2 Milandu 13:1-22
13 Mu mwaka uwalenga 18 uwa kuteeka kwa Mwene Yeloboamu, Abiya wizile aya umwene umu mpanga ya Yuda.
2 Wateesile imyaka itatu umu Yelusalemu. Nyina wali a Mikaya mwana Uliyeli uwa ku Gibeya. Nupya Abiya na Yeloboamu yalwisyanyanga.
3 Lyene Abiya waile umu ulwi na asilika 400,000 aamaka aasambiliziwe ivya kulwa. Yeloboamu nawe waile umu kumulwisya ala asenzile asilika yakwe aamaka 800,000 aasambiliziwe ivya kulwa.
4 Abiya wimilile pa Mwamba wa Zemalaimu uwaya umu ncende ya myamba yakwe Efulemu, nu kulanda ati: “We Yeloboamu na mwe Ina Izlaeli mwensi uvwini kuno.
5 Uzye mutamanya ukuti Yeova Leza wa Ina Izlaeli wapeezile Devedi na ana yakwe uwene umu Izlaeli manda pe ukupitila umu kupangana nayo upangano wa musilya?*
6 Lelo Yeloboamu mwana Nebati umuomvi wakwe Solomoni mwana Devedi wakatukiile umusambazi wakwe nu kumupondokela.
7 Nupya aonsi aawelewele aatakweti ivya kucita yatwalilile ukukolongana kuli aliwe. Lyene yapondokile Leoboamu mwana Solomoni pano wali umwance nupya wakweti intete icakuti wafizilwe nu kuyalwisya.
8 “Lyene pa mulandu wakuti mwemwe aingi nupya mwakwata ivilubi vyakwe goldi vino Yeloboamu wapanzile ukuti viye ya leza inu, acino mukwelenganyizizya ukuti mungalwisya uwene wakwe Yeova uuli kuli ya mwana Devedi.
9 Uzye mutaazinga ya simapepo yakwe Yeova ya mwana Aloni na Ina Levi nu kuisontela ya simapepo wakwe vino antu ya mu mpanga zyuze yakacita? Wensi uwizile na ka cipambasi na ya suuku 7 wizile aya a simapepo wakwe ya leza ya ufi.
10 Lelo swemo Yeova ali Leza witu nupya tutaamupondokela, ya simapepo itu amu lupwa lwakwe Aloni yakaombela Yeova, na Ina Levi yakayaazwilizya.
11 Yakapeela malambo ya koca kuli Yeova katondo na manguzi pamwi ni vinunkile, nupya umukate wa muzilo ukaya lyonsi pali tebo uwapangilwa na goldi umwengululwe ningo, cila manguzi yakakozya ya lampi aaya pa ca kuteekapo cakwe goldi, pano twika mano uku kuombela Yeova Leza witu; lelo mwemo mwamupondokela.
12 Lolini, Leza ali naswe akututungulula, ya simapepo yakwe nayo iiza umu kulizya mapenga ya mu ulwi. Mwe yonsi ya mu Izlaeli mutaalwisya Yeova Leza wa vikolwe vinu pano mutalacimvya.”
13 Lelo Yeloboamu watumile asilika yamwi kuti yakafisamile Ayuda uku cisila cao icakuti asilika aingi yaali pa nkoleelo ya Yayuda, yauze nayo uku cisila cao.
14 Lino aonsi ya mu Yuda yapiliwike, yaweni ukuti yaali nu kulwisya asilika aali pa nkoleelo yao na aali uku cisila cao. Fwandi yatandike ukulilila kuli Yeova, ala ya simapepo yakulizya mapenga ni ciunda icikalamba.
15 Lyene asilika ya mu Yuda yapunzile ukupunda kwa mu ulwi nupya lino yacisile vivyo, Leza wa cumi walenzile Abiya na Ayuda ukucimvya Yeloboamu na Ina Izlaeli yonsi.
16 Aina Izlaeli yutwike lelo Leza wayapeezile umu minwe ya Yayuda.
17 Abiya na antu yakwe yakomile Aina Izlaeli icipisye icakuti asilika aafwile yafisile 500,000.
18 Vikwene avino Aina Izlaeli yacimviwe, lelo asilika ya mu Yuda yacimvizye pa mulandu wakuti yataile Yeova Leza wa vikolwe vyao.
19 Abiya watwalilile ukuzinganya Yeloboamu nupya wamuposile imisumba, kuli kuti musumba uwa Betele ni mizi iyalimo, musumba uwa Yesyana ni mizi iyalimo, nu musumba uwa Efuleni ni mizi iyalimo.
20 Yeloboamu ataatazile akwatepo maka nupya umu manda yakwe Abiya; lyene Yeova wamukomile.
21 Lelo Abiya wakwatiileko maka. Mukuya kwa nsita watwazile anaci 14, nupya wizile akwata ana aonsi 22 na akazyana 16.
22 Ilyasi lyonsi ilyasyala ilikalanda pali Abiya, pali vino wacisile na pa mazwi yano walanzile, lyalembwa umu mazwi yakwe kasesema Ido.
Mafutunoti
^ Kuli kuti upangano wa manda pe nupya uutanga usenuke.
