2 Milandu 14:1-15
14 Lyene Abiya wafwile nu kuziikwa ukwalaala ivikolwe vyakwe umu Musumba Wakwe Devedi; nupya Asa umwanakwe u wamupyanyile pa wene. Umu manda yakwe umu mpanga mwali umutende pa myaka 10.
2 Asa wacitanga ivisuma nupya ivilungame kuli Yeova Leza wakwe.
3 Ononyile maulambo yakwe ya leza ya ufi ni ncende zino yalolanga ukuti izya muzilo, watamozile ivipilala vya kupepa nu kuputola incesi.*
4 Nupya wanenyile Ayuda ukuti yaombela Yeova Leza wa vikolwe vyao nu kulondela masunde yakwe.
5 Fwandi umu misumba ya Yuda yonsi ononyile incende zino yalolanga ukuti izya muzilo na pa kocela ivinunkile, nupya lino wateekanga umu mpanga mutaali ivimvulunganya.
6 Wakuuzile imisumba ya malinga umu mpanga ya Yuda pano umu mpanga mwali umutende nupya mutaali inkondo umu myaka iiya, pa mulandu wakuti Yeova wamulenzile ukupuuza.
7 Wanenyile Ayuda ati: “Lekini tukuule imisumba yii tuzingulusyeko na malinga ni mpungu, twikeko ni mpongolo ni mifiikilo. Pano i mpanga itu pa mulandu wakuti tukalonda Yeova Leza witu. Twamulonda, nawe watulenga ukupuuza uku yalwani itu yonsi.” Fwandi ukuule wao wasizile.
8 Asa wakweti asilika 300,000 amu mutundu wakwe Yuda aali ni visyangu ivikalamba na masumo. Nupya umu mutundu wakwe Benjamini wakweti asilika ya maka 280,000 aasenzile visyangu ivinono na maulapwa.
9 Lyene Zela Umwina Etiopia waile umu kuyalwisya na asilika 1,000,000 na maceleta 300. Lino wafisile uku Malesya,
10 Asa waile umu kumukomenkanya nupya yaipekinye uku ulwi umu Mukonko wa Zefata uku Malesya.
11 Lyene Asa wapaapasile kuli Yeova Leza wakwe ati: “Iyee we Yeova, wemo ukaazwa yonsi, yaye aingi nanti anono, yakwate amaka nanti foo. Twazwe we Yeova Leza witu pano itutaila muli wewe, nupya itwizila umwi zina lyako uku kulwisya iumba lii ilikulu. We Yeova, wewe Leza witu. Utaleka umuntu sile aliwe akucimvye.”
12 Yeova wavwile Asa na Ayuda ukucimvya Aina Etiopia, nayo yutwike.
13 Asa na antu yano wali nayo yakonsile Aina Etiopia ukufika nu ku Gelali, nupya yatwalilile ukuyakoma icakuti kusi nanti aumwi uwapuswike, pano Yeova na asilika yakwe aayononyile. Pa cisila yasenzile ivintu vya Ina Etiopia ivingi sana.
14 Lyene yaile iyazanza imisumba yonsi iyazingulwike umusumba wa Gelali, pano Yeova walenzile antu ya mu misumba iiyo ukuya sana ni ntete; nupya Asa na antu yakwe yapokolwile ivintu umu misumba yonsi, pano mwali ivintu ivingi sana.
15 Yazanzile na antu aikalanga umu matenti aakweti iviteekwa, nupya yapokolwile imfwele ni mbuzi izingi sana pamwi ni ngamila, na pa cisila yaaswilile uku Yelusalemu.
Mafutunoti
^ Lolini Ulondolozi wa Mazwi.
