2 Milandu 18:1-34
18 Yeosyafati wakweti sana ivyuma nupya wacindikwe, lelo wazumilizye umwi uwa mu ng’anda yakwe ukutwalila umu lupwa lwakwe Ahabu.
2 Lino papisile imyaka, waile kuli Ahabu ku Samaliya, nupya Ahabu wapeelile Yeosyafati pamwi na antu yano wali nayo malambo ya mfwele ni ng’ombe izingi kuli Leza. Lyene wamupaapasile ukuti yaye umu kulwisya musumba wa Lamoti-gilyadi.
3 Lyene Umwene Ahabu uwa ku Izlaeli uzizye Umwene Yeosyafati uwa ku Yuda ati: “Uzye ulansukilila uku Lamoti-gilyadi?” Nawe wamwaswike ati: “Wemo nani sweswe ali yamwi, na antu yane icili cimwi nu kuti antu yako, ndakwazwilizya umu ulwi.”
4 Lelo Yeosyafati wanenyile umwene uwa ku Izlaeli ati: “Napaapata, inkoleelo uzya kuli Yeova.”
5 Fwandi umwene uwa mu Izlaeli wakolonganike ya kasesema 400 aonsi nu kuyuzya ati: “Uzye tuye umu kulwisya umusumba wa Lamoti-gilyadi nanti foo?” Nayo yamwaswike iyati: “Yangini, nupya Leza wa cumi alaupeela kuli mwemwe.”
6 Lyene Yeosyafati uzizye ati: “Uzye kuno kutaya kasesema wakwe Yeova? Lekini tuzye na kuli aliwe vino Leza amalanda.”
7 Umwene uwa mu Izlaeli wanenyile Yeosyafati ati: “Kusile umuntu wenga wino tunguzya pali Yeova; nomba namupata, pano ataatala wasesema ivisuma pali nene, lyonsi akasesema sile iviipe. Izina lyakwe a Mikaya mwana Imila.” Lelo Yeosyafati wamunenyile ati: “Umwene atafwile ukulanda vivyo.”
8 Lyene umwene uwa mu Izlaeli wamile umuomvi wakwe nu kumunena ati: “Kaame zuwa Mikaya mwana Imila.”
9 Umwene uwa mu Izlaeli na Yeosyafati umwene uwa ku Yuda yatenzi pa vilimba vyao ivya wene ale iyazwala ivyakuzwala vyakwe ya mwene; yaali pa lwano pa mpongolo ya musumba wa Samaliya, nupya ya kasesema yonsi yaali pa nkoleelo yao ale yakusesema.
10 Lyene Zedekiya mwana Kenaana wapanzile impembe zya cela nu kulanda ati: “Yeova watalanda ati, ‘Uluma Aina Silya ukuomvya impembe zii kufikila wayalovya.’”
11 Ya kasesema yonsi yasesemanga ivili vimwi ala yakuti: “Yanga uku musumba wa Lamoti-gilyadi nupya ulaya ukaucimvye; Yeova alaupeela kuli wewe.”
12 Wino waile umu kwama Mikaya wamunenyile ati: “Lola! Ya kasesema yonsi iyalanda ivisuma uku mwene. Napaapata, leka vino umalanda viye wakwe vino iyalanda, nupya ulande ivisuma.”
13 Lelo Mikaya walanzile ati: “Nkulapa umwi zina lyakwe Yeova Leza wa umi ukuti, vyonsi vino Leza wane amanena avino namalanda.”
14 Lyene waile uku mwene, umwene nawe wamuzizye ati: “Mikaya, uzye ningaya umu kulwisya umusumba wa Lamoti-gilyadi nanti foo?” Lilyo kwene Mikaya nawe wamwaswike ati: “Yanga nupya ulaya ukaucimvye; ulapeelwa kuli wewe.”
15 Umwene nawe wamuzizye ati: “I miku inga ino ndakulapisya ukuti uwanena sile ivya cumi umwi zina lyakwe Yeova?”
16 Nawe walanzile ati: “Nkulola Aina Izlaeli yonsi iyasalangana umu myamba kwati imfwele izyaula kacema. Yeova watalanda ati: ‘Antu yaa yatakweti uwa kuyatungulula. Lekini cila muntu aswilile ukwakwe umu mutende.’”
17 Lyene umwene uwa mu Izlaeli wanenyile Yeosyafati ati: “Uzye ntali nakunena ukuti, ‘Atakusesema ivisuma pali nene suka sile iviipe’?”
18 Mikaya walanzile ati: “Uvwa amazwi yakwe Yeova: Inalola Yeova atenzi pa cilimba cakwe ica wene, nupya asilika yonsi akwi yulu iyaimi umupiipi nawe, ukwi lunji na kuli cimani.
19 Lyene Yeova ali uzya wati, ‘A weni amaya akalyombeleke Ahabu umwene wa Ina Izlaeli pakuti aye uku Lamoti-gilyadi nu kuyafwila kuuku kwene?’ Lelo yonsi iyakwasuka ivipusanepusane.
20 Lyene malaika wenga ali wimilila pa nkoleelo yakwe Yeova nu kulanda ati: ‘Nimaya nkamulyombeleke.’ Yeova nawe ali wamuzya wati, ‘Umaya ukamulyombeleke utuli?’
21 Nawe ali wasuka wati, ‘Nayalenga ya kasesema yakwe yonsi ukulanda ivya ufi.’ Fwandi ali walanda wati, ‘Umaya ukakwanisye ukumulyombeleka. Pitanga ukacite vivyo kwene.’
22 Fwandi Yeova watalenga ya kasesema yako yonsi ukusesema ivya ufi, nupya Yeova watalanda ukuti iviipe vilakucitikila.”
23 Lyene Zedekiya mwana Kenaana wapalime nu kuma Mikaya api tama, nupya wamuzizye ati: “Uzye ukulanda ukuti umupasi wakwe Yeova iwafuma pali nene kuti ulande naawe?”
24 Mikaya nawe wamwaswike ati: “Ulalola vino umupasi iwapita pa wanda uno ulingila umu muputule wa mukasi pakuti ufisame.”
25 Lyene umwene uwa mu Izlaeli walanzile ati: “Sendini Mikaya mumutwale kuli Amoni umukalamba wa musumba na kuli Yoasyi umwana wa mwene.
26 Muyanene muti, ‘Umwene watalanda ati: “Yalilini umuntu wii umu cifungo, nupya mwamupeela ivyakulya ivinono na manzi kufikila lino ndawela umutende.”’”
27 Lelo Mikaya walanzile ati: “Ndi cakuti ulawela umutende ale Yeova atalanzile nani.” Walanzile nu kuti: “Mwensi kwene musunge amazwi yaa.”
28 Lyene umwene uwa mu Izlaeli na Yeosyafati umwene uwa mu Yuda yaile uku Lamoti-gilyadi.
29 Umwene uwa mu Izlaeli wanenyile Yeosyafati ati: “Namazwala ivyakuzwala vyuze pakuti ntamanyikwa nu kuya umu ulwi, lelo wemo uzwale icakuzwala cako ica wene.” Fwandi umwene uwa mu Izlaeli waile azwala ivyakuzwala vyuze nupya yaile umu ulwi.
30 Walanga umwene uwa ku Silya watanena akalamba ya yasilika akwezile pa maceleta ati: “Mutalwa na ali wensi suka sile umwene uwa mu Izlaeli.”
31 Lino akalamba ya yasilika akwezile pa maceleta yaweni sile Yeosyafati, yalanzile iyati: “Nanti ciye uli wii u mwene uwa mu Izlaeli.” Lyene yaile umu kumulwisya; nupya Yeosyafati wapunzile mutuule, lyene Yeova wamwazwile nu kulenga kuti alwani yate ukumukonka.
32 Lino akalamba ya yasilika akwezile pa maceleta yaweni ukuti asi umwene wa mu Izlaeli, lilyo kwene yatiile ukumukonka.
33 Lyene umonsi umwi walasile uluceto ukwaula ukumanya wino akulasa, nalo lwaile ilutota umwene wa mu Izlaeli pano ica kucinga icisao calundinkanile. Fwandi umwene wanenyile uwamusenzile umwi celeta ati: “Koneka nu kumfumya umu ulwi pano iyancisa sana.”
34 Ulwi wakomile sana uwanda uwa, nupya umwene wa Ina Izlaeli yamwimike umwi celeta ala watalozya icinso uku Ina Silya ukufika manguzi; nupya wafwile lino ilanzi lyawa.
