2 Milandu 19:1-11
19 Lyene Yeosyafati umwene wa mu Yuda wawezile umutende ukwi sano lyakwe umu Yelusalemu.
2 Yeu mwana Hanani kalola wa vilolwa waile umu kumukomekanya nupya wamuzizye ati: “Uzye kacita wa viipe awino ungaazwilizya? Nupya uzye yano Yeova wapata wemo ayano ungatemwa? Pa mulandu wakuti avino watucita, Yeova watakusokela sana.
3 Lelo Leza watazana ivisuma muli wewe pa mulandu wakuti wonona incesi zya kupepa* umu mpanga, nupya wasoolola ukulaombela Leza wa cumi.”
4 Yeosyafati watwalilile ukwikala umu Yelusalemu, nupya kwene waile uku yantu ya ku Belisyeba ukufika nu ku ncende ya myamba yakwe Efulemu, kuti akayakomelezye ukuswilila kuli Yeova Leza wa vikolwe vyao.
5 Wasonsile na ya kapingula umu misumba yonsi iya malinga iya mu mpanga ya Yuda.
6 Nupya wanenyile ya kapingula ati: “Mwaika amano uku mulimo uno mukuomba pano musikupingwila umuntu lelo mukupingwila Yeova, nupya amayanga namwe lino mukupingula.
7 Fwandi mwatiina Yeova. Mwacenjela muli vino mukucita, pano Yeova Leza witu ataya nu lufyengo, ataya na kapatulula nupya asipoka mafisakanwa.”
8 Mu Yelusalemu namo Yeosyafati wasonsilemo Aina Levi yamwi na ya simapepo na akalamba ya ndupwa zya mu Izlaeli ukulapingwilako Yeova nu kupingula imilandu ya yantu ya mu Yelusalemu.
9 Nupya wayanenyile ati: “Mulinzile ukutiina Yeova lino mukuomba imilimo inu, mwaya na ucisinka nupya mwaomba ni myenzo yonsi.
10 Lyonsi lino aina inu aakaikala umu misumba yuze yaleta umulandu wa wazi nanti yuzya pa masunde nanti pa upinguzi, mwayaanena ningo vino yalinzile ukucita pakuti yataya nu mulandu kuli Yeova; nga cisi vivyo, Leza alamusokela pamwi na ina inu. Vikwene avino mulinzile ukulacita pakuti mutaya nu mulandu.
11 Amaliya simapepo mukalamba alaamwazwa ukumanya ukulonda kwakwe Yeova umu vintu vyonsi. Zebadiya mwana Isumaeli aali ntunguluzi pa ya mu ng’anda yakwe Yuda umu milandu yonsi ikumile umwene. Nupya Aina Levi yalaamwangalila. Muye akome nu kuomba umulimo, nupya si Yeova aye na yayo aakacita ivisuma.”
Mafutunoti
^ Lolini Ulondolozi wa Mazwi.
