1 Yamwene 7:1-51
7 Casendiile Solomoni myaka 13 pakuti amale ukukuula ing’anda yakwe.
2 Nupya wakuuzile ing’anda ino yamanga ukuti Mutengo wa Lebanoni iyaali mamita 44 na afu mu utali, mu kusaalala namo yaali mamita 22, nu kuya umupela mamita 13, ing’anda iiyo yaali pa milaini 4 iya ncesi zya mikedali; nupya papela ya ncesi pali ya mutali aamikedali.
3 Papela ya mbao zino yalambalike pa ncesi yapofilepo ivipampa vya mikedali, zyali 45, nupya muli cila mulaini mwayanga izili 15.
4 Ing’anda yakweti milaini itatu iya mawindo, cila windo lyalozyanyanga ni lyuze mu mulaini uwakweti mawindo yatatu.
5 Milyango yonsi na mafulemu vyali ivilingane, wakwe vino na mawindo yonsi aalozyanyizye yalinganyile mu milaini yonsi itatu.
6 Lyene wakuuzile icikuulwa ca ncesi icali mamita 22 mu utali nu mu kusaalala mamita 13, lyene pa nkoleelo walunzilepo ulukungu lwa ncesi aikapo na kalipaala.
7 Wakuuzile ni cikuulwa ca wene umwa kupingwila imilandu, kuli kuti cikuulwa ca upinguzi, nupya yapofileko imikedali kufuma pansi ukufika papela.
8 Ing’anda muno wali nu kulaikala iyayelile umu musolo uze, yayelile ukwi tundu lya Cikuulwa, nupya waomvizye ivya kukuulila ivili vimwi. Wakuuliile na mwana Falao uwali umuci wakwe ing’anda iyakoline ni Cikuulwa kwene cii.
9 Vyonsi vii vyakuuzilwe na mawe aputulwe ningo, alinganye ukunzi nu mukasi kuomvya ivya kuputwilako, vikwene avino yakuuzile ukufuma pa mufula kufika papela ya ciumba, nu kunzi kufika nu ku musolo ukalamba.
10 Mufula wakuuzilwe na mawe akalamba sana nupya amutengo, mawe yamwi yaali mamita 4 na afu yauze nayo yaali mamita yatatu na afu.
11 Nupya papela ya mufula paali mawe amutengo aputulwe ningo alino ni mikedali.
12 Wakuuzile imilaini itatu kuzinguluka umusolo ukalamba ukuomvya mawe aputule ningo, walambalikepo ni miti ya mikedali wakwe vino wacisile nu ku musolo wa mukasi uwa pa ng’anda yakwe Yeova nu ku lukungu lwa ng’anda.
13 Umwene Solomoni watumile aakuyaama Hilamu kufuma uku Tuli.
14 Wali umwana wakwe mukamfwilwa kufuma umu mutundu wakwe Nafutali nupya isi wali Umwina Tuli uwamanyile sana ukupanga ivintu kuomvya koopa; Hilamu wali umucenjele sana nupya wamanyikisye ukupanga ivintu kuomvya koopa. Fwandi waile uku Mwene Solomoni nu kuyamwazwa imilimo yakwe yonsi.
15 Wapanzile incesi ziili zyakwe koopa; cila lucesi lwali mamita 8 kuya umupela, nupya intambo iingazinguluka ulucesi longa ingaya mamita 5.*
16 Nupya wapanzile ivyali wa ntendo viili vyakwe koopa ivya kwika papela ya ncesi. Cila ntendo yaali mamita yaili ukuya umupela.
17 Yayemvizye intendo zizyo ukuomvya tuno yapikwile nu tumaceni; ku ntendo yonga kwali utuli 7 nu ku ntendo yuze tuli 7.
18 Wapanzile imilaini iili ya mapomegilaneti aakuzingulusya ku tupikule utwa ku ntendo izyali papela ya ncesi; wacisile vivyo kwene uku ntendo zyonsi zyoili.
19 Intendo izyali papela ya ncesi zya ku cikuulwa zyali wi luwa ilingatalimpa mamita yaili.
20 Ntendo zyateesilwe pa ncesi ziili, nupya kuli cila ntendo kwali umulaini uwazingulwike uwakweti mapomegilaneti 200.
21 Wimike incesi pa nkoleelo yi tempele. Wimike ulucesi lwa kwi lunji alutemela ni zina lyakuti Yakini,* nupya wimike ulucesi lwa kuli cimani alutemela ni zina lyakuti Boasi.*
22 Nupya papela, incesi zyalolekanga wi luwa. Lyene umulimo wa kupanga incesi wasizile.
23 Lyene wapanzile itanki lyakwe koopa. Lyali ilizinguluke nupya lyali mamita 4 na afu, kuya umupela namo lyali mamita yaili, intambo iingalizinguluka ingaya mamita 13.
24 Nupya lwa mwisika yaliyemvizye lyonsi ni nkolo kulizinguluka, inkolo zyali mu milaini iili nupya apali masentimita 44 na afu payanga inkolo 10, zyapangiilwe kumwi ni tanki.
25 Yaliteesile pali ya cipambasi 12, ya cipambasi yatatu yalozizye uku katutu, yauze yatatu nayo yalozizye uku uwondaka, lyene yauze yatatu nayo yalozizye uku kaeya, alino asyala yatatu nayo yalozizye uku ufumondaka; yonsi yalozizye ica musinda umukasi.
26 Nupya itanki lyali ilitimbe wa cizanza nupya lyakweti umulomo kwati uwakwe kapu, wi luwa iliwalule. Lingizyanga malita 44,000 aamanzi.
27 Lyene wapanzile ivya kusendelapo ivintu vyakwe koopa ivili 10. Conga na conga cali mamita yaili umu utali, nu mu kusaalala namo mamita yaili, lyene ukuya umupela namo mita wenga.
28 Vii ali vino ivya kusendelapo ivintu vyapanzilwe: Vyakweti vipampa vyakwe koopa umu mbali, nupya ivipampa vivyo vyali pakasi ka tusimbi.
29 Ku vipampa ivyali pakasi ka tusimbi yayemvizyeko ya cisama, ya cipambasi, na ya kelubi, nupya vivyo kwene avino isile na pa tusimbi. Papela na pisika lyakwe ya cisama na ya cipambasi pali vimwi ivyalolekanga kwati ivipikule.
30 Cila ca kusendelapo cakweti matayala 4 yakwe koopa na masipindulo yakwe koopa ni visimbi 4 ivyali umu makoona ivyatungililanga matayala. Mwisika lyakwe beseni mwali ivya kutungilila ivyakweti vimwi ivyalolekanga wa vipikule.
31 Umulomo wakwe beseni wazwisilweko icisote ca wene, icali masentimita 44 na afu ukuya umupela; lyene umulomo wa cisote ca wene ni vya kutungilila vyapanzile ica kuteekapo icali masentimita 67 ukuya umupela nupya uku mulomo kwali ivilenge. Vipampa vya mu mbali vyali ivya makoona.
32 Matayala 4 yaali umwisika lya vipampa, nupya ivyatungililanga matayala vyalemenkine ni vya kusendelapo nupya matayala yatalimfile mita wenga.
33 Matayala yapanzilwe wa matayala ya kwi celeta. Vya kutungilila, malimu, masipoko, na maabu vyonsi vyali ivya cela.
34 Vya kusendelapo ivintu vyakweti vya kutungilila umu makoona yonsi 4; ivya kutungilila vyalemenkine ni vya kusendelapo.
35 Cizinguluke icali pa ca kusendelapo cali masentimita 22 kuya umupela nupya utusimbi ni vipampa ivyali papela vyakumbilinkine ni ca kusendelapo.
36 Ku tusimbi nu ku vipampa wayemvizyeko na ya kelubi, ya cisama, nu tuncindu monsi umwali incende, nupya ukuzinguluka konsi kwali vimwi ivyalolekanga wa vipikule.
37 Vikwene avino wapanzile ivya kusendelapo ivintu 10; vyonsi vyalolekanga icili cimwi, nupya vyali ivilingane.
38 Wapanzile mabeseni yakwe koopa 10; cila beseni wingizyanga malita 880. Beseni wenga wali mamita yaili nupya pa ca kusendelapo ivintu conga na conga payanga beseni.
39 Lyene wisile ivya kusendelapo ivintu 5 ku lusansa lwi lunji ulwa ng’anda, ni vyuze 5 wavisile uku lusansa lwakwe cimani, nupya wisile ni tanki ku lusansa lwi lunji lya ng’anda lwa ku kaeya.
40 Hilamu wapanzile mabeseni na yauze, ya fosyolo, ni mbale.
Lyene wamazile ukupanga vyonsi vino wali nu kupangila Umwene Solomoni pa ng’anda yakwe Yeova, kuli kuti
41 incesi ziili, intendo ziili izyali papela ya ncesi, nu tupikule twili utwa kwika umu mbali ya ntendo zizyo;
42 mapomegilaneti 400 aakwika uku tupikule, cila kapikule kakwatanga imilaini iili iya mapomegilaneti akuzingulusya uku ntendo ziili izyali pa ncesi;
43 vya kusendelapo ivintu 10 na mabeseni 10 aakwikapo;
44 itanki na ya cipambasi 12 aali umwisika li tanki lilyo;
45 ni mbeketi, ya fosyolo, imbale ni viya vyonsi vino Hilamu wapangiile Umwene Solomoni kuomvya koopa umuyengese ivya kwika umu ng’anda yakwe Yeova.
46 Vyonsi vii umwene wavipanzile ukuomvya ivikombole mu citungu ca Yodani pakasi ka ncende ya Sukoti na Zaletani.
47 Solomoni ataapimile ukufina kwa viya vyonsi vino wapanzile pano vyali ivingi sana. Kufina kwakwe koopa wino yaomvizye kutamanyikwe.
48 Solomoni wapanzile iviya vyonsi vya mu ng’anda yakwe Yeova, kuli kuti ulambo wakwe goldi, tebo wakwe goldi uwa kwikapo mukate wa muzilo;
49 vya kuteekapo ya lampi vyakwe goldi umwengululwe ningo, vili 5 vyali ukwi lunji ni vili 5 vyali kuli cimani umupiipi nu muputule wa muzilo sana; na maluwa, ya lampi, ni vya kulemelako umoto, iviya vyonsi vyali ivyakwe goldi;
50 mabeseni, vya kuzimizyako umoto, imbale, makapu, ni vya kusendelako umoto, vii vyonsi vyali ivyakwe goldi umwengululwe ningo; utwa kwingizyamo ivisaasa vya mu muputule wa mukasi, kuli kuti Umwa Muzilo Sana, nu twa ku visaasa vya mu muputule wa muzilo tonsi twali utwakwe goldi.
51 Umwene Solomoni wamazile ukuomba imilimo yonsi ya pa ng’anda yakwe Yeova. Lyene wisilemo ivintu vino Devedi isi wapaatwile ukuti viye ivya muzilo, nupya wisile siuva na goldi ni vintu vyuze mu miputule imwi ya mu ng’anda yakwe Yeova.
Mafutunoti
^ Nanti “cila lucesi lwali mamita 5 ukuzinguluka.”
^ Icikapiliula ukuti “Si alenge, kuli kuti Yeova.”
^ Limwi cikapiliula ukuti “Ciye icikome.”
