo, nupya yapekinye imbao na mawe ya kukuulila ing’anda.
