1 Yamwene 6:1-38
6 Mu mwaka uwalenga 480 kufuma pano Aina Izlaeli yafumiile umu Ijipti, mu mwaka uwalenga 4 kufuma lino Solomoni watandike ukuteeka umu Izlaeli, mu mwezi wa Zivu* (kuli kuti, mu mwezi wakwe ciili), Solomoni watandike ukukuula ing’anda yakwe Yeova.
2 Ing’anda ino Umwene Solomoni wakuulile Yeova yaali mamita 27 mu utali, mu kusaalala mamita 9, ukuya umupela namo mamita 13.
3 Umuputule uwali apa kwingilila umwi tempele wali mamita 9 mu utali,* walingine nu kusaalala kwa ng’anda. Muputule uwa kwingilila umwi tempele wali mamita 4 na afu ukuya panzi.
4 Wapanzile mawindo aku ng’anda aakweti mafulemu akuliile umukasi.
5 Nupya wakuuzile iciumba na cuze mu mbali ya ciumba ca ng’anda; cazingulwike ing’anda, itempele, nu muputule uwa mukasi, nupya wakuuzile imiputule iya mu mbali ukuzinguluka itempele.
6 Pa miputule iya mu mbali, muputule uwa pansi wali mamita yaili umu kusaalala; muputule uwa pakasi nao wakweti mamita yatatu, wakwe citatu nao wakweti mamita yatatu, wakuuzile iciumba ukuzinguluka ing’anda yonsi pakuti kutaya icili consi ca kusintilizya pa ciumba ca ng’anda.
7 Ing’anda yakuuzilwe na mawe yano iimvile nu kuputolela limwi, pakuti inondo nanti impasa nanti ivyela vitauvwika lino ing’anda ikukuulwa.
8 Mulyango wa mu muputule uwa pisika walozizye uku kaeya ka ng’anda, paali na masitepu akuyila umu muputule wa pakasi, na akufumila umu muputule uwo kuya umu muputule wakwe citatu.
9 Wakuuzile ing’anda mpaka amala nupya waipaalike ukuomvya imiti ya mikedali ni vipampa vya miti kwene iiyo.
10 Wakuuzile imiputule ya mu mbali kuzinguluka ing’anda yonsi, cila muputule watalimfile mamita yaili ukuya umupela nupya wailemenkinye uku ng’anda ukuomvya imbao zya mikedali.
11 Lyene Yeova wanenyile Solomoni ati:
12 “Ukulozya uku ng’anda ino ukukuula, ndi cakuti umalondelanga masunde yane yonsi, ndafikilizya ulayo uno nalavile Devedi tata wako,
13 ndatwalilila ukuya na Ina Izlaeli nupya ntalayatazyela.”
14 Solomoni watwalilile ukukuula ing’anda mpaka amala.
15 Iviumba vya mukasi vyapangiilwe ni vipampa vya mikedali. Ku ciumba ca mukasi wakambatikeko ivipampa vya mikedali kufuma pansi kufika nu mupela nupya pansi wakambatikepo ivipampa vya milemo iikaamwa ukuti yunipa.
16 Ukwi tundu lya ng’anda wakuuzileko umuputule uwakweti mamita 9 ukuomvya ivipampa vya mikedali, kufuma pansi kufika umupela, nupya umu muputule uwo wapanzilemo umuputule na uze, kuli kuti umuputule wa Muzilo Sana.
17 Nupya umuputule* uwali pa nkoleelo ya muputule wa Muzilo Sana wali mamita 18.
18 Pa mikedali ya ku ciumba ca mukasi yalenzilepo inkolo na maluwa awalule. Ku ciumba consi kwali mikedali; kutaali iwe ilyalolekanga.
19 Nupya wapanzile umuputule wa mukasi sana umwa kwika imbokosi ya upangano yakwe Yeova.
20 Umuputule wa mukasi sana wakweti mamita 9 umu utali, na mamita 9 mu kusaalala alino na mamita 9 kuya umupela; nupya uku ciumba wapasileko goldi umwengululwe ningo, ku ulambo nako wisileko imbao zya mikedali.
21 Ku viumba vya mukasi Solomoni wapasileko goldi umwengululwe ningo, nupya pa nkoleelo ya muputule wa mukasi sana uwapasilweko goldi wisilepo maceni yakwe goldi.
22 Ku viumba vya mukasi ka ng’anda vyonsi wapasileko goldi; nu ku ulambo uwali umupiipi nu muputule wa mukasi sana wapasileko goldi.
23 Mu muputule wa mukasi sana wapanzilemo ya kelubi yaili ukuomvya imbao zya milemo iikaamwa ukuti paini,* cila kelubi watalimfile mamita 4 na afu.
24 Cila kwapa lyakwe kelubi uwa kutandikilapo lyatalimfile mamita yaili. Kufuma uku mpela iikwapa lyonga kufika uku mpela iikwapa lyuze patalimfile mamita 4 na afu.
25 Kelubi wakwe ciili nawe kwene wali mamita 4 na afu. Ya kelubi yoili kwene yalinganyile nupya yalolekanga icili cimwi.
26 Kelubi wenga watalimfile mamita 4 na afu wakwe vino nu muze wali.
27 Lyene wisile ya kelubi mu muputule wa mukasi.* Ikwapa lyakwe kelubi wenga lyakonzolwilwe ukufika uku ciumba conga na lyakwe kelubi muze lyakonzolwilwe ukufika uku ciumba cuze, nupya maapa yauze yakonzolwilwe pakasi ka ng’anda nu kukumyanya.
28 Nupya kuli ya kelubi wisileko goldi.
29 Nupya uku viumba vyonsi vya mu miputule iya mukasi ni ya kunzi walenzileko ya kelubi, utuncindu na maluwa awalule.
30 Nupya pansi ya miputule iya mukasi ni ya kunzi wapasilepo goldi.
31 Lyene pa mulyango wa kwingilila umu muputule wa mukasi sana wapangiilepo ivisaasa ukuomvya imbao zya milemo ino yakaama ukuti paini, incesi zya mu mbali na mafulemu; iciumba cakweti imbali 5 zilingane.*
32 Ivisaasa viili vyapangiilwe ni mbao zya milemo ino yakaama ukuti paini, walenzilepo na ya kelubi, utuncindu, na maluwa awalule, nupya wisileko goldi; pa vikope vyakwe ya kelubi na pa tuncindu wisilepo goldi.
33 Pa mulyango wa kwingilila umu muputule,* napo kwene wisilepo mafulemu apangiilwe ni mbao zya milemo ino yakaama ukuti paini, ciumba cakweti imbali 4 zilingane.*
34 Nupya wapanzile ivisaasa viili ukuomvya imbao zya milemo ino yakaama ukuti yunipa. Visaasa vyoili kwene vyapetekanga pakasi.
35 Walenzilepo ya kelubi, utuncindu, na maluwa awalule, nupya pa vintu vivyo wisilepo goldi.
36 Nupya wakuuzile imilaini itatu kuzingulusya umusolo wa mukasi, wisilepo ni mbao zya mikedali.
37 Mu mwaka uwalenga 4, mu mwezi uwa Zivu,* mufula wa ng‘anda yakwe Yeova wasizile ukupangwa;
38 nupya umu mwaka uwalenga 11 mu mwezi wa Buli* (kuli kuti, mu mwezi walenga 8), ing’anda yonsi yasizile ukukuulwa, fwandi Solomoni wakuuzile ing’anda iiyo pa myaka 7.
Mafutunoti
^ Lolini Ivyeo na Vyuze pa B15.
^ Nanti “mu kusaalala.”
^ Kuli kuti muputule wa Muzilo.
^ Mu Ciebele: “Imbao zya mafuta.”
^ Kuli kuti Umwa Muzilo Sana.
^ Limwi cingalozya uku kupanga mafulemu ya visaasa nanti ku ukulu wa visaasa.
^ Kuli kuti umu Muputule wa Muzilo.
^ Limwi cingalozya uku kupanga mafulemu ya visaasa nanti uku ukulu wa visaasa.
^ Lolini Ivyeo na Vyuze pa B15.
^ Lolini Ivyeo na Vyuze pa B15.
