2 Milandu 16:1-14
16 Mu mwaka uwalenga 36 uwa kuteeka kwakwe Asa, Baasya umwene wa Ina Izlaeli wizile umu kulwisya impanga ya Yuda, nupya watandike ukukuula cipya cipya umusumba wa Lama pakuti kutaya uwa kwingila nanti ukufuma ukuya kuli Asa umwene wa Yayuda.
2 Lino Asa waweni vivyo watozile siuva na goldi ivyali umu vipao vya mu ng’anda yakwe Yeova nu mwi sano nu kuvituma uku Mwene Beni-hadadi uwa ku Silya uwikalanga uku Damasika, nupya watumile na mazwi yakuti:
3 “Paya upangano pali wewe nani na pali tata na tata wako. Nakutumila siuva na goldi. Iza utame upangano na Baasya umwene wa Ina Izlaeli pakuti afume umu mpanga yane.”
4 Beni-hadadi uvwile uku Mwene Asa nupya watumile akalamba ya yasilika yakwe ukuyazanza imisumba ya mu Izlaeli, yaile iyonona Iyoni, Dani, Abeli-maimu, ni ncende zyonsi izya kusungilamo ivintu izyali umu misumba yakwe Nafutali.
5 Lino Baasya uvwile vivyo, lilyo kwene sile watiile ukukuula umusumba wa Lama afuma nako.
6 Umwene Asa wamile Ayuda yonsi nupya yaile iyasenda amawe ni mbao vino Baasya waomvyanga pa kukuula umusumba wa Lama, lyene waviomvizye uku kukuula umusumba wa Geba nu musumba wa Mizipa.
7 Pa nsita iiya, Hanani kalola wa vilolwa waile kuli Asa umwene wa ku Yuda nu kumunena ati: “Pa mulandu wakuti wataile umwene wa ku Silya nupya utaataile Yeova Leza wako acino watufililwa ukucimvya umwene wa ku Silya.
8 Uzye Aina Etiopia na Ina Libya yataali asilika ya maka aakweti maceleta aingi na aonsi aakukwela mfwalasi? Lelo pa mulandu wakuti wataile Yeova, walenzile ukuti uyacimvye.
9 Pano Yeova akalola umu nsi yonsi pakuti alange amaka yakwe ukupitila umu kwazwa aakamuombela ni myenzo yonsi. Vino watucita ivya uwelewele; kufuma ilelo kwene umalwanga inkondo.”
10 Lelo Asa wasokiile Hanani nu kumwika umu cifungo, pano wasosile sana pali vino wamunenyile. Nupya pa nsita ili imwi kwene, watandike ukucuzya antu yano wateekanga.
11 Ilyasi lyonsi ilyasyala ilikalanda pali Asa, ukufuma pa kutandika ukufika uku mpela, lyalembwa umwi buku ilikalanda pali ya mwene ya mu Yuda na amu Izlaeli.
12 Umu mwaka uwalenga 39 uwa kuteeka kwakwe Asa, Asa wizile alwala ulwale wa mu ngazo nupya ulwale wakomile, lelo nalyo kwene ataalenzile uwazwilizyo kuli Yeova, waile kuli ya sing’anga.
13 Lyene Asa wafwile umu mwaka uwalenga 41 uwa kuteeka kwakwe, nupya waziisilwe ukwalaala ivikolwe vyakwe.
14 Fwandi yamuzisile umwi lindi ilicindame lino waipangile umu Musumba Wakwe Devedi, nupya yamulaalike pa cintamba cino yapasileko mafuta yakwe basamu ni vintu ivipusanepusane ivinunkile ivisaakanye na mafuta. Nupya yapemvile umuto ukalamba pa ndosya yakwe kuti yamucindike.*
Mafutunoti
^ Lelo asi koca umwili wakwe Asa, yosile ivinunkile.
