2 Milandu 24:1-27
24 Yeoasyi wali ni myaka 7 lino watandike ukuteeka, nupya wateesile pa myaka 40 umu Yelusalemu. Nyina wali a Zibiya uwa ku Belisyeba.
2 Yeoasyi watwalilile ukuzanzya Yeova manda yonsi yano Yeoyada simapepo wali nu umi.
3 Yeoyada wamulondiile anaci yaili nupya wizile akwata ana aonsi na akazyana.
4 Pa cisila Yeoasyi watandike ukulondesya ukuzifya ing’anda yakwe Yeova.
5 Fwandi wakolonganike ya simapepo na Ina Levi nu kuyanena ati: “Yangini umu misumba ya mu mpanga ya Yuda nu kuyakolonganika impiya umu Izlaeli monsi izya kuzifizyanga ing’anda yakwe Leza winu cila mwaka; nupya mucincile ukucita vivyo.” Lelo Aina Levi yataacisile vivyo zuwa zuwa.
6 Acino umwene wamiile Yeoyada simapepo mukalamba nu kumuzya ati: “U mulandu ci uno utaalekela ukuti Aina Levi yaaleta umusonko wa muzilo ukufuma umu mpanga ya Yuda nu mu Yelusalemu kulingana na vino Mose umuomvi wakwe Yeova walanzile, kuli kuti umusonko wa muzilo uwa Ina Izlaeli uwa kuomvya api tenti umwaya Imbokosi ya Upangano?
7 Pano ya mwana Ataliya umwanaci umwipe iingile umu ng’anda yakwe Leza wa cumi, nupya yaomvyanga ivintu vyonsi ivya muzilo ivyaya umu ng’anda yakwe Yeova pa kupepa Baali.”
8 Lyene yapanzile kambokosi nu kukika apanzi umupiipi ni mpongolo ya ng’anda yakwe Yeova wakwe vino umwene walanzile.
9 Pa cisila, yamanyisizye antu amu mpanga ya Yuda yonsi nu mu Yelusalemu kuti yatwala imisonko kuli Yeova wakwe vino Mose umuomvi wakwe Leza wa cumi wanenyile Aina Izlaeli ukulacita umu lwanga.
10 Ya cilolo kumwi na antu yonsi yasansamwike, nupya yatwalanga imisangulo nu kuika umu kambokosi ikasuka ikazula.*
11 Lyonsi lino Aina Levi yatwala kambokosi uku mwene, nupya yalola ukuti muli impiya izingi sana, kalemba wa mwene nu wazwilizyanga simapepo mukalamba yafumyanga impiya zizyo umu kambokosi nu kukaswilizya pano kikalanga. Vikwene avino yacitanga cila wanda nupya yakolonganikanga impiya izingi sana.
12 Lyene umwene na Yeoyada yapeelanga impiya zizyo kuli yano yangalilanga umulimo wa pa ng’anda yakwe Yeova, nayo yapeelanga ya kaputola ya mawe na amanyile ivya kupangapanga akuomba umulimo wa kuzifya ing’anda yakwe Yeova, na aombanga ni vyela na koopa pa kuzifya ing’anda yakwe Yeova.
13 Angalilanga imilimo yalesile ukuti umulimo utandike, nupya umulimo wa kuzifya waombwanga ningo, yazifizye ni ng’anda yakwe Leza wa cumi wakwe vino yaali, nu kuikomya.
14 Lino yamazile sile umulimo, impiya izyasiilepo yaziswilizye uku mwene na kuli Yeoyada, nayo yaziomvizye uku kupangila iviya vya kuomvya pa ng’anda yakwe Yeova ni viya vya kuomvya uku milimo yuze ni vya kuomvya pa kupeela malambo alino na makapu ni viya vyakwe goldi na vyakwe siuva. Nupya lyonsi yapeelanga malambo ya koca pa ng’anda yakwe Yeova manda yonsi yano Yeoyada wali nu umi.
15 Lino Yeoyada wakosile nupya ala wataipakizya uumi, wafwile; lino wafwile wali ni myaka 130.
16 Fwandi yamuziisile umu Musumba Wakwe Devedi muno yaziikanga ya mwene pa mulandu wakuti wacisile ivisuma ivingi uku yantu ya mu Izlaeli, kuli Leza wa cumi na pa ng’anda yakwe Leza.
17 Pa cisila ca mfwa yakwe Yeoyada, ya cilolo ya mu Yuda yaile iyafukama pa nkoleelo ya mwene, nupya umwene uvwile kuli vino yalanzile.
18 Yatiile ukuomba imilimo ino yaombanga pa ng’anda yakwe Yeova Leza wa vikolwe vyao iyatandika ukupepa incesi* ni vilubi, fwandi ukali wakwe Leza wizile pa yantu ya mu mpanga ya Yuda nu mu Yelusalemu pa mulandu na vino yacisile.
19 Yeova wayatumilanga ya kasesema pakuti ayaazwe ukuswilila kuli aliwe, nupya yayasokanga lelo yakanyile ukuvwa.
20 Umupasi wakwe Leza wizile pali Zekaliya mwana Yeoyada simapepo, nawe wimilile pa nkoleelo ya yantu nu kuyanena ati: “Leza wa cumi watalanda ati, ‘U mulandu ci uno mukutamila masunde yakwe Yeova? Vintu vitalamuzipila! Pa mulandu wakuti mwapondokela Yeova, nawe alamusya.’”
21 Lelo yamupangiile nu kumutama na mawe pa musolo wa pa ng’anda yakwe Yeova, wakwe vino umwene wayanenyile ukuti yacite.
22 Fwandi Umwene Yeoasyi atiwisye ukutemwa kwa cumi kuno Yeoyada isi wakwe Zekaliya wamulanzile, nupya wakomile umwanakwe wino pa kufwa walanzile ati: “Si Yeova alandule pali vino wacita.”
23 Ku kutandika kwa mwaka, asilika Aina Silya yaile umu kulwisya Yeoasyi, nupya yazanzile impanga ya Yuda na Yelusalemu. Lyene yakomile ya cilolo yonsi, nupya ivintu vyonsi vino yaposile yavitumile uku mwene wa ku Damasika.
24 Nanti cakuti asilika Aina Silya yaali anono, Yeova walenzile ukuti yacimvye asilika aingi amu mpanga ya Yuda pa mulandu wakuti yapondokile Yeova Leza wa vikolwe vyao; fwandi yafulwile Yeoasyi.
25 Lino yafumile kuli aliwe (pano wacisike sana), aomvi yakwe yamupangiile pa mulandu wakuti wakomile ya mwana* Yeoyada simapepo. Yamukomiile pali bedi wakwe. Fwandi wafwile nu kuziikwa umu Musumba Wakwe Devedi, lelo yatamuziikile umu ncende ino yaziikangamo ya mwene.
26 Apangiile umwene aeya: Zabadi mwana Syimeati umwanaci Umwina Amoni na Yeozabadi mwana Syimeliti umwanaci Umwina Moabu.
27 Kulozya ukwi lyasi ilikalanda pa yana yakwe na pa vintu ivingi vino yamusosilepo alino nu kuzifya ing’anda yakwe Leza wa cumi, vyonsi vyalembwa umwi buku lya mpiti ilikalanda pali ya mwene. Nupya Amaziya umwanakwe u wamupyanyile pa wene.
Mafutunoti
^ Nanti limwi, “ukufikila yonsi iyapeela.”
^ Lolini Ulondolozi wa Mazwi.
^ Nanti “umwana.” Limwi ana ikulozya uku mucinzi.
