2 Milandu 1:1-17
1 Solomoni mwana Devedi wakwatiileko maka umu wene, nupya Yeova Leza wakwe wali nawe nupya wamulenzile ukukwatisya maka.
2 Solomoni wamile Aina Izlaeli yonsi, intunguluzi zya pa yantu masauzandi, ni ntunguluzi zya pa yantu 100, ya kapingula, intunguluzi zya Ina Izlaeli zyonsi, ni ntunguluzi zya ndupwa.
3 Lyene Solomoni na antu yonsi yaile uku ncende ya muzilo uku Gibyoni, pano kuuku kwene u kwali itenti lya kupepelapo lyakwe Leza wa cumi, lino Mose umuomvi wakwe Yeova wapanzile umu lwanga.
4 Lelo walanga Devedi wafumya Imbokosi ya Upangano yakwe Leza wa cumi uku Kilyati-yelimu nu kuitwala uku ncende ino wapekinye; wapanzile itenti umwa kwika Imbokosi ya Upangano uku Yelusalemu.
5 Nupya ulambo wakwe koopa uno Bezalele mwana Uli, mwana Huli wapanzile wali umupiipi ni cikuulwa ca muzilo cakwe Yeova nupya Solomoni na antu yonsi yayanga umu kupepela pa nkoleelo ya ulambo.
6 Lyene Solomoni wapeezile malambo ya koca 1,000 kuli Yeova pa ulambo wakwe koopa uwali api tenti lya kupepelapo.
7 Usiku kwene uuwa Leza walolekiile kuli Solomoni nu kumunena ati: “Lenga cino ungatemwa ukuti nkupeele.”
8 Solomoni nawe walanzile ati: “Wali sana nu kutemwa kwa cumi kuli Devedi tata, nupya wanjika pa cilimba cakwe ica wene.
9 Fwandi we Yeova Leza, leka ulayo uno walavile Devedi tata ufikiliziwe, pano wandenga ukuya umwene pa yantu aingi sana wa mucanga.
10 Mpeele mano na maka ya kumanya ivintu pakuti natungulula antu yaa, pano a weni angatungulula antu yako yaa aavula vii?”
11 Lyene Leza wanenyile Solomoni ati: “Pa mulandu wakuti vii avino walenga nupya utalenzile ivyuma, ucindami, nanti imfwa ya yalwani yako, utalenzile nu kuti uwikale manda aingi, lelo watulenga mano na maka ya kumanya ivintu pakuti uwapingula antu yane yano nalenga ukuti wateeka,
12 nimakupeela mano na maka ya kumanya ivintu; nimakupeela ni vyuma nu ucindami, vino ya mwene yonsi aakukoleelile yataatazile yakwatepo nupya vino kusi ali wensi alakwatapo.”
13 Fwandi Solomoni wafumile pa ncende ya kupepelapo uku Gibyoni, apaali itenti lya kupepelapo nu kuya uku Yelusalemu; nupya watandike ukuteeka Aina Izlaeli.
14 Solomoni watwalilile ukukwatilako maceleta ni mfwalasi;* wakweti maceleta 1,400 ni mfwalasi 12,000, wavisungiile umu misumba ya kusungilamo maceleta nu mu Yelusalemu mupiipi na kuno wikalanga.
15 Umwene wavuzizye siuva na goldi umu Yelusalemu kwati amawe, ni miti ya mikedali kwati imisamvu iyaya umu Syefela.
16 Imfwalasi zyakwe Solomoni yazifumyanga uku Ijipti, nupya aculuzi ya mwene yakalanga imfwalasi izingi* pa mutengo uli umwi.
17 Cila celeta ilyafumanga uku Ijipti yalikalanga pa mpiya zyakwe siuva 600, ni mfwalasi nayo pa mpiya zyakwe siuva 150; lyene yavitwalanga kuli ya mwene yonsi ateekanga Aina Hiti na kuli ya mwene ya ku Silya.
Mafutunoti
^ Nanti “aonsi aakwelanga pa mfwalasi.”
^ Nanti limwi, “ukufuma uku Kue,” ingalozya na kuli Silisya.
