2 Milandu 25:1-28
25 Amaziya wali ni myaka 25 lino watandike ukuteeka, nupya wateesile imyaka 29 umu Yelusalemu. Nyina wali a Yeoadani uwa ku Yelusalemu.
2 Wazanzyanga Yeova, lelo atacitanga vivyo nu mwenzo onsi.
3 Nupya lino wizile akwata amaka pa wene, wakomile aomvi yakwe aakomile isi uwali umwene.
4 Lelo ataakomile ana yao pano walondiile isunde ilyalemvilwe umwi buku lyakwe Mose muno Yeova walanzile ati: “Ya isi yatalinzile ukufwila pa vicitwa vya yana yao. Na ana yatalinzile ukufwila pa vicitwa vyakwe ya isi; lelo cila muntu alinzile ukufwila pa luyembu lwakwe.”
5 Nupya Amaziya wakolonganike antu ya mu Yuda nu kuleka ukuti yaye umu maumba ukulingana ni ndupwa zyao ala yakutungululwa na akalamba ya pa yantu masauzandi na apa yantu 100 amu mutundu wakwe Yuda na Benjamini. Walemvile aali ni myaka 20 ukuya papela, nupya wazanyile asilika 300,000 aasambiliziwe ivya kulwa nupya aomvyanga masumo ni visyangu ivikalamba.
6 Nupya watozile matalanti* yakwe siuva 100 apeela asilika ya maka 100,000 amu Izlaeli pakuti yakamulwileko.
7 Lelo umuntu wakwe Leza wa cumi waile kuli aliwe nu kumunena ati: “Mwene utasenda asilika ya mu Izlaeli pano Yeova asi na Ina Izlaeli, kuli kuti amu mutundu wakwe Efulemu.
8 Lelo pita sile wenga nu kuya umu ulwi nupya uye umusipe. Pano nga utacisile vivyo Leza wa cumi amaleka ukuti alwani yako yakucimvye, pano u wakwata amaka ya kwazwa umuntu na akulenga umuntu ukucimviwa.”
9 Lyene Amaziya uzizye umuntu wakwe Leza wa cumi ati: “Lyene cimaya uli uku matalanti 100 yano impeela asilika Aina Izlaeli? Nawe wamwaswike ati: “Yeova akweti amaka ya kukupeela ivingi ukucila na pali vivyo.”
10 Fwandi Amaziya wanenyile asilika afumile umu mutundu wakwe Efulemu kuti yaswilile. Lelo yasokiile sana amu mpanga yakwe Yuda, nupya yaswilile ukumwao ala aasoke sana.
11 Lyene Amaziya wasifile nu kusenda asilika yakwe iyaya uku Mukonko wa Musilya nupya wakomile aonsi 10,000 aku Seili.
12 Nupya aonsi ya mu Yuda yalemile aonsi 10,000 apuma. Lyene yayatwazile pa ciliwe papela nu kuyasumbila pansi nupya yonsi yasandosile.
13 Lelo asilika Aina Izlaeli yano Amaziya waswilizye ukumwao yatandike ukuzanza imisumba ya mu Yuda ukufuma uku Samaliya ukufika uku Beti-holoni, nupya yakomile antu 3,000 nu kusenda ivintu vyao ivingi.
14 Lelo lino Amaziya wawezile umu kukoma Aina Edomu, wasenzile ya leza ya Ina Seili nu kuleka kuti yaye aaleza yakwe, nupya watandike ukuyafukamila nu kuyapeela malambo ya koca.
15 Fwandi Yeova wasokiile sana Amaziya nupya watumile kasesema uwaile amuzya ati: “U mulandu ci uno ukupepela ya leza ya yantu afizilwe ukupususya antu yao kuli wewe?”
16 Lino acili akulanda, umwene wamuzizye ati: “A weni uwakusonta ukuya impandamano yane? Congo! Uzye ukulonda ukukomwa?” Lyene kasesema wasyalikizye na mazwi yakuti: “Imanya ukuti Leza akulonda ukukonona pa mulandu wakuti watucita icintu cii na pa mulandu wakuti utuvwilile vino inkunena.”
17 Lino umwene Amaziya uwa ku Yuda walanzyanyizye ni mpandamano zyakwe, watumile amazwi kuli Yeoasyi mwana Yeowazi mwana Yeu umwene wa mu Izlaeli aakuti: “Iza tulwisyanye.”
18 Umwene Yeoasyi uwa ku Izlaeli nawe watumile mazwi kuli Amaziya umwene wa ku Yuda ati: “Munga wa ku Lebanoni watumile mazwi uku mukedali wa ku Lebanoni aakuti, ‘Peela umwanako umukazyana uku mwanane kuti aye umuci.’ Lelo icilyanyi ca ku Lebanoni capisile pa munga nu kuulyatola.
19 Watulanda uti, ‘Incimvya Aina Edomu.’ Na cico icilenga uye ni cilumba, ukulonda ukucindikwa. Lelo ikala umwi sano lyako. U mulandu ci uno ungailetela intazi nu kucimviwa pamwi ni mpanga ya Yuda?”
20 Lelo Amaziya wakanyile ukuvwa, pano Leza wa cumi u walenzile ukuti acite vivyo pakuti ayapeele uku yalwani yao, pa mulandu wakuti yapepanga ya leza ya Ina Edomu.
21 Fwandi Umwene Yeoasyi uwa ku Izlaeli waile kuli aliwe, nupya wene na Amaziya umwene wa ku Yuda yalwilile uku Beti-syemesyi, incende iyaali umu mpanga ya Yuda.
22 Aina Izlaeli yacimvizye antu ya mu Yuda, fwandi cila muntu utukiile ukwakwe.
23 Umwene Yeoasyi uwa ku Izlaeli waile alemela Umwene Amaziya uwa ku Yuda, mwana Yeoasyi mwana Yeoazi,* ku Beti-syemesyi. Lyene wamuleesile uku Yelusalemu, nupya waile aomoola ciumba ca musumba wa Yelusalemu kufuma pa Mpongolo Yakwe Efulemu kufika pa Mpongolo ya pa Koona, apaali mamita umupiipi na 180.
24 Wasenzile goldi wensi na siuva ni viya vyonsi vya mu ng’anda yakwe Leza wa cumi vino Obedi-edomu wasakamalanga alino ni vyuma vya mwi sano kumwi na antu yamwi. Lyene waswilile uku Samaliya.
25 Amaziya mwana Yeoasyi umwene wa ku Yuda wikazile imyaka 15 pa cisila ca mfwa yakwe Yeoasyi mwana Yeowazi umwene wa ku Izlaeli.
26 Nupya ilyasi lyonsi ilyasyala ilikalanda pali Amaziya ukufuma pa kutandika ukufika uku mpela, lyalembwa umwi buku lya mpiti ilikalanda pali ya mwene ya mu Yuda nu mu Izlaeli.
27 Kufuma lino Amaziya wapondokiile Yeova kwali yamwi aamupangiile umu Yelusalemu, nawe utukiile uku Lakisyi, lelo yatumile aonsi amukonsile iyaya iyamukoma.
28 Fwandi yamukwezizye pa mfwalasi iyaya iyamuziika ukwalaala ivikolwe vyakwe umu musumba wa mu mpanga ya Yuda.
Mafutunoti
^ Italanti lyonga lyafinanga makilogilamu 34.2. Lolini Ivyeo na Vyuze pa B14.
^ Akaamwa nu kuti Ahaziya.
