2 Milandu 17:1-19
17 Yeosyafati u wapyanyile Asa isi pa wene, nupya wakomizye uwene wakwe ukucila uwa Ina Izlaeli.
2 Wisile asilika umu misumba yonsi iya malinga umu Yuda, nupya wapanzile inkambi zya yasilika umu mpanga yakwe Yuda nu mu misumba yakwe Efulemu ino Asa isi waposile.
3 Yeova watwalilile ukuya na Yeosyafati, pano wacitanga wakwe viivi kwene vino Devedi icikolwe cakwe wacisile nupya ataombelanga ya Baali.
4 Waombelanga Leza wakwe isi nu kulondela masunde yakwe nupya atacitanga iviipe vino Aina Izlaeli yacitanga.
5 Yeova watwalilile ukukomya uwene wakwe Yeosyafati, nupya Ayuda yonsi yapeelanga Yeosyafati ivya upe, nawe wizile akwata ivyuma ivingi nupya wacindikwe.
6 Wizile aya umusipe umu kuvwila amasunde yakwe Yeova, nupya ononyile incende zya kupepelapo zino antu yalolanga ukuti izya muzilo nu kuputola incesi zya kupepa* umu mpanga ya Yuda.
7 Mu mwaka wakwe citatu uwa kuteeka kwakwe, Yeosyafati watumile ya cilolo yakwe, kuli kuti Beni-haili, Obadiya, Zekaliya, Netaneli, na Mikaya uku kusambilizya umu misumba ya mu mpanga ya Yuda.
8 Paali na Ina Levi yaa: Syemaya, Netaniya, Zebadiya, Asaeli, Syemilamoti, Yeonatani, Adoniya, Tobiya, na Toba-doniya, pamwi na Elisyama na Yeolamu aali ya simapepo.
9 Yatandike ukusambizya umu mpanga ya Yuda ala iyasenda ibuku umwali Amasunde Yakwe Yeova, nupya yazingulukanga umu misumba yonsi iya mu mpanga ya Yuda ala yakusambizya antu.
10 Yeova walenzile mawene yonsi azingulwike impanga ya Yuda ukuya ni ntete, nupya yatalwisizye Yeosyafati.
11 Aina Filisti yaletiile Yeosyafati ivya upe ni mpiya zya misonko. Aina Alabya nayo yamuletiile ya suuku 7,700 na ya sawe 7,700.
12 Yeosyafati wakwatilangako sile amaka, nupya watwalilile ukukuula amalinga ni misumba ya kusungilamo ivintu umu mpanga ya Yuda.
13 Waombanga imilimo iingi umu misumba ya mu mpanga ya Yuda, nupya wakweti asilika ya maka umu Yelusalemu.
14 Mu mutundu wakwe Yuda mwali aangalilanga antu masauzandi, uwa kutandikilapo wali a Adina nupya wali na asilika ya maka 300,000.
15 Nupya Adina watungululanga Yeoanani uwali na asilika 280,000.
16 Nupya watungululanga na Amasiya mwana Zikilai uwaipeelisye ukuombela Yeova, nawe wali na asilika ya maka 200,000.
17 Eliyada umusilika wa maka u wangalilanga amu mutundu wakwe Benjamini, nupya wali na asilika 200,000 aali na maulapwa ni visyangu.
18 Watungululanga na Yeozabadi uwali na asilika 180,000 aali ni vyanzo vya ulwi.
19 Yaa yaombelanga umwene kulunda pali yano umwene wapeezile umulimo wa kwangalila imisumba ya malinga mu mpanga ya Yuda monsi.
Mafutunoti
^ Lolini Ulondolozi wa Mazwi.
