2 Milandu 15:1-19
-
Vino Asa wasenwile ivintu (1-19)
15 Lyene umupasi wakwe Leza wizile pali Azaliya mwana Odedi.
2 Fwandi waile umu kukomenkanya Asa nu kumunena ati: “Uvwa kuno we Asa na mwensi mwe ya mu mutundu wakwe Yuda na wakwe Benjamini! Yeova alaya namwe ndi cakuti mwatwalilila ukuya nawe; nupya ndi cakuti mwamulonda alalenga ukuti mumuzane, lelo ndi mwamusya nawe kwene alamusya.
3 Pa nsita itali, Leza wa cumi ataali na Ina Izlaeli, yataakweti ya simapepo aakuyasambilizya, nupya yataakweti na masunde.
4 Lelo lino yakwata intazi nu kuswilila kuli Yeova Leza wao nu kumulonda, walenganga ukuti yamuzane.
5 Umu manda yaaya antu yonsi yapitanga ntete ntete, pano umu mpanga yonsi mwali sana ivimvulunganya.
6 Inko zyononanga inko zyuze ni misumba yononanga imisumba yuze, pano Leza walesile ukuti yavulunganyiziwe pa mulandu ni ntazi izingi.
7 Lelo mwemo muye akome nupya mutatoovoka pano mulalambulwa pa milimo inu.”
8 Lino Asa uvwile sile amazwi yaa nu usesemo wakwe Odedi kasesema, wasifile nu kufumya ivilubi vya winyi umu mpanga yonsi yakwe Yuda na yakwe Benjamini, alino nu mu misumba ino waposile umu ncende ya myamba yakwe Efulemu, nupya wazifizye ulambo wakwe Yeova uwali pa nkoleelo ya ng’anda yakwe Yeova.
9 Lyene wakolonganike amu mutundu wakwe Yuda yonsi na amu mutundu wakwe Benjamini, pamwi na afumile umu mutundu wakwe Efulemu, mu mutundu wakwe Manase nu mutundu wakwe Simyoni aile umu kwikala nayo, pano antu aingi yafumile umu Izlaeli iyaya uku lusansa lwakwe lino yaweni ukuti Yeova Leza wakwe ali nawe.
10 Yakolongine uku Yelusalemu umu mwezi wakwe citatu umu mwaka uwalenga 15 uwa kuteeka kwakwe Asa.
11 Pa wanda uuwa yapeezile malambo kuli Yeova ukufuma pa vintu vino yapokolwile, ing’ombe 700 ni mfwele 7,000.
12 Nupya yapangine ukuti yamaombelanga Yeova Leza wa vikolwe vyao ni myenzo yao yonsi nu umi wao onsi.
13 Wensi uwakana ukuombela Yeova Leza wa Ina Izlaeli wali nu kukomwa aye umunono nanti umukalamba, umonsi nanti umwanaci.
14 Fwandi yalafile kuli Yeova umwi zwi ilyuvwike ala yakupunda ni nsansa nu kulizya mapenga.*
15 Nupya Ayuda yonsi yatemilwe sana pali vino yalafile, pano yalafile ni myenzo yao yonsi nupya yaitemilwe ukulonda Leza, nawe walesile ukuti yamuzane, Yeova watwalilile ukuyalenga ukupuuza uku yalwani yao yonsi.
16 Umwene Asa wafumizye na Maaka nyinakulu pali unamwene pa mulandu wakuti wapanzile icilubi ca winyi ica kuomvya pa kupepa ulucesi.* Asa wawisizye icilubi nu kucivungola, acocela nu mu Mukonko wa Kiduloni.
17 Lelo atononyile incende zya kupepelapo zino antu yalolanga ukuti izya muzilo izyali umu Izlaeli. Nanti ciye vivyo watwalilile ukuombela Leza nu mwenzo onsi umu umi wakwe onsi.
18 Nupya umu ng’anda yakwe Leza wa cumi watwazilemo ivintu vino wene na isi yalolanga ukuti ivya muzilo, kuli kuti siuva, goldi ni viya vyuze.
19 Mu Yuda mutaali inkondo ukufika umu mwaka uwalenga 35 uwa kuteeka kwakwe Asa.
Mafutunoti
^ Mu Ciebele: “Mapenga ni mpembe zya nyama.” Lolini Ulondolozi wa Mazwi, “Ulupembe.”
^ Lolini Ulondolozi wa Mazwi.
