1 Yamwene 9:1-28
9 Lino Solomoni wamazile sile ukukuula ing’anda yakwe Yeova, isano na vyonsi vino walondanga ukupanga,
2 Yeova walolekiile kuli aliwe umuku wakwe ciili, wakwe vino walolekiile kuli aliwe uku Gibyoni.
3 Yeova wamunenyile ati: “Inuvwa ipepo lyako nu kupaapata kwako. Ing’anda yii ino watukuula yatisangululwa nupya izina lyane lilatwalilila ukuyapo manda pe, ndaisakamala nu kuicingilila.
4 Naawe ndi cakuti umambombelanga umu cumi nu kuya uwa kaele lino ukumbombela wakwe vino Devedi tata wako wali, ukupitila umu kucita vyonsi vino nakunena nupya ndi cakuti umalondelanga masunde yane,
5 lyene ndaleka uwene wako utwalilile umu Izlaeli, wakwe vino nalavile Devedi tata wako ukuti, ‘Lyonsi umu lupwa lwako mulaaya uwa kwikala pa cilimba ca wene umu Izlaeli.’
6 Lelo ndi cakuti wemo na ana yako mwata ukundondela, nu kusunga masunde yano namupeela mwaya nu mukuombela ya leza yauze nu kuyafukamila,
7 ndonona Aina Izlaeli umu mpanga ino nayapeela, ndonona ni ng’anda ino nasangulula kuti pacindikilwa izina lyane, nupya Aina Izlaeli yalayaseka nu kuyatumfya uku yantu yonsi.
8 Ing’anda yii ilononwa. Na wensi uwapita umupiipi alailolekesya nu kuzunguka nupya alalanda ni mitumfyo ati, ‘U mulandu ci uno Yeova wacitila vii uku mpanga yii nu ku ng’anda yii?’
9 Lyene yalalanda yati, ‘A pa mulandu wakuti yapondokile Yeova Leza wao, uwafumizye ivikolwe vyao mu mpanga ya Ijipti, nupya yaile kuli ya leza yauze iyatandika ukuyafukamila nu kuyaombela. Ali mulandu uno Yeova wataletela intazi zii zyonsi pali aliyo.’”
10 Pa mpela ya myaka 20 ino Solomoni wakuuzile mang’anda yaili, kuli kuti ing’anda yakwe Yeova ni sano,
11 walanga Hilamu umwene wa ku Tuli wapeela Solomoni mikedali ni mbao zya milemo ino yakaama ukuti yunipa na goldi umwingi wino walondanga, nupya Umwene Solomoni wapeezile Hilamu imisumba 20 umu Galili.
12 Fwandi Hilamu wafumile uku Tuli nu kuya umu kulola imisumba ino Solomoni wamupeezile, lelo ataitemilwe.
13 Uzizye ati: “Mwinane, i misumba ya musango cii yii ino watumpeela?” Fwandi yatandike ukwama imisumba iiya ukuti mpanga ya Kabulu* kufika na ndakai.
14 Lyene Hilamu watumile matalanti* 120 yakwe goldi uku mwene.
15 Likwene ali lyasi ilikalanda pali yano Umwene Solomoni wamile ukuti yamuombela umulimo wa kukuula ing’anda yakwe Yeova, isano, Milo,* ilinga lya musumba wa Yelusalemu, musumba wa Hazoli, musumba wa Megido nu musumba wa Gezeli.
16 (Falao umwene wa ku Ijipti waile nu kupoka umusumba wa Gezeli nupya waosile nu moto, akoma na Ina Kenani aikalangamo. Fwandi waupeezile ukuya upe wa pa winga uku mwanakwe umukazyana umuci wakwe Solomoni.)
17 Solomoni wakuuzile umusumba wa Gezeli, musumba wa Beti-holoni uwayelile ukwisika,
18 musumba wa Baalati, nu musumba wa Tamala uwali umu lwanga umu mpanga yakwe iya Izlaeli,
19 ni misumba yonsi umwa kusungila ivintu, misumba umwa kusungila maceleta, misumba umwa kwikala aakwelanga pa mfwalasi, na vyonsi vino walondanga ukukuula umu Yelusalemu, mu Lebanoni, nu mu mpanga yonsi ino wateekanga.
20 Lelo antu yonsi asyala afumile umu Ina Amoli, mu Ina Hiti, mu Ina Pelizi, mu Ina Hivi nu mu Ina Yebusi, aataali umu Ina Izlaeli,
21 asyazile umu mpanga, kuli kuti yano Aina Izlaeli yataakomile, Solomoni wayalenzile ukuti yaomba imilimo ya uzya kufika na ndakai kwene.
22 Lelo Solomoni atalenzile Aina Izlaeli ali yonsi ukuya azya pano yaali asilika yakwe, aomvi yakwe, ya cilolo yakwe, aatungululanga asilika, aatungululanga apisyanga maceleta na aakwelanga pa mfwalasi.
23 Kwali akalamba 550 aatungululanga intunguluzi izyangalilanga umulimo wakwe Solomoni, kuli kuti aonsi angalilanga aombanga umulimo.
24 Lelo umwanaci mwana Falao wafumile uku musumba wakwe Devedi nu kuya uku ng’anda yakwe ino Solomoni wamukuulile; lyene wakuuzile Milo.*
25 Miku itatu umu mwaka Solomoni wapeelanga malambo ya koca na malambo ya mutende pa ulambo uno wakuulile Yeova, ocanga na malambo pa ulambo uwali pa nkoleelo yakwe Yeova, pa nsita iiya walanga wamala ukukuula ing’anda.
26 Umwene Solomoni wapanzile na mawato aingi mu Ezioni-gebeli iyayela umupiipi na Eloti mu mbali yakwe Yemba Muyenzu mu mpanga ya Edomu.
27 Hilamu watumile aomvi yakwe aamanyikisye ukupita pali yemba, pamwi na mawato aingi pakuti yakaombela pamwi na aomvi yakwe Solomoni.
28 Yaile uku Ofili nu kuyasenda matalanti yakwe goldi 420 iyayaleta uku Mwene Solomoni.
Mafutunoti
^ Nanti limwi, “Mpanga ya sile sile.”
^ Italanti lyonga lyafinanga makilogilamu 34.2. Lolini Ivyeo na Vyuze pa B 14.
^ Mu Ciebele izwi likapiliula ukuti “kuzuuzya.”
^ Mu Ciebele izwi lii likapiliula ukuti “kuzuuzya.”
